ತೀನ್ ಪತ್ರಾಂಚೆಂ ಮರಣ್

ಮ್ಹಜಿಂ ತೀನೀ ಪತ್ರಾಂ ಮುಖ್‍ಪಾನಾರ್ "ಕ್ಷಮಾ ಅಪೇಕ್ಷಿತಾಂ" ಮ್ಹಳ್ಳೆಂ ಪ್ರಕಟಣ್ ಹಾಡುನ್ ಪ್ರಕಟಿತ್ ಜಾಲಿಂ.  ಹ್ಯಾ ತೀನೀ ಪತ್ರಾಂನಿ ಮುಖ್‍ಪಾನಾರ್ ಕಿತೆಂಚ್ ಹೆರ್ ವಾರ್ತಾ ಜಾಂವ್, ಇಸ್ತಿಹಾರ್ ಜಾಂವ್, ಕಾಣಿ ವ ತಸ್ವೀರ್ ಘಾಲುಂಕ್ ಜಾಗೊ ನಾಸ್‍ಲ್ಲೊ.  ಪತ್ರಾಂ ದುಖಾನಾಂನಿ ಪತ್ರಾಂ ಉಮ್ಕಾಳಾವ್ನ್ ದವರ್ತೆಲೆ ಮ್ಹಜಿಂ ಪತ್ರಾಂ ಲಿಪವ್ನ್ ದವ್ರುಂಕ್ ಲಾಗ್ಲೆ.  ವಿಚಾರ್ಲ್ಯಾರ್ ಮಾತ್ರ್ ಕೊನ್ಶಾಂತ್ಲೆಂ ಪತ್ರ್ ದಿಂವ್ಚೆಂ ಪ್ರಯತ್ನ್ ಮಾತ್ರ್ ತಾಣಿ ಕೆಲೆಂ.  ಸಭಾರ್ ಘರಾಂನಿ ಹಿಂ ಪತ್ರಾ ಮುಖ್‍ಪಾನಾರ್ ’ಕ್ಷಮಾ ಅಪೇಕ್ಷಿತಾಂ’ ಛಾಪುನ್ ಯೆತಾಲೆಂ ಜಾಲ್ಲ್ಯಾನ್ ತಿಂ ಆಯಿಲ್ಲ್ಯಾಕ್ಷಣ್ ವಾಚುನ್ ಉಡಯ್ತಾಲೆ.  ಹ್ಯಾದ್ವಾರಿಂ ಪತ್ರಾಂಚಿ ಪ್ರಾಧಾನ್ಯತಾ ಉಣಿ ಜಾಲಿ, ಪತ್ರಾಂಚೊ ಭರ್ಮ್ ಉಭೊನ್ ಗೆಲೊ, ಪತ್ರಾಂಚಿ ರೂಚ್ ಚಾಪ್ಪೆ ಜಾಲಿ ಆನಿ ಪ್ರಸಾರ್ ಉಣೊ ಜಾವ್ನ್ಂಚ್ ಆಯ್ಲೊ.  ನವ್ಯೊ ವರ್ಗಣ್ಯೊ ಯೆಂವ್ಚ್ಯೊ ಬಂಧ್ ಜಾಲ್ಯೊ.  ಹಾಂವೆ ಚಾ.ಫ್ರಾ., ವಿಜೆಪಿ, ಹಾಂಚೆ ಹಾತ್-ಪಾಂಯ್ ಧರುನ್ ತಾಂಚಿಂ ಥೊಡಿಂ ಲೇಖನಾಂ ಛಾಪುಂಕ್ ಸುರ್ವಾತಿಲೆಂ.  ಹೆ ಮಹಾನ್ ಲೇಖಕ್ ಜಾಲ್ಲ್ಯಾನ್ ತಾಂಕಾಂ ತ್ಯಾ ಪರ್ಮಾಣೆ ಪಯ್ಶೆ ದೀಂವ್ಕ್ ಆಸ್‍ಲ್ಲೆ. 

ಲ್ಯಾನ್ಸ್‌ಲೆಟ್ ಚಿಕ್‍ಮಗ್ಳೂರ್, ಸ್ಟ್ಯಾನಿ ನೀರುಡೆ, ರೊನ್ ರೊಚ್ ಕಾಸ್ಸಿಯಾ, ಸಿಜ್ಯೆಸ್ ತಾಕೊಡೆ, ಸ್ಟ್ಯಾನ್ ಅಗೇರಾ, ಮುಲ್ಕಿ ತಸಲ್ಯಾ ತರುಣ್ ಲೇಖಕಾಂಚ್ಯೊ ಕಾಣಿಯೊ ಪ್ರಕಟ್ ಕೆಲ್ಯೊ ತರೀ ಲೋಕಾ ಥಂಯ್ ಕಸಲೆಂಗೀ ನಾಪಸಂದಾಯೆಚೆಂ ವಾತಾವರಣ್ ಉದೆಲ್ಲೆಂ.  ಮಿತ್ರ್, ಝೆಲೊ, ಕಾಣಿಕ್ ಮ್ಹಣ್ಟಾನಾ ಲೋಕಾಕ್ ಕಿತೆಂಗಿ ಕಾಂಟಾಳೊ ಮ್ಹಳ್ಳ್ಯಾಪರಿಂ ಪ್ರಾಸ್ ಜಾತಾಲೆಂ.  ಲೋಕಾಚ್ಯಾ ಮತಿಂ ಏಕ್‍ಚ್ - ಹಾಂವ್ ಎಕಾ ಯಾಜಕಾ ವಿರೋಧ್ ಗೆಲೊಂ ಮ್ಹಣ್; ಹೆರ್ ಕಿತೆಂಚ್ ಖರೆಂ ಸತ್ ತಾಂಕಾಂ ಕಳಿತ್ ನಾಸ್ಲೆಂ.  ಹಾಂವ್ ದೀಸ್ ವೆತಾಂ ವೆತಾಂ ಪಯ್ಶಾಂನಿ ಅಸ್ಕತ್ ಜಾವ್ನ್ಂಚ್ ಆಯ್ಲೊಂ, ಬೇಂಕಾಕ್ ರೀಣ್ ಫಾರಿಕ್ ಕರುಂಕ್ ಪರ್ಯಾಂತ್ ಸಂಕಷ್ಟ್ ಉದೆಲೆ.

ತೀನೀ ಪತ್ರಾಂ ಪ್ರಕಟ್ ಕರುಂಕ್ ಸಕತ್ ನಾಸ್‍ಲ್ಲ್ಯಾ ಹಾಂವೆ ಮ್ಹಜೆಂ ಕಾಣಿಕ್ ಪತ್ರ್ ಕುಲ್ಶೇಖರ್ಚ್ಯಾ ಹೆರಾಲ್ಡ್ ರಸ್ಕೀಞಾಕ್ (ಹೆರಿಬೊಯ್, ಕುಲ್ಶೇಖರ್) ದಿಲೆಂ.  ತಾಕಾ ತಾಚೆಂಚ್ ಮ್ಹಳ್ಳೆಂ ಸಾಂತಾಕ್ರೂಝ್ ಪ್ರೆಸ್ಸ್ ಆಸ್‍ಲ್ಲೆಂ ಜಾಲ್ಲ್ಯಾನ್ ತಾಣೆಂ ತೆಂ ನಮೃತೇನ್ ಸ್ವೀಕಾರ್ ಕೆಲೆಂ.  ಅಸೆಂ ಹಾಂವ್ ಆತಾಂ ಮಿತ್ರ್ ಆನಿ ಝೆಲೊ ಮಾತ್ರ್ ಪ್ರಕಟ್ ಕರುನ್ ರಾವ್ಲೊಂ.

ಭಾರತಾಂತ್ ಇಂದಿರಾ ಗಾಂಧಿ ಪಾಟಾರ್ ಚಡ್‍ಲ್ಲಿ ಆನಿ ತಿಚೊ ಅಧಿಕಾರ್ ಉಸ್ಳಾಂವ್ಕ್ ಆರೆಸ್ಸೆಸ್‌ವಾಲ್ಯಾಂನಿ ಜನಸಂಘ ಬಳಿಷ್ಠ್ ವಿರೋಧ್ ಪಾಡ್ತ್ ಕರುನ್ ಹಾಡ್‍ಲ್ಲಿ.  ಹೆಣೆಂ ತೆಣೆಂ ಮುಷ್ಕರಾಂ, ಫಾತ್ರಾವ್ಣಿ, ಭೆಷ್ಟಾವ್ಣಿ, ಬಂಧ್ ಇತ್ಯಾದಿ ಕರುನ್ ತಿಚಿ ಪದ್ವಿ ಪಿಡ್ಡ್ಯಾರ್ ಕರುಂಕ್ ಹೆರ್ ಪ್ರಯತ್ನಾಂ ಚಲೊನ್ಂಚ್ ಆಸ್‍ಲ್ಲಿಂ.  ಇಂದಿರಾ ಗಾಂಧಿನ್ ಸೊಸ್ತಾಸರ್ ಸೊಸ್ಲೆಂ ಆನಿ ನಿಮಾಣೆ ಭಾರತಾಂತ್ ರಾಷ್ಟ್ರಾ ಭಿತರ್ಲಿ ತುರ್ಥ್ ಪರಿಸ್ಥಿತಿ ಜಾಹೀರ್ ಕೆಲಿ.  ಹರ್ಯೆಕಾ ರಾಜ್ಯಾಂತ್ಲೆ ಆರೆಸ್ಸೆಸ್-ಜನಸಂಘ ಆನಿ ವಿರೋಧ್ ಪಾಡ್ತಿಚೆ ಮುಖೆಲಿ ಪೋಲೀಸಾಂಚಾ ಕಾರ್ಬಾರಾನ್ ಶೀದಾ ಜೈಲಾಕ್ ಗೆಲೆ.  ಹ್ಯಾ ಪಯ್ಕಿ ಜಯಪ್ರಕಾಶ್ ನಾರಾಯಣ್, ಎಲ್ ಕೆ ಆಡ್ವಾಣಿ, ವಾಜಪೇಯಿ ಇತ್ಯಾದಿ ಮುಖೆಲ್ ಜಾವ್ನಾಸ್‍ಲ್ಲೆ.  ಹ್ಯಾ ಕಾರ್ಭಾರಾ ನಿಮ್ತಿಂ ಸಗ್ಳಿ ವಿರೋಧ್ ಪಾಡ್ತ್ ಥರ್ಥರೊನ್ ಗೆಲ್ಲಿ, ಕಂಗಾಲ್ ಜಾಲ್ಲಿ ಆನಿ ಬಳ್ ನಾಸ್ತಾಂ ಕರ್ಗೊನ್ ಗೆಲ್ಲಿ.  ಭಾರತಾಂತ್ಲೊ ವಿರೋಧ್ ಪಾಡ್ತಿಂಚೊ ವಾಗ್ ಜೋರ್ಜ್ ಫೆರ್ನಾಂಡಿಸ್ ಮಾತ್ರ್ ಹ್ಯಾ ಪೋಲೀಸಾಂಚ್ಯಾ ಹಾತಾಂಕ್ ಮೆಳಾನಾಸ್ತಾಂ ಚುಕೊನ್ ಚುಕಾರಿ ಮಾರುನ್ ಸಗ್ಳೊ ದೇಶ್ ಭೊಂವೊನ್ಂಚ್ ರಾವ್ಲೊ.  ಆತ್ತಾಂ ಶಿಖ್ಡೊ ಜಾತಾಲೊ, ಆತ್ತಾಂ ಪಾದ್ರಿ ಜಾತಾಲೊ, ಆತ್ತಾಂ ಮುಸ್ಲಿಂ ಸ್ತ್ರೀಯೆಚೊ ಬುರ್ಕಾ ಘಾಲ್ನ್‍ಯ್ ಭೊಂವೊನ್ಂಚ್ ರಾವ್ತಾಲೊ.  ಹಾಚಿ ಖಬಾರ್ ಮಾತ್ರ್ ಕೊಣಾಕ್‍ಚ್ಚ್ ಮೆಳಾನಾಸ್ತಾನಾ ಗೆಲಿ.

 

 

ಹ್ಯಾಚ್ ವೆಳಾರ್ ಭಾರತಾಂತ್ ಪತ್ರಿಕಾ ಸ್ವಾತಂತ್ರಾಕ್ ಕುರಾಡ್ ಬಸ್ಲಿ.  ಹರ್ ಪತ್ರ್‌ಕರ್ತಾಂನಿ ತಾಂಚಿಂ ಹಾತ್ ಬರ್ಪಾಂ ಪ್ರಕಟ್ ಕರ್ಚ್ಯಾ ಪಯ್ಲೆಂ ಜಿಲ್ಲಾಧಿಕಾರಿಕ್ ದೀವ್ನ್ ಪರ್ವಣ್ಗಿ ಘೆಂವ್ಕ್ ಜಾಯ್ ಮ್ಹಳ್ಳೊ ಸರ್ಕಾರಿ ಆದೇಶ್ ಭಾರತಾದ್ಯಾಂತ್ ಪ್ರಸಾರ್ ಜಾಲೊ. ಜಿಲ್ಲಾಧಿಕಾರಿಚ್ಯಾ ದಫ್ತರಾಂತ್ ಕಠೀಣ್ ಗಡ್ದಿ ಜಾಲಿ.  ವ್ಹಡ್ ವ್ಹಡ್ ದಿಸಾಳಿಂ ತಾಂಚಿಂ ಹಾತ್ ಬರ್ಪಾಂ ದಾಖವ್ನ್ ತುರ್ಥಾನ್ ಭಾಯ್ರ್ ಸರ್ತಾಲಿಂ ತರೀ, ಮ್ಹಜೆ ತಸಲ್ಯಾ ಚಿಲ್ಲರ್ ಪ್ರಕಾಶಕಾಚೆ ಬಾರಾ ಬ್ರೇಸ್ತಾರ್ ತೆರಾ ಸುಕ್ರಾರ್ ಜಾಲೆ.  ಆಜ್ ಯೇ ಫಾಲ್ಯಾಂ ಯೇ ಮ್ಹಣ್ ಪಾಟಿಂ ಪಾಟಿಂ ಘಾಲುನ್ ವೆಳಾರ್ ಪತ್ರಾಂ ಪ್ರಕಟ್ ಕರುಂಕ್ ಅಸಾಧ್ಯ್ ಜಾಲ್ಲ್ಯಾನ್ ಪತ್ರಾಂಚೆ ವಾಚ್ಪಿ ಉಣೆ ಜಾವ್ನ್ಂಚ್ ಆಯ್ಲೆ.  ಭೊರ‍್ಯಾ ವಯ್ರ್ ಭೊರ್ಕುಟಿ ಮ್ಹಳ್ಳ್ಯಾಪರಿಂ ಹ್ಯಾಚ್ ವೆಳಾರ್ ಪತ್ರಾಂ ಛಾಪುಂಕ್ ಸಲೀಸಾಯೇನ್ ಮೆಳ್ಚೆಂ ನ್ಯೂಸ್‍ಪ್ರಿಂಟ್ ಪೇಪರ್ ಪರ್ಯಾಂತ್ ಮೆಳೊಂಕ್ ವಾಂದೆ ಜಾಲೆ.

ಮ್ಹಜಿ ಹೆರ್ ರಾಟಾವಳ್ - ಭಾಶಾ ಮಂಡಳ್ ಕರ್ನಾಟಕ್, ಕೊಂಕ್ಣಿ ನಾಟಕ್ ಸಭಾ, ಕಥೊಲಿಕ್ ಮ್ಹಿನತೆಚೊ ಸಂಘ್ ಬೆಂದುರ್, ದಿಯೆಸೆಜಿಚೆಂ ಕಥೊಲಿಕ್ ಯುವ ಸಂಚಾಲನ್, ನಾಟಕಾಂ, ನಟನ್ ಮುಖಾರುನ್ಂಚ್ ಗೆಲಿ.  ಬಾಯ್ಕಾರ್ ಭೊಂವೊಂಕ್ ಪೆಟ್ರೋಲಾಕ್ ಪಯ್ಶೆ ನಾಸ್‍ಲ್ಲೆ ತರೀ ಮಾಮ್ಮಾನ್ ಮ್ಹಾಕಾ ಖರ್ಚಾಕ್ ಮ್ಹಣ್ ದಿಂವ್ಚೆ ಪಯ್ಶೆ ತೆಣೆ ಪಾಶಾರ್ ಜಾಲೆ.  ಹ್ಯಾ ಸಂಧಿಗ್ದ್ ಪರಿಸ್ಥಿತೆಂಚ್ ವಾಟೆರ್ ತಾನ್ ಲಾಗ್ಲ್ಯಾರೀ ಹಾಂವೆ ಘರಾಚ್ ವಚೊನ್ ಉದಾಕ್ ಪಿಯೆಂವ್ಚೆಂ ಆಸ್‍ಲ್ಲೆಂ.  ಬರೆಂ ಜಾಲೆಂ ಮ್ಹಾಕಾ ಚಲಿಯಾಂಚಿ ಪಿಸಾಯ್, ಧುಂವೊರ್ ಸೊಡ್ಚೆಂ, ಪಿಂತುರಾಂ ಪಳೆಂವ್ಚೆಂ ಆನಿ ಫೊಟುಂಕ್ ವೆಚೆಂ ಮ್ಹಳ್ಳ್ಯೊ ಸವಯೊಚ್ ನಾಸ್‍ಲ್ಲ್ಯೊ ಜಾಲ್ಲ್ಯಾನ್.  ಹ್ಯಾ ಸಂಧಿಗ್ದ್ ಪರಿಸ್ಥಿತೆಂತ್ ಸುದಾಂ ಹಾಂವೆ ಮ್ಹಜೆ ಕಷ್ಟ್ ಕೊಣಾಕ್‍ಚ್ ಸಾಂಗ್ಲೆ ನಾಂತ್.  ತೋಂಡಾರ್ ಸದಾಂ ಹಾಸೊ ದಾಖವ್ನ್ ರಂಗಮಾಂಚಿಯೆರ್ ಪೊಕಾಣಾಂಚಿಂ ಉಡ್ಕಾಣಾಂ ಘಾಲ್ನ್ ಹಾಂವೆ ಮ್ಹಜೆರ್ ಆನಿ ಹೆರಾಂಚೆರ್ ಸಂತೊಸ್ ಹಾಡ್ಲೊ. 

ಆನಿ ಇತ್ಲ್ಯಾರ್ ಮ್ಹಾಕಾ ಫುಡೆಂ ಕಿತೆಂಚ್ ಆರ್ಥಿಕ್ ಕುಮಕ್ ಮೆಳಾನಾ ತೆಂ ಖಾತ್ರಿ ಜಾತಚ್ ಹಾಂವೆ ಕಠೀಣ್ ದುಖಿನ್ ಮ್ಹಜಿಂ ಉರ್ಲೆಲಿಂ ದೋನ್ ಪತ್ರಾಂ - ಮಿತ್ರ್ ಆನಿ ಝೆಲೊ ಬಂಧ್ ಕರಿಜಾಯ್‍ಚ್ ಪಡ್ಲಿಂ.  ಸಭಾರಾಂಚ್ಯಾ ದೊಳ್ಯಾಂನಿ ಹಾಂವ್ ವಾಚ್ಪ್ಯಾಂಚಿ ವರ್ಗಣಿ ಭಿತರ್ ಘಾಲ್ನ್ ಪತ್ರಾಂ ಬಂಧ್ ಕರುನ್ ಬಸ್‍ಲ್ಲೊ ಏಕ್ ಚೋರ್ ಕಸೊ ಜಾಲ್ಲೊಂ.  ತಾಣಿಂ ತಸೆಂ ಚಿಂತ್ಚ್ಯಾಂತ್ ಮ್ಹಾಕಾ ಕಿತೆಂಚ್ ಬೆಜಾರಾಯ್ ನಾಸ್‍ಲ್ಲಿ; ಕಿತ್ಯಾ ತಾಣಿ ಮ್ಹಾಕಾ ವರ್ಗಣಿ ಧಾಡ್‍ಲ್ಲಿ ಆನಿ ಹಾಂವೆ ಮ್ಹಜಿಂ ಪತ್ರಾಂ ಆರ್ಥಿಕ್ ಪರಿಸ್ಥಿತೆಕ್ ಲಾಗೊನ್ ಬಂಧ್ ಕೆಲ್ಲಿಂ.  ಗಾಂವಾರ್, ಬೊಂಬಂಯ್ತ್ ತಸೆಂಚ್ ಗಲ್ಫಾಂತ್ ತರ್ನೊ ಸಂಪಾದಕ್ ಹಂಕಾರಾನ್ ಉಡ್ಲೊ ಆನಿ ಆತಾಂ ಧರ್ಣಿ ಸಮಾನ್ ಜಾಲೊ ಮ್ಹಳ್ಳೆ ವಾರ್ತಾ ಪ್ರಸಾರ್ ಜಾಲೆ.  ಹಾಂವೆ ಮ್ಹಜ್ಯಾ ನಿಮಾಣ್ಯಾ ಸಂಪಾದಕೀಯಾಂತ್ ಸರ್ವಾಂಲಾಗಿಂ ವರ್ಗಣೆ ಬಾಬ್ತಿಂ ಕ್ಷಮಾ ಅಪೇಕ್ಷಿತಾಂ ಮ್ಹಣ್ ಬರಯಿಲ್ಲೆಂ ತರೀ ಥೊಡ್ಯಾಂಕ್ ತೆಂ ಗೀಳುಂಕ್ ತ್ರಾಸ್ ಜಾಲೆ.  ಥೊಡ್ಯಾಂನಿ ಮ್ಹಾಕಾ ಮ್ಹಜೆ ವರ್ಗಣೆಚೆ ಪಯ್ಶೆ ಪಾಟಿಂ ದೀ ಮ್ಹಣ್ ಪತ್ರಾಂ ಮುಖಾಂತ್ರ್ ಬರಯ್ಲೆಂ ತರೀ ಹಾಂವೆ ಪಯ್ಶಾನಿಂಚ್ ಲಾಚಾರ್ ಜಾಲ್ಲ್ಯಾನ್ ಹಾಂವೆ ತಾಂಕಾಂ ಮಾಫ್ ಮಾಗೊನ್ ಪತ್ರಾಂ ಬರಯ್ಲಿಂ. 

ಅಸಲ್ಯಾ ಸಂಧಿಗ್ದ್ ಪರಿಸ್ಥಿತೆಂತ್ ಹಾಂವ್ ಏಕ್ ಬೆಕಾರಿ ಜಾಲೊಂ ತರೀ ಹಾಂವೆ ಮ್ಹಜ್ಯೊ ಹೆರ್ ಕೊಂಕ್ಣಿ ರಾಟಾವಳಿ ರಾವಯ್ಲ್ಯೊನಾಂತ್.  ಕೊಂಕ್ಣಿ ನಾಟಕ್ ಸಭೆಚೆಂ ವಾರ್ಶಿಕ್ ಭಾಷಣ್ ಆನಿ ಗಾಯಾನ್ ಸ್ಪರ್ದೆ ಮ್ಹಜ್ಯಾ ಖಾಂದ್ಯಾರ್ ತಾಚೊ ಕಾರ್ಯದರ್ಶಿ ಜಾವ್ನ್ ಪಡ್ಲೆ.  ತಸೆಂಚ್ ನವಿಚ್ ಸ್ಥಾಪಿತ್ ಜಾಲ್ಲ್ಯಾ ಕೊಂಕ್ಣಿ ಭಾಶಾ ಮಂಡಳಾಚೆಂ ಕಾಮ್ ಇತ್ಯಾದಿ ಮ್ಹಣ್ಟಾನಾ ದೀಸ್ ಆನಿ ರಾತ್ ರಾಟಾವಳ್ ರಾವಾನಾ ಜಾಲಿ.  ತೆಣೆ ದಿಯೆಸೆಜಿಚ್ಯಾ ಕಥೊಲಿಕ್ ಯುವ ಸಂಚಲನಾ ಥಾವ್ನ್ ಆಮಿ ವಾರ್ಶಿಕ್ ’ಯೂತ್ ರ‍್ಯಾಲಿ’ ಮಾಂಡುನ್ ಹಾಡ್ಲಿ.  ಶಿಕ್ಪಾಂತ್, ಖೆಳಾಂತ್, ನಟನಾಂತ್, ರಾಜಕೀಯಾಂತ್ ಮುಖಾರ್ ಯೆಂವ್ಚ್ಯಾ ಮುಖೆಲ್ಯಾಂಕ್ ಸರ್ವಾಂ ಸಮೊರ್ ಹಾಡ್ನ್ ತಾಂಕಾಂ ಮಾನಾಚಿ ಬಸ್ಕಾ ಆನಿ ಯಾದಿಕಾ ದೀವ್ನ್ ಸನ್ಮಾನ್ ಆಮಿ ಕೆಲೊ.  ಕೇಂದ್ರ್ ಕಾರ್ಯಕಾರಿ ಸಮಿತೆಂತ್ಲೆ - ಆಸ್ಟಿನ್ ಡಿ’ಕುಞಾ, ಗೇಬ್ರಿಯಲ್ ವಾಝ್, ಕಾರ್ಮೆಲಿಟಾ ಗೋವಿಯಸ್, ಆಲ್ಬೀನಾ ಸಲ್ಡಾಞಾ ಹಾಂಚೊ ಬರ್ಫೂರ್ ಸಹಕಾರ್ ಆಸ್‍ಲ್ಲ್ಯಾನ್ ಸರ್ವ್ ರಾಟಾವಳಿ ಚಿಂತ್‍ಲ್ಲ್ಯಾಪರಿಂಚ್ ಜಾಹೀರ್ ಜಾಲ್ಯೊ.

 

ಯೂತ್ ರ‍್ಯಾಲಿ - ಬೆಂದುರ್ಚ್ಯಾ ಉಗ್ತ್ಯಾ ಮಯ್ದಾನಾರ್    |      ದೆ.ವಿ.ಜೆ.ಪಿ. ಸಲ್ಡಾನ್ಹಾ ,  ಖಡಾಪ್  - ಮುಕೆಲ್ ಸಯ್ರೊ

ತಸ್ವಿರೆಂತ್ ಆಸಾತ್ ( ದಾವ್ಯಾ ಥಾವ್ನ್ ಉಜ್ವ್ಯಾಕ್ ) : ವರ್ನರ್ ರೆಬೆಲ್ಲೊ, ಓಸ್ಮಂಡ್ ಫೆರ್ನಾಂಡಿಸ್ , ಖಡಾಪ್ , ಗ್ಲೆನ್ ಡಿ’ಕುಞಾ, ಶೋಭಾ ನಝ್ರೆತ್, ಮಾರ್ಜೊರಿ ಆರಾಞಾ, ಡೇಯ್ಜಿ ಮಿನೇಜಸ್

 

ಹಾತಿಂ ಕಾಸ್ ನಾಸ್ತಾಂ ಕಿತ್ಲೆ ದೀಸ್ ಸಾರ್ಚೆ?  ಹಾಂವ್ ಸಭಾರಾಲಾಗಿಂ ಪೊರಾತುನ್ ಕಾಮ್ ಸೊಧುನ್ ರಾವ್ಲೊಂ.  ರಾಕ್ಣೊ ಸಂಪಾದಕ್ ಮಾ| ಮಾರ್ಕ್ ವಾಲ್ಡರಾನ್ ಮ್ಹಾಕಾ ಶೀದಾ ಸಾಂಗ್ಲೆಂ - ತುಂ ಇತ್ಲೊ ಫಾಮಾದ್ ಸಾಯ್ಬಾ, ಹಾಂವೆ ತುಕಾ ಕಾಮ್ ದೀವ್ನ್ ರಾಕ್ಣೊ ದಫ್ತರಾಂತ್ ಕಾಮಾಕ್ ರಾವಯ್ಲೊ ತರ್ ದಫ್ತರಾಕ್ ಯೆಂವ್ಚೆ ಸರ್ವ್ ತುಜ್ಯೆಲಾಗಿಂಚ್ ಉಲಂವ್ಕ್ ರಾವ್ತೆಲೆ ಆನಿ ಮ್ಹಜೆಂ ಕಾಮ್ ಕಿತೆಂಚ್ ಜಾಂವ್ಚ್ಯಾಪರಿಂ ನಾ ಮ್ಹಣ್.

ಹ್ಯಾಚ್ ವೆಳಾರ್ ಮ್ಹಾಕಾ ಏಕಾ ಹಿಂದು ಮಿತ್ರಾನ್, "ತುಕಾ ಏಕ್ ಮೆಡಿಕಲ್ ರೆಪ್ರೆಸೆಂಟೇಟಿವ್ ಜಾವ್ನ್ ಕಾಮ್ ಕರುಂಕ್ ಜಾಯ್ತ್‍ಗಿ?" ಮ್ಹಳ್ಳೆಂ ಸವಾಲ್ ಉಡಯ್ಲೆಂ.  ಹಾಂವೆ ಖಂಡಿತ್ ಜಾವ್ನ್ ಮ್ಹಳ್ಳಿ ಸಯ್ ಘಾಲಿ ಆನಿ ಮುಖಾರ್ ಸರ್ಲೊಂ.  ತ್ಯಾ ವೆಳಾರ್ ಕೇರಳಾ ಥಾವ್ನ್ ಸಾಸ್ಥಾ ಫಾರ್ಮಾ ಮ್ಹಳ್ಳಿ ಏಕ್ ಫಾರ್ಮಾಸ್ಯೂಟಿಕಲ್ ಕಂಪೆನಿ ಥೊಡಿಂ ವಕ್ತಾಂ, ಟಾನಿಕ್ ಆನಿ ಆಂಟಿಬಯೋಟಿಕ್, ದೂಖಿಚೆಂ ವಕಾತ್ ವಿಕುನ್ ಆಸ್‍ಲ್ಲಿ ಆನಿ ತೆಂ ವಿಕ್ರಾಪ್ ಮಂಗ್ಳುರಾಂತ್ ಕರುಂಕ್ ತಾಂಕಾಂ ಏಕ್ ಮೆಡಿಕಲ್ ರೆಪ್ರೆಸೆಂಟೇಟಿವ್ ಜಾಯ್ ಆಸ್‍ಲ್ಲೊ.  ಹಾಂವೆ ಜಾಯ್ತ್ ಮ್ಹಳ್ಳೆಂಚ್ ತಾಣಿ ಮ್ಹಾಕಾ ಏಕಾ ಹಫ್ತ್ಯಾಚಿ ತರ್ಭೆತಿ ದಿಲಿ ಆನಿ ಏಕ್ ಚಾಮ್ಡ್ಯಾಚೆ ಬ್ಯಾಗ್, ವಕ್ತಾಚಿಂ ಸ್ಯಾಂಪಲಾಂ ಆನಿ ಲಿಟ್ರೇಚರ್ ದೀವ್ನ್ ಕಾಮಾಕ್ ಧಾಡ್ಲೊ. 

ಸಭಾರ್ ಮ್ಹಾಕಾ ಪಳೆವ್ನ್ ಹಾಸೊಂಕ್ ಲಾಗ್ಲೆ - ಮುಕೆಲ್  ಜಾವ್ನ್ ಸದಾಂ ಕಾಮ್ ಕರುನ್ ಆಸ್‍ಲ್ಲೆ ಹೆರ್ ಕಂಪೆನಿಚೆ ಮೆಡಿಕಲ್ ರೆಪ್ರೆಸೆಂಟೇಟಿವ್.  ಕಿತ್ಯಾ ಮ್ಹಜೆಲಾಗಿಂ ಬಿಎಸ್ಸಿ ಡಿಗ್ರಿ ನಾತ್‌ಲ್ಲಿ ಆನಿ ತೆನ್ನಾಂ ಬಿಎಸ್ಸಿ ಡಿಗ್ರಿ ಆಸ್‍ಲ್ಲೆ ಮಾತ್ರ್ ಮೆಡಿಕಲ್ ರೆಪ್ರೆಸೆಂಟೇಟಿವ್ಸ್ ಜಾವ್ನ್ ಕಾಮ್ ಕರ್ತಾಲೆ.  ಟಿಪ್ ಟೊಪ್ ನ್ಹೆಸೊನ್, ಗೊಮ್ಟ್ಯಾರ್ ಟಾಯ್ ಗಳವ್ನ್ ಹಾತಿಂ ಚಾಮ್ಡ್ಯಾಚೆಂ ಬ್ಯಾಗ್ ಘೆವ್ನ್ ಹಾಂವೀ ತಾಂಚ್ಯೆ ಬರಾಬರ್ ದಾಕ್ತೆರಾಂಕ್, ಸರ್ಜನಾಂಕ್, ಫಿಝಿಸಿಯನ್ಸಾಂಕ್, ಸೈಕಿಯಾಟ್ರಿಸ್ಟಾಂಕ್, ಡೆಂಟಿಸ್ಟಾಂಕ್, ಗಾಯ್ನೊಕಾಲಜಿಸ್ಟಾಂಕ್, ಫಾರ್ಮೆಸಿಸ್ಟಾಂಕ್ ಮೆಳ್ಳೊಂ, ಮ್ಹಜ್ಯಾ ಕಂಪೆನಿಚ್ಯಾ ವಕ್ತಾಂವಿಶಿಂ ಹಾಂವ್ ತಾಂಚ್ಯೆಲಾಗಿಂ ಉಲಯ್ಲೊಂ ಆನಿ ತಾಣಿ ತಾಂಚ್ಯಾ ಪೇಶಂಟಾಂಕ್ ಮ್ಹಜ್ಯಾ ಕಂಪೆನಿಚಿಂ ವಕ್ತಾಂ ಬರಂವ್ಕ್ ಉಪ್ಕಾರ್ ಮಾಗ್ಲೊ.  ಮ್ಹಜೆಂ ಹಸನ್ಮುಕ್ ಪಳೆವ್ನ್ ಸಭಾರಾಂನಿ ಮ್ಹಾಕಾ ಆಧಾರ್ ದಿಲೊ.  ಮ್ಹಜೊ ಮಿತ್ರ್ ಆರ್ಥರ್ ಡಿ’ಸೋಜಾನ್ ಮ್ಹಾಕಾ ತಾಚ್ಯಾ ಬಾಯ್ಕಾರ್ ಸಾಂಗಾತಾ ವ್ಹರುನ್ ಸಭಾರ್ ದಾಕ್ತೆರಾಂಕ್ ಮೆಳಯ್ಲೊ , ಆಸ್ಪತ್ರೆಂನಿ ವಳಕ್ ಕರುನ್ ದಿಲಿ.   ಏಕಾ ದಿಸಾನ್ ದೋನ್ ತೀನ್ ನಗರಾಂಚಿ ಭೆಟ್ ಕರುನ್ ಸಕಾಳಿಂ ಗೆಲ್ಲೆ ಸಾಂಜೆರ್ ಘರಾ ಪಾವ್ಲ್ಯಾಂವ್.  ಸಭಾರ್ ಪಾವ್ಟಿಂ ತೀನ್ ದಿಸಾಂಚೆಂ ಕಾಮ್ ಏಕಾ ದಿಸಾನ್ ಸಂಪವ್ನ್ ಆಮಿ ವೇಳ್ ಉರಯ್ತೆಲ್ಯಾಂವ್.  ಮ್ಹಜ್ಯಾ ಕಂಪೆನಿಚ್ಯಾ ವಕ್ತಾಂಚೊ ಪ್ರಸಾರ್ ಚಡ್ಟಾನಾ ಮ್ಹಜೊ ಸಾಂಬಾಳ್ ಆನಿ ಬೋನಸ್ ಸಯ್ತ್ ಚಡೊನ್ ಆಯ್ಲೊ.  ಮ್ಹಜ್ಯಾ ಬಾಯ್ಕಾಕ್ ಆತಾಂ ಹಾಂವ್ ಮ್ಹಜ್ಯಾಚ್ ಪಯ್ಶ್ಯಾಂನಿ ಪೆಟ್ರೋಲ್ ಭರಿಲಾಗ್ಲೊಂ ತಸೆಂಚ್ ಎಮ್ ಸಿ ಸಿ  ಬ್ಯಾಂಕಾಚೊ ಲೋನ್‍ಯ್ ಹಾಂವೆ ಪರತ್ ಭರುಂಕ್ ಧರ್ಲೊ. 

ದೀಸ್ ಬರ‍್ಯಾನ್ ಸಾರುನ್ ರಾವ್ಲೆ, ಹಾತಿಂ ಬರೆಚ್ ಪಯ್ಶೆಯ್ ಘುಂವ್ಲೆ ತರೀ ಹಾಂವ್ ಮಾತ್ ತೊಚ್ ಆದ್ಲೊ ಆಸ್ಟಿನ್ ಜಾವ್ನ್ಂಚ್ ಉರ್ಲೊಂ.  ಹಾಂವೆ ಸರ್ವ್ ಆದ್ಲ್ಯೊ ಕೊಂಕ್ಣಿ ರಾಟಾವಳಿ ಮುಖಾರುನ್ ವ್ಹೆಲ್ಯೊ.  ಆತಾಂ ಮ್ಹಜೆಂ ಬಾಯ್ಕ್ ರಸ್ತ್ಯಾಂ ರಸ್ತ್ಯಾಂನಿ ಘುಂವೊನ್ ರಾವ್ಲೆಂ.  ಹಾಂವ್ ಮಾತ್ಸೊ ದರ್ವಡಿ ಜಾಲ್ಲ್ಯಾನ್ ಬಾಯ್ಕ್ ರಭಸಾನ್ ಧಾಂವ್ಡಾಂವ್ಚ್ಯಾಂತ್ ಮಂಗ್ಳುರಾಂತ್ ಫಾಮಾದ್ ಜಾಲೊಂ.  ಸಭಾರ್ ಪಾವ್ಟಿಂ ರಸ್ತ್ಯಾರ್ ಬಾಯ್ಕಾ ಸಮೇತ್ ಪಡ್ಲೊಂ, ರಿಕ್ಷಾಕ್ ಧಾಡಾವ್ನ್ ಉಡ್ಲೊಂ ತರೀ ಹಾತ್ ಪಾಂಯ್ ಮೊಡಿನಾಸ್ತಾಂ ಫಕತ್ ಬಾಯ್ಕ್ ಧಾಡಾವ್ನ್ಂಚ್ ರಾವ್ಲೊಂ.  ಕೆನ್ನಾಂಯ್ ರಸ್ತ್ಯಾರ್ ಬಾಯ್ಕ್ ಎಕ್ಸಿಡೆಂಟ್ ಜಾಲ್ಯಾರ್ ಸರ್ವ್ ಮ್ಹಜ್ಯಾ ಮಿತ್ರಾಂನಿ ’ತೆಂ ಆಸ್ಟಿನಾಚೆಂ ಬಾಯ್ಕ್’ ಮ್ಹಣ್ ಹೆಡಾಂವ್ಚೆಂ ಸದಾಂಚೆಂ ಜಾಲೆಂ.

 

   |  ತೆಂ ಆಸ್ಟಿನಾಚೆಂ  ಬೈಕ್   | 

 

ಬೆಂದುರಾಂತ್ ಆಮ್ಚ್ಯೊ ರಂಗ್‍ಮಂಚ್ ರಾಟಾವಳಿ ವಾಡೊನ್ಂಚ್ ಆಯ್ಲ್ಯೊ.  ಮಹಿನ್ಯಾಕ್ ಏಕ್ ವಿವಿಧ್ ವಿನೋದಾವಳ್ ಆಸಾ ಕರುನ್ ಲೋಕಾಕ್ ಮನೋರಂಜನ್ ದಿಂವ್ಚ್ಯಾಂತ್ ಬೆಂದುರ್ಚ್ಯಾ ಕಥೊಲಿಕ್ ಮ್ಹಿನತೆಚ್ಯಾ ಸಂಘಾಕ್ ಕೋಣ್ಂಚ್ ಮಾರುಂಕ್ ಸಕ್ಲೊನಾ.  ಹೆಣೆಂ ತೆಣೆಂ ಮಿಣ್ಕುಳಿ ಫ್ಯಾನ್ಸಿ ಫೇಟ್ ಆಸಾ ಕರುನ್ ಆಮಿ ಆಮ್ಚ್ಯಾ ಸಂಘಾಚಿ ಆರ್ಥಿಕ್ ವಾಡಾವಳ್‍ಯ್ ದಾಕಯ್ಲಿ.  ತೆನ್ನಾಂ ಬೆಂದುರಾಂತ್ ಏಕ್ ದುಬ್ಳ್ಯಾ ವಿದ್ಯಾರ್ಥಿಂಕ್ ಆದಾರ್ ದೀಂವ್ಕ್ ಶಿಕ್ಪಾ ಫಂಡ್ ಮಾಂಡುನ್ ಹಾಡ್ಚೆಂ ಯೋಜನ್ ಮುಕಾರ್ ಹಾಡ್ಲೆಂ.  ಹಾಕಾ ಹಾಂವೆಂಚ್ ಏಕ್ ನಾಟಕ್ ಬರಂವ್ಕ್ ಜಾಯ್ ಮ್ಹಣ್ ಆಮ್ಚೊ ಬೆಂದುರ್ಚೊ ನಾಟಕಾಂಚೊ ಎಕ್ಸ್‌ಪರ್ಟ್ ಆಲ್ವಿನ್ ಫೆರ್ನಾಂಡಿಸಾನ್ ಮ್ಹಾಕಾ ಪಂಥಾಹ್ವಾನ್ ದಿಲೆಂ.  ಹಾಂವ್ ತ್ಯಾ ದಿಸಾ ಸಾಂಚೆರ್ ಫರಾ ವಚೊನ್ ಏಕ್ ಏಕಾಂಕ್ ನಾಟಕ್ ಬರಂವ್ಕ್ ಬಸ್ಲೊಂ.  ಹಾಂವೆ ಪಯ್ಲೆಂ ಏಕ್ ನಾಂವ್ ದಿಲೆಂ - ’ಆಂಕ್ವಾರ್ ಸೆಲ್ಲಿ’  ಉಪ್ರಾಂತ್ ಸ ಪಾತ್ರ್‌ದಾರ್ ಮಾಂಡುನ್ ಹಾಡ್ಲೆ ಆನಿ ಬರವ್ನ್ಂಚ್ ಗೆಲೊಂ.  ಆಟ್ ವೊರಾಂನಿ ಹಾಂವೆ ಹೆಂ ನಾಟಕ್ ಬರವ್ನ್ ಸಂಪಯ್ಲೆಂ ಆನಿ ದುಸ್ರೆ ದಿಸಾ ಸಾಂಜೆರ್ ಆಲ್ವಿನ್ ಫೆರ್ನಾಂಡಿಸಾಕ್ ಹಸ್ತಾಂತರ್ ಕೆಲೆಂ.  ತಾಣೆಂ ತೆಂ ವಾಚುನ್ ತಾಚಿ ಸಯ್ ದಿಲಿ ಆನಿ ಕಲಾಕಾರಾಂಕ್ ನೆಮ್ಲೆಂ.

ದೋನ್ ವರಾಂಚೆಂ ನಾಟಕ್ ಹೆಂ.  ಮಧೆಂ ಭಿಲ್ಕುಲ್ ಪಡ್ದೊ ಘಾಲುಂಕ್ ನಾಸ್‍ಲ್ಲೊ.  ಸುರು ಜಾಲ್ಲೊ ನಾಟಕ್ ಆಖೇರ್ ಜಾತಾ ಪರ್ಯಾಂತ್ ಏಕ್‍ಚ್ ಪಡ್ದೊ.  ನಾಟಕಾಂತ್ ಉತ್ರಾಂಚೆಂ ಮಾರಾಫಾರ್ ಆನಿ ಆಸಕ್ತೆಚೊ ಗಲಾಟೊಚ್ ಗಲಾಟೊ.  ನಾಟಕ್ ಆಖೇರ್ ಜಾತಾ ಪರ್ಯಾಂತ್ ನಾಟಾಕಾಚಿ ಮಹಾ ಪಾತ್ರ್ ಧಾರಿಣ್ ಸೆಲ್ಲಿ ಭಿಲ್ಕುಲ್ ಮಾಂಚಿಯೆರ್ ಆಯ್ಲಿನಾ.  ಲೋಕಾಚಿ ಆತುರಾಯ್ ಸೆಲ್ಲಿಕ್ ಘೆವ್ನ್ ತಾಂತಾಂಚ್ಯಾ ಘರಾ ಪಾವ್ಲಿ.  ಹ್ಯಾ ನಾಟಕಾಕ್ ನಾಟಕಾಚ್ಯೆ ಸುರ್ವಾತೆಕ್ ಹಾಂವೆಂಚ್ ಘಡ್‍ಲ್ಲಿಂ ಆನಿ ಕದ್ಳೆಚ್ಯಾ ಎಡ್ವಿನ್ ರೊಡ್ರಿಗಸಾನ್ ತಾಳೊ ದೀವ್ನ್ ಎಡ್ವಿನ್ ಆನಿ ವಿಲ್ಫಿ ಪಿಂಟೊನ್ ಸಂಗೀತ್ ಬಸಯಿಲ್ಲಿಂ ಪದಾಂ ಬೆಂದುರ್‌ಗಾರಾಂಚ್ಯಾ ಮಧುರ್ ತಾಳ್ಯಾಂನಿ ಗಾಯ್ಲಿಂ.  ಬೆಂದುರ್ಚಿ ಕೊಗುಳ್ ತೆನ್ನಾಂಚೆ ಆನ್ನಾ ಡಿ’ಸೋಜಾ  ಸರ್ವಾಂಕ್ ಖುಶ್ ಕರುಂಕ್ ಪಾವ್ಲೆಂ.  ಇಜಯ್ಚ್ಯಾ ಚಾರ್ಲಿ ಸಿಕೇರಿನ್ ಮಹಾ ಪಾತ್ರ್ ಘೆವ್ನ್, ವಾಲೆನ್ಸಿಯಾಚ್ಯಾ ಡೊಲ್ಫಿ ಸಲ್ಡಾಞಾನ್ ತಾಕಾ ಆಧಾರ್ ದೀವ್ನ್ ನಾಟಕ್ ಯಶಸ್ವೇನ್ ಖೆಳವ್ನ್ ದಾಖಯ್ಲೊ ತಸೆಂಚ್ ಹ್ಯಾ ನಾಟಕಾ ಮುಖಾಂತ್ರ್ ಆಮಿ ಇಸ್ತಿಹಾರಾಂ ಜಮವ್ನ್ ಸಾಡೆ ಚೊವ್ದಾ ಹಜಾರ್ ನಫೊ ಹಾಡ್ಲೊ.  

ಮ್ಹಜಿಂ ಪತ್ರಾಂ ಮರೊನ್ ಏಕ್ ವರಸ್ ಸಂಪ್‍ಲ್ಲೆಂ.  ತರೀ ಹಾಂವೆ ಮ್ಹಜಿಂ ಹೆರ್ ಕೊಂಕ್ಣಿ ಕಾಮಾಂ ಖಳಾನಾಸ್ತಾಂ ಮುಖಾರಿಲ್ಲ್ಯಾನ್ ಮ್ಹಜೆಂ ನಾಂವ್ ಕೊಂಕ್ಣಿ ವರ್ತುಲಾಂತ್ ಸದಾಂಚೆಂ ಜಾಲ್ಲೆಂ.  ಅಸೆಂ ಬರಯ್ತಾನಾ ಮ್ಹಾಕಾ ಏಕ್ ಉಗ್ಡಾಸ್ ಯೆತಾ.  ತ್ಯಾ ದಿಸಾ ಆಮಿ ಕೊಂಕ್ಣಿ ಭಾಶಾ ಮಂಡಳಾಚ್ಯಾ ಕಾರ್ಯಕ್ರಮಾಕ್ ಡೊನ್ ಬೊಸ್ಕೊ ಹೊಲಾಂತ್ ಆಸ್‍ಲ್ಲ್ಯಾಂವ್.  ಕಾರ್ಯೆಂ ಸಂಪ್ತಚ್ ಥೊಡೆ ಲೇಖಕ್-ನಾಟಕಿಸ್ತ್ ಭಾಯ್ರ್ ಉಲವ್ನ್ ಆಸ್‍ಲ್ಲೆ.  ಹಾಂವ್ ತೆನ್ನಾಂ ಮ್ಹಜಿ ಮಾಂಚ್ಯೆವಯ್ಲಿ ಜವಾಬ್ದಾರಿ ಸಂಪವ್ನ್ ತ್ಯಾ ಪಂಗ್ಡಾ ಮಧೆಂ ಘುಸ್ಲೊಂ.  ಡೊಲ್ಫಿ ಲೋಬೊ ಕಾಸ್ಸಿಯಾ ತ್ಯಾ ಪಂಗ್ಡಾಲಾಗಿಂ ಕಿತೆಂಗೀ ಉಲವ್ನ್ ಆಸ್‍ಲ್ಲೊ ಏಕಾಚ್ಛಾಣೆ  ಮ್ಹಣಾಲಾಗ್ಲೊ, "ನಾ ಸಾಯ್ಬಾ, ಆಸ್ಟಿನ್ ಜೀವ್ ಆಸ್ತಾ ಪರ್ಯಾಂತ್ ಮಂಗ್ಳುರಾಂತ್ ಖಂಚ್ಯಾಯ್ ಕೊಂಕ್ಣಿ ಸಂಘಾಚೊ ಕಾರ್ಯದರ್ಶಿ ಜಾಂವ್ಕ್ ಹೆರಾಂಕ್ ಭಿಲ್ಕುಲ್ ಅವ್ಕಾಸ್ ನಾ..."

 

ಮುಕಾರ್ತಾ . . .

 

ಆಸ್ಟಿನ್ ಅಂಕಣ್ : ಆದ್ಲೆ ಗಾಂಚ್

 

♦  ತೀನ್ ಪತ್ರಾಂಚಿ ಖುರ್ಸಾ ವಾಟ್ !

♦   ನಂತೂರ್ ದೊಂಗ್ರಾವಯ್ಲೊ ಪ್ರಸಂಗ್

♦  ಪತ್ರಾಂ ಆನಿ ಸಂಘಟನಾಂ

♦  ತೀನ್ ಪತ್ರಾಂಚೊ ಸಂಪಾದಕ್

♦  ದರ್ಜಿ ಜಾಂವ್ಚೊಂ ಸಂಪಾದಕ್ ಜಾಲೊಂ.

♦   ಹಾಂವ್ ಸಾಲ್ವಾರ್ ಜಾಲೊಂ ನಾ!

♦  ಬೊಂಬಯ್ಚಿ ಬಹಾದುರಿ

♦  ಇಗರ್ಜೆ ಭಿತರ್ಲಿ ಕುಸಡಾಯ್

♦  ತ್ಯಾಗಿ ಮುರ್ದಾಬಾದ್