ನಮಾನ್ ತುಕಾ ಗೊವ್ಳ್ಯಾ ಬರ‍್ಯಾ...

- ಆಲ್ಬರ್ಟ್ ಮಸ್ಕರೇನ್ಹಸ್, ವಾಮಂಜೂರ್ (ಇಸ್ರೇಲ್)

‘ಗೂಂಡ್ ಉದ್ಕಾಚೊ ಪಾಗಿ’ ಮ್ಹಣ್ಂಚ್ ನಾಂವಾಡ್ಲೊಲೊ , ಕಾರ್‌ವಾರ್ ದಿಯೆಸೆಜಿಚೊ ಪಯ್ಲೊ ಬಿಸ್ಪ್ ಜಾವ್ನ್ ೩೦ ವರ‍್ಸಾಂಚಿ ಸಮರ್ಪಿತ್ ಸೆವಾ ದೀವ್ನ್ ೨೦೧೧ ಜುಲಾಯ್ ೧೯ವೆರ್ ದೆವಾದೀನ್ ಜಾಲ್ಲೊ ಬಿಸ್ಪ್ ದೆ. ವಿಲಿಯಮ್ ಲಿಯೊನಾರ್ಡ್ ಡಿಮೆಲ್ಲೊ ಖರ‍್ಯಾನ್ಂಚ್ ಕಠೀಣ್ ಪರಿಗತೆಂನಿ, ಕಠೋರ್ ವೆಕ್ತಿತ್ವಾಕ್ ಸಯ್ತ್ ಆಪ್ಣಾಶಿಂ ವೊಡುಂಕ್ ಸಕ್ಚೊ, ಚುಂಬಕ್ ಸಕ್ತೆಚೊ ಆನಿ ಆಪ್ಣೆಂ ವಿಂಚ್‌ಲ್ಲ್ಯಾಂಕ್ ಬರ‍್ಯಾ ಗೊವ್ಳ್ಯಾಲಾಗಿಂ ತಾಂಡುನ್ ವ್ಹರ‍್ಚೊ ಬೋವ್ ಆಪ್ರೂಬ್ ವೆಕ್ತಿ.  ಘಡ್ಯೆನ್ ರಾಗಾರ್ ಜಾಂವ್ಚ್ಯಾ ಆನಿ ಉಪ್ರಾಟ್ಚ್ಯಾ ಮ್ಹಜೆ ತಸಲ್ಯಾ ನಾಸಮಾಧಾನೆಚ್ಯಾ ವೆಕ್ತಿಕ್ ಸಯ್ತ್ ಆಪ್ಲ್ಯಾ ಖುಶಾಲಿ ಜಿನೊಸಾವರ್ವಿಂ ಆನಿ ಸಮಾದಾನೆಚ್ಯಾ ದೆಣ್ಯಾಂವರ್ವಿಂ ತೊ ಕಸೊ ಖಾಲ್ತೊ ಕರ‍್ತಾಲೊ ಮ್ಹಳ್ಳ್ಯಾಕ್ ಏಕ್ ಜೀವಂತ್ ಸಾಕ್ಸ್ ಆಸಾ - ಹಾಂವ್.  ಕಿತೆಂಚ್ ನ್ಹಂಯ್ ಆಸ್‌ಲ್ಲ್ಯಾ ಮ್ಹಾಕಾ ಮೋಳ್ನ್ ಮೊಗಾಳ್, ಮಾಯ್ಪಾಸಿ ಕೆಲ್ಲ್ಯಾ ತಾಚೆ ಸಂಗಿಂ ಹಾಂವ್ ಧಾ ವರ‍್ಸಾಂ ವಾವುರ‍್ಲೊಂ. ಹೆಂ ಮ್ಹಜೆಂ ಏಕ್ ಭಾಗ್‌ಚ್ ಸಯ್ ಮ್ಹಣ್ ಆತಾಂಯಿ ಹಾಂವ್ ಲೆಕ್ತಾಂ.

೧೯೮೫ವ್ಯಾ ವರ‍್ಸಾ ಕಾರ್‌ವಾರ್ ದರ್ಯಾ ತಡಿಚ್ಯಾ ಬೈತ್‌ಕೋಲ್‌ಚ್ಯಾ ಭಿಸ್ಪಾಚ್ಯಾ ಪರ್ನ್ಯಾ ಘರಾಂತ್ ಮ್ಹಜೊ ವಾವ್ರ್ ಸುರು ಜಾಲ್ಲೊ. ತಾಚ್ಯಾ ವಾಹಾನಾಚೊ ಚಾಲಕ್ ಜಾವ್ನ್ ಕಾಮಾಕ್ ಭರ್ತಿ ಜಾಲ್ಲ್ಯಾ ಮ್ಹಾಕಾ ಸುರ‍್ವೆರ್ ಥೊಡೆ ಸಮಸ್ಸೆ ಉದೆತಾನಾ, ಆನಿ ಮ್ಹಜ್ಯಾ ಮುಕಾರ್ ರಾಗಾಚ್ಯಾ ಜಿನೊಸಾವರ್ವಿಂ ಹೆ ಸಮಸ್ಸೆ ಗಂಭೀರ್ ಜಾತಾನಾ, ಎಕಾ ಮಾಯ್ಪಾಸಿ ಬಾಪಾಯ್‌ಪರಿಂ ಮ್ಹಕಾ ಸಮ್ಜೊವ್ನ್ ,  ಖಾಲ್ತ್ಯಾ ಜಿವಿತಾಚೆಂ ಮಾರ್ಗ್‌ದರ್ಶನ್ ದೀವ್ನ್, ಕಾಮಾಂತ್ ಮುಕಾರುನ್ ವಚೊಂಕ್ ಪಾಟಿಂಬೊ ದಿಲ್ಲೊ ಹ್ಯಾಚ್ ಮಹಾನ್ ವೆಕ್ತಿನ್. ತಾಣೆ ಶಿಕಯಿಲ್ಲಿಂ ಜಿವಿತಾಚಿಂ ಲಿಸಾಂವಾಂ ಜಿಯೆವ್ನ್ ಆಜ್ ಹಾಂವ್ ಹ್ಯಾ ಹಂತಾಕ್ ಯೇವ್ನ್  ಪಾವ್ಲಾಂ!

ತಾಚೆಲಾಗಿಂ ಕಾಮಾಕ್ ಭರ್ತಿ ಜಾಲ್ಲ್ಯಾ ದುಸ್ರ್ಯಾಚ್ ಮ್ಹಯ್ನ್ಯಾಂತ್ ಬಿಸ್ಪಾಚ್ಯಾ ಸಮಾದಾನೆಚ್ಯಾ ಆನಿ ಸೊಸ್ಣಿಕಾಯೆಚ್ಯಾ ವೆಕ್ತಿತ್ವಾಚಿಂ ಪಯ್ಲಿಂ ಖುಣಾಂ ಪಳೆಯ್ಲಿಂ ಹಾಂವೆಂ.

ತಿ ರಾತ್ ನತಾಲಾಂಚಿ. ಹಾಂವ್ ಬಿಸ್ಪಾಕ್ ನತಾಲಾಂ ರಾತಿಚೆಂ ಮೀಸ್ ಭೆಟಂವ್ಕ್ ತೆರ‍್ನಮಕ್ಕಿಥಾವ್ನ್ ಶಿರಾಲಿ ಇಗರ್ಜೆಕ್ ಆಪವ್ನ್ ವ್ಹರ‍್ತಾಲೊಂ. ತೆ ಕಾಳ್ಕೆ ರಾತಿಂ ಎಕಾ ನಾರ‍್ಲಾ ತೊಟಾಂತ್ಲ್ಯಾನ್ ಆಮ್ಚೆಂ ವಾಹನ್ ಪಾಶಾರ್ ಜಾತಾನಾ, ಮ್ಹಾಕಾ ವಾಟ್ ಚುಕ್ಲಿ ಆನಿ ಆಮ್ಚೆಂ ಜೀಪ್ ಮಾರೊಗ್ ಸಾಂಡುನ್ ದರ‍್ಯಾ ಪೊಕೊರ್ನೆಕ್ ಆಡ್ ಬಾಂದ್‌ಲ್ಲ್ಯಾ ವೊಣೊದಿಚೆರ್ ಚಡೊನ್ ಮುಕ್ಲಿಂ ರೊಜಾಂ ವಾರ‍್ಯಾರ್ ಘೊಂವೊಂಕ್ ಲಾಗ್ಲಿಂ!  ಕಿತ್ಲೆಂ ಪ್ರೇತನ್ ಕೆಲ್ಯಾರೀ ಗಾಡಿ ಪಾಡಿಂ ಕಾಡುಂಕ್ ಜಾಲಿನಾ. ಕಾಳ್ಕಿ ರಾತ್ ವೆಗ್ಳಿ! ಕಾಯಿಂಚ್ ದಿಸಾನಾ.  ಹ್ಯಾ ವಗ್ತಾ ಸಂಪೂರ್ಣ್ ದೆದೆಸ್ಪೊರ್ ಜಾಲ್ಲ್ಯಾ ಮ್ಹಾಕಾ ಮಾಯ್ಪಾಸಿ ಕಾಳ್ಜಾನ್ ಭುಜವ್ನ್ ‘ಯಾ ಚಲ್ಯಾಂ... ಮುಕಾರ್ ಕಿತೆಂಯ್ ಮೆಳ್ತಾಗಿ ಪಳೆವ್ಯಾಂ...’ ಮ್ಹಣ್ ಮ್ಹಜೊ ಹಾತ್ ಧರ್ನ್  ಕಾಂಟ್ಯಾ ಖುಂಟ್ಯಾಂನಿ ಮೆಟಾಂ ಕಾಡಿತ್ತ್ ಮುಕಾರುನ್ ಗೆಲ್ಲ್ಯಾ ಬಿಸ್ಪಾಚ್ಯಾ ಮೊವಾಳಾಯೆಥಂಯ್ ಆಜ್ಯಾಪ್ಲೊಂ ಹಾಂವ್. ಮುಕಾರುನ್ ವೆತಾನಾ ತೊಟಾಚ್ಯಾ ರಾಕ್ವಲ್ಯಾಂನಿ ಆಮ್ಕಾಂ ವೆಡೊ ಘಾಲೊ. ಪುಣ್ ಬಿಸ್ಪಾಚಿ ವೊಳೊಕ್ ಧರ‍್ತೆಚ್ ತಾಂಣಿ ಬಿಸ್ಫಾಲಾಗಿಂ ಆಶಿರ್ವಾದ್ ಮಾಗ್ಲೊ ಆನಿ ಗಾಡಿ ಕಾಡುಂಕ್ ಕುಮೊಕ್ ಕೆಲಿ. ಶಿರಾಲಿ ಇಗರ್ಜೆಕ್ ಪಾವ್ತಾನಾ, ವಿಗಾರಾನ್ ರಾಕೊನ್ ರಾಕೊನ್ ಫೆಸ್ತ್ ಮೀಸ್ ಸುರು ಕೆಲ್ಲೆಂ. ಉಪ್ರಾಂತ್ ಬಿಸ್ಪಾನ್ ಮೀಸ್ ಮುಕಾರುನ್ ವ್ಹೆಲೆಂ!

ತೊ ಕೊಣಾಕ್‌ಚ್ ನೆಗಾರಿನಾತ್‌ಲ್ಲೊ.  ಖಂಚ್ಯಾ ಕಾಲೆತಿಚ್ಯಾ ವೆಕ್ತಿಕ್ ತರೀ ಆಪ್ಲ್ಯಾ ಮಾಯ್ಪಾಸಿ ಗುಣಾನ್ ಸಾರ‍್ಕೆ ವಾಟೆಕ್ ಹಾಡ್ಚಿ ವಿಶೇಸ್ ತಾಂಕ್ ತಾಕಾ ಆಸ್‌ಲ್ಲಿ. ಕಸಲ್ಯಾ ಕಠೀಣ್ ಪರಿಗತೆಂತ್‌ಯಿ ಆಪ್ಲೊ ಖುಶಾಲಿ ಜಿನೊಸ್ ಜೀವಂತ್ ಹೊಗ್ಡಾಯ್ನಾತ್ಲೊ ವಿಶೇಸ್ ವೆಕ್ತಿ ತೊ.

 

ದೆ| ಬಿಸ್ಪ್ ವಿಲಿಯಮ್ ಲಿಯೊನಾರ್ಡ್ ಡಿಮೆಲ್ಲೊ, ಹಾಂಚೆ ಸಾಂಗಾತಾ - ಲೇಕಕ್ ಆಪ್ಲಿ ಧುವ್ ವಿಕ್ಟೋರಿಯಾ ಸವೆಂ  |  ಮೇ 2010

ಸಂಧ್ಯಾ ವಂದನ, ಶಿರ್ವಾಡ್ , ಕಾರ್ವಾರ್

 

ಕಾರ್‌ವಾರ್ ದೆ| ಬಿಸ್ಪ್ ವಿಲಿಯಮ್ ಲಿಯೊನಾರ್ಡ್ ಡಿಮೆಲ್ಲೊ, ಹಾಂಚಿ ಸಮಾಧಿ  | ಮೇ 2012

ಕಾಜುಬಾಗ್ ಕಾಥೆಡ್ರಾಲ್ , ಅಸುಪ್ಸಾಂವ್ ಸಾಯ್ಭಿಣಿಚಿ ಇಗರ್ಜ್ , ಕಾರ್ವಾರ್

 

ತಾಚಿ ಒಪನ್ ಹಾರ್ಟ್ ಸರ್ಜರಿ ಜಾಂವ್ಚ್ಯಾ ವೆಳಾರ್ ಲಗ್ಬಗ್ ೩ ಮ್ಹಯ್ನೆ ಹಾಂವೆಂ ತಾಚ್ಯಾ ಬಗ್ಲೆನ್ ಆಸ್‌ಲ್ಲೊಂ.  ತಾಕಾ ಆಪರೇಶನಾಕ್ ವರ‍್ಚ್ಯಾ ಆದಿಂ, ಎಕಾ ದಿಸಾ ಬಿಸ್ಪಾನ್ ತಾಚ್ಯಾ ಗಳ್ಯಾಂತ್ಲಿ ಭಾಂಗಾರಾಚಿ ಚೇಯ್ನ್ ಮ್ಹಾಕಾ ಕಾಡುಂಕ್ ಸಾಂಗ್ಲಿ ಆನಿ ‘ತಿ ತುಜ್ಯಾ ಗಳ್ಯಾಕ್ ಘಾಲ್’ ಮ್ಹಳೆಂ.  ‘ನಾಕಾ, ನಾಕಾ...’’ ಮ್ಹಳ್ಯಾರೀ ತಾಣೆ ವೊತ್ತಾಯ್‌ಚ್ ಕೆಲಿ. ತಾಚ್ಯಾ ಖುಶೆಕ್ ಹಾಂವೆಂ ಖಾಲ್ತಿಮಾನ್ ಘಾಲಿಜೆಚ್ ಪಡ್ಲೆಂ. ಹಾಂವೆಂ ತಿ ಚೇಯ್ನ್ ತಾಚೊ ಮೊಗಾಚೊ ಘುರ್ತ್‌ ಜಾವ್ನ್ ಆತಾಂಯೀ ಜಗೊವ್ನ್ ದವರ‍್ಲ್ಯಾ!

ತಾಚ್ಯಾ ದಫ್ತರಾಂತ್ ಮದೆಗಾತ್ ಬರ‍್ಯಾಗೊವ್ಳ್ಯಾಚೆಂ ಪಿಂತುರ್. ತ್ಯಾ ಪಿಂತುರಾ ಸಕ್ಲಾ ತಾಣೆ ಬಸ್ಚೆಂ ಕದೆಲ್. ತಾಚ್ಯಾ ಜಿಣ್ಯೆಂತ್‌ಯಿ ಖರ‍್ಯಾನ್ ತೊ ಏಕ್ ‘ಬರೊ ಗೊವ್ಳಿ’ಚ್. ಕುಮ್ಟಾ ಫಿರ್ಗಜೆಚೊ ಸಹಾಯಕ್ ವಿಗಾರ್, ಹಡಿಹೆಬಾಳ್ಚೊ ಬಾ. ಮಿನಿನ್ ಲೊಪೆಜ್ ಕುಮ್ಗಾರ್ ವ್ಹರ್ನ್ ವೆತಾನಾ ಅವ್ಫಡಾಕ್ ಸಾಂಪ್ಡೊನ್ ಅವ್ಚಿತ್ ದೆವಾದೀನ್ ಜಾಲ್ಲ್ಯಾ ವೆಳಿಂ ಬೆಂಗ್ಳುರ್ ಆಸ್‌ಲ್ಲೊ ಬಿಸ್ಪ್ ತುರಂತ್ ಪಾಟಿಂ ಆಯಿಲ್ಲೊ ಆನಿ ಬಾ| ಲೊಪೆಜಾಚ್ಯಾ ಮರ‍್ಣಾಮಿಸಾ ವೆಳಾರ್ ಸುಸ್ಕಾರ್ನ್ ಸುಸ್ಕಾರ್ನ್ ರಡ್‌ಲ್ಲೊ. ನಿಮಾಣೆ ಮೀಸ್ ಮುಕಾರುಂಕ್ ಜಾಯ್ನಾಸ್ತಾಂ ಲಗ್ಬಗ್ ೧೦-೧೫ ಮಿನುಟಾಂ ಆಲ್ತಾರಿಚೆರ್ ಮೊನೊ ಜಾವ್ನ್ ಬಸ್‌ಲ್ಲೊ.
 
ಆಪ್ಲ್ಯಾ ಹಿಂಡಾಚೊ ಅಪರಿಮಿತ್ ಮೋಗ್ ಆಸ್‌ಲ್ಲೊ ತಾಕಾ. ತಾಂಚಿ ಖಳನಾಸ್ತಾಂ ಜತನ್ ಘೆತಾಲೊ ತೊ. ತಶೆಂಚ್ ಸೆಮಿನಾರಿಸ್ತಾಂಚ್ಯಾ ವಿಂಚವ್ಣೆಂತ್, ಲಾಯಿಕಾಂಚ್ಯಾ ಸಾಂಬಾಳ್ಣೆಂತ್‌ಯಿ ತೊ ಖರ‍್ಯಾನ್ಂಚ್ ಏಕ್ ‘ಗೂಂಡ್ ಉದ್ಕಾಚ್ಯಾ ಪಾಗಿ’ಪರಿಂ  ವಿಂಚವ್ಣ್ ಕರ್ತಾಲೊ. ದಾಂಡೆಲಿ ಫಿರ್ಗಜೆಚೆಂ ಮಿಸಾಂವ್ ಠಾಣೆ ಗುಂದಾಚೆಂ ಕೊಪೆಲ್ ಪಳೆಂವ್ಕ್ ತಾಣೆ ನಮಿಯಾರ್‌ಲ್ಲೊ ಏಕ್ ಲಾಯಿಕ್‌ಚ್ ತಾಂಚ್ಯಾ ಪರಿಣತ್ ವಿಂಚವ್ಣೆಚಿ ಸಾಕ್ಸ್.

ಆಪ್ಲ್ಯಾ ನಿಮಾಣ್ಯಾ ದಿಸಾಂನಿ, ಭಿಗಡ್ಲೆಲ್ಯಾ ಭಲಾಯ್ಕೆ ಮದೆಂಯ್ ಆಪ್ಣಾಕ್ ಭೆಟ್ ದಿತೆಲ್ಯಾಂಚೆ ಕಶ್ಟ್-ಸುಖ್ ವಿಚಾರ್ನ್ ಫೆಂವ್ಚೆಂ, ತಾಂಚ್ಯಾ ಕಶ್ಟಾಂವಿಶಿಂ ಆಪ್ಲೊ ಹುಸ್ಕೊ ದಾಕಂವ್ಚೊ, ತಾಂಕಾಂ ಧಯ್ರ್ ದಿಂವ್ಚೆಂ... ಆಶೆಂ ತೊ ಅಕೇರ್ ಪರ್ಯಾಂತ್  ಖರ‍್ಯಾ ಗೊವ್ಳ್ಯಾಪರಿಂ ಜಿಯೆವ್ನ್ ಆಜ್ ಜೆಜು ಬರ‍್ಯಾ ಗೊವ್ಳ್ಯಾ ಸಂಗಿಂ ಸರ್ಗಿಂ ರಾಜಾಂತ್ ಸುಖ್ ಭೊಗುನ್ ಆಸಾ.

ಕಾಂಟ್ಯಾಂ ಖುಂಟ್ಯಾಂಚ್ಯಾ ಆಮ್ಚ್ಯಾ ಜಿಣ್ಯೆಂತ್ , ವಾಟೆ ದಿವ್ಯಾ ತಸಲೆ ಅಸಲೆ ವ್ಯಕ್ತಿ ಅಪ್ರೂಬ್ ಮೆಳ್ಟಾತ್ ಆನಿ ಆಮ್ಚ್ಯಾ ಉರ್ಲೆಲ್ಯಾ ಜಿಣ್ಯೆಚೆರ್ ಪ್ರಭಾವ್ ಘಾಲ್ತಾತ್ ಮಾತ್ ನಯ್, ಏಕ್ ದಿಶಾ ದೀವ್ನ್ ವೆತಾತ್. 

-ಆಲ್ಬರ್ಟ್ ಮಸ್ಕರೇನ್ಹಸ್, ವಾಮಂಜೂರ್ (ಇಸ್ರಾಯೆಲ್)

[ಕಾರ್‌ವಾರ‍್ಚೊ ಪಯ್ಲೊ ಬಿಸ್ಪ್ ದೆ. ವಿಲಿಯಮ್ ಲಿಯೊನಾರ್ಡ್ ಡಿಮೆಲ್ಲೊ ದೆವಾದೀನ್ ಜಾವ್ನ್ ಹ್ಯಾಚ್ ಜುಲಾಯ್ಚ್ಯಾ ೧೯ ತಾರಿಕೆಕ್ ವರ್ಸ್ ಸಂಪ್ತಾ. ತಾಚ್ಯಾ ವಾಹನಾಚೊ ಚಾಲಕ್ ಜಾವ್ನ್ ತಾಚೆ ಸಂಗಿಂ ಲಗ್ಬಗ್ ೧೦ ವರ‍್ಸಾಂ ವಾವುರ‍್ಲಲೊ ಆನಿ ಬಿಸ್ಪಾಕ್ ಒಪನ್ ಹಾರ್ಟ್ ಸರ್ಜರಿ ಜಾಲ್ಲ್ಯಾ ವೆಳಾರ್ ಲಗ್ಬಗ್ ೩ ಮ್ಹಯ್ನೆ ತಾಚ್ಯಾ ಬಗ್ಲೆನ್ಂಚ್ ಆಸ್‌ಲ್ಲೊ  ಶ್ರೀ ಆಲ್ಬರ್ಟ್ ಮಸ್ಕರೇನ್ಹಸ್ ಆಪ್ಲೆ ಉಡಾಸ್ ವಾಂಟುನ್ ಘೆತಾ. ಶ್ರೀ ಆಲ್ಬರ್ಟ್ ಮಸ್ಕರೇನ್ಹಸ್ ಖಾಯಮ್ ಕಿಟಾಳ್ ವಾಚ್ಪಿ ಆನಿ ಸಮರ್ಥಕ್.  ]