ಖಂಯ್ ಗೆಲ್ಯಾಂತ್ ಕ್ಲಾಸ್‌ಮೆಟಾಂ...?

ಕೊಂಕ್ಣೆಂತ್ ಹಾಸೊ ಮ್ಹಳ್ಯಾರ್ ಫಕತ್ ಮೀಸ್-ಮಾಸ್, ಆಲ್ಲಿ-ಜಿಲ್ಲಿ ಮ್ಹಣ್ ಉತ್ರಾಂಚೊ ಖೆಳ್ ಆನಿ ಪ್ರಾಸಾಚಿ ಖಾತಡ್ ಜಾವ್ನ್ ಗೆಲ್ಲ್ಯಾ ಕಾಳಾರ್ ಅಪ್ರೂಪ್ ತರೀ ಅಸಲಿಂ ಜಿವ್ಸಾಣೆಚಿಂ ಬರ್ಪಾಂ ಯೆತಾತ್ ಆನಿ ವಾಚುನ್ ಕಾಡ್ಟಾನಾ, ಕಾಲ್‌ಚ್ ಚೆಡುಂ ಆಸಲ್ಲೆಂ ಚಲಿ ಜಾವ್ನ್ ಆತ್ತಾಂಚ್ಯಾ ಆತ್ತಾಂ ಗುಲೊಬಿ ಪಾಕ್ಳ್ಯಾಂನಿ ನ್ಹಾಣ್ ಮುಗ್ದುನ್ ಆಯಿಲ್ಲ್ಯಾ ರಾಯ್‌ ಕುಂವರ್ನಿಚ್ಯಾ ಆಂಗಾಥಾವ್ನ್ ವ್ಹಾಳೊನ್ ಯೆಂವ್ಚ್ಯಾ ಪರ್ಮಳಾಪರಿಂ ಆತ್ಮ್ಯಾಕ್ ಅಮಾಲಾನ್ ಭರ್ತಾತ್. ಆನಿ ಹೆಂ ಬರಪ್ ಬರಯಿಲ್ಲೊ ಕೋಣ್ ಫುಗೆಟ್ಯಾಂಚೊ ರಾಯ್ ನ್ಹಯ್, ಫೊಕಣಾಂಚೊ ಚಕ್ರವರ್ತಿಯಿ ನ್ಹಯ್. ಥಳಾ ಹಂತಾರ್ ಕೊಂಕ್ಣೆಚೆಂ ಕಾಮ್ ಕರ್ಚೊ ಏಕ್ ನಿಶ್ಟೆಚೊ ಕೊಂಕ್ಣಿ ವಾವ್ರಾಡಿ. ವಿತೊರಿನ್ ಹಾಚೆ ಆದಿಂಯಿ ಅಸಲಿಂ ದೋನ್ ಬರ್ಪಾಂ ಬರಯಿಲ್ಲಿಂ, ಏಕ್ ರಾಕ್ಣೊಚ್ಯಾ ಭುರ್ಗ್ಯಾಂಚ್ಯಾ ಅಂಕ್ಯಾರ್, ಆನ್ಯೇಕ್ ಆಮ್ಚೊ ಸಂದೇಶ್ ಪತ್ರಾರ್. ಪಯ್ಲೆಂ ತಾಚಿ ತೀನ್ ವರ್ಸಾಂಚಿ ಧುವ್ ದೊಂಬಿಲಿ (ಸೃಜನಾ) ವಿಶ್ಯಾಂತ್, ಆನ್ಯೇಕ್ ನೊವೊದ್ ವರ್ಸಾಂಚ್ಯಾ ವ್ಹಡ್ಲಿ ಮಾಂಯ್ ವಿಶ್ಯಾಂತ್. ಆತಾಂ ಹೆಂ ಕ್ಲಾಸ್‌ಮೇಟಾಂ ವಿಶ್ಯಾಂತ್ ಬರಯ್ಲಾಂ. ಆಜ್ ಬುಳ್ಬುಳೆ ಉಟ್ಲೆ ಮ್ಹಣ್ಟಾನಾ ಸುನಾಮಿ ಆಯ್ಲಿ ಮ್ಹಣ್, ಪುಗೆಟ್ಯೊ ಫುಟ್ತಾನಾ ಬೊಂಬ್ ಫುಟ್ಲೊ ಮ್ಹಣ್ ಆಕಾಂತ್ ಉಬ್ಜೊಂಚ್ಯಾ ಕಾಳಾರ್ ಹೆಂ ಬರಪ್ ಖಂಡಿತ್‌ಯಿ ಥಂಡಾಯ್ ದಿತೆಲೆಂ.  

ಹಿ ಸಾದಿ ಗಜಾಲ್ ಪೋರ್ ಮ್ಹಾಕಾ ಅಚಾನಕ್ ಉಡಾಸ್ ಆಯ್ಲಿ.ವ್ಹಯ್ ಹಿಂ ಕ್ಲಾಸ್‌ಮೆಟಾಂ ಖಂಯ್ ಗೆಲ್ಯಾಂಯ್? ಆಜ್ ಪಾಂತ್ತಿಸಾಂಚ್ಯಾ ಪ್ರಾಯೆರ್ ರಾವೊನ್ ಪಾಟಿಂ ಪಳೆತಾನಾ ಮಸ್ಕ್ ಮಸ್ಕ್ ದಿಸ್ತಾ. ದೊಳ್ಯಾ ದಿಷ್ಟಿಚೆ ಸಮಸ್ಸೆ ಮ್ಹಣ್ ಚಿಂತಿನಾಕಾತ್. ಉಡಾಸಾ ಖಣಾಂನಿ ಕಾಳಾಚಿ ಘಯ್ರಾಮ್ ಮಾಂಡ್ಲ್ಯಾ. ಕ್ಲಾಸ್‌ಮೆಟಾಂಚಿ ಮೆಟಾಂಚ್ ದಿಶ್ಟಿಕ್ ಪಡನಾಂತ್.

ಮ್ಹಜೆಂ ಶಿಕಪ್ ಸ ಶಾಳಾ- ಕೊಲೆಜಿಂನಿ ಜಾಲ್ಲೆಂ. ಶ್ರೀ ದುರ್ಗಾ ಹಿರಿಯ ಪ್ರಾಥಮಿಕ ಶಾಲೆ ಜೋಡುರಸ್ತೆ, ಕ್ರೈಸ್ಟ್ ಕಿಂಗ್ ಹಿರಿಯ ಪ್ರಾಥಮಿಕ ಶಾಲೆ ಕಾರ್ಕಳ್, ಸೈಂಟ್ ಲಾರೆನ್ಸ್ ಹೈಸ್ಕೂಲ್ ಅತ್ತೂರ್, ಶ್ರೀ ಭುವನೇಂದ್ರ ಕಾಲೇಜು ಕಾರ್ಕಳ, ಕೊಂಕಣಿ ಸಂಸ್ಥೊ, ಸಾಂ ಲುವಿಸ್ ಕೊಲೆಜ್ ಮಂಗ್ಳುರ್ ಆನಿ ಕನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾಲಯ. ಹಾಂತುಂ ನಿಮಾಣಿ ದೋನ್ ಕರೆಸ್ಪಾಂಡೆಂಟ್ ಶಿಕ್ಪಾಚಿ ಜಾಲ್ಲ್ಯಾನ್ ಆಮ್ಚೆ ಸಾಂಗಾತಾ ಕೋಣ್ ಶಿಕ್ತಾತ್ ಮ್ಹಳ್ಳೆಂ ಆಮ್ಕಾಂಯ್ ಕಳಿತ್ ಆಸಾನಾ. ಜರ್ ಕಳಿತ್ ಆಸ್ಲ್ಯಾರೀ ಹೊ ಬಾಂದ್ ತಿತ್ಲ್ಯಾ ಜೊಗಾಸಾಣೆಚೊ ನೈಂ, ಮಯ್ಪಾಸಾಚೊ ನೈಂ, ಕಾಂಯ್ ‘ಮೊಗಾಚೊ’ ಜಾಯ್ತ್.

ಹಾಂವ್ ಲ್ಹಾನ್ ಆಸ್ತಾನಾ ಅಂಗನವಾಡಿ, ಬಾಲವಾಡಿ, ಎಲ್‌ಕೆಜಿ, ಯುಕೆಜಿಚೆ ಉಪಾದ್ರ್  ನಾತ್‌ಲ್ಲೆ. ಪಾಂಚ್ ವರ್ಸಾಂ ಪರ್ಯಾಂತ್ ಬಿಂದಾಸ್  ಮಸ್ತ್ಯೊ ಕುಸ್ತ್ಯೊ ಕರ್. ಇಂಗ್ಲಿಷ್ ಮಿಡಿಯಮಾಚಿಯ್ ಧೊಸ್ ನಾತ್‌ಲ್ಲಿ. ಆಮ್ಚೆ ತೆಣೆಂ ಆಸ್‌ಲ್ಲಿಂ ದೋನ್ ವಿಭಾಗಾಚಿಂ ಇಸ್ಕೊಲಾಂ ಮಾತ್ರ್. ಸರ್ಕಾರಿ ಆನಿ ಖಾಸಗಿ ಪೂಣ್ ಅನುದಾನಿತ. ಅನುದಾನಿತ ಆಸ್‌ಲ್ಲೆಕಡೆ ಆಮ್ಕಾಂ ಕಿರಿಸ್ತಾಂವಾಂಕ್ ಸರ್ಕಾರಿ ಇಸ್ಕೊಲಾಂ ವರ್ಗಾನಾತ್‌ಲ್ಲಿಂ. ಸರ್ಕಾರಿ ಮ್ಹಳ್ಯಾರ್ ಥಂಯ್ ಶಿಕೊಂವ್ಚೆಂ ಸೊಡ್ನ್ ಹೆರ್ ಸರ್ವ್ ಕಾಮಾಂ ಕರ್ತಾತ್. ಭುರ್ಗಿಂ ಪಾಡ್ ಜಾತಾತ್ ಮ್ಹಳ್ಳೆಂ ಚಿಂತಾಪ್ ಆಮ್ಚ್ಯಾ ಕಿರಿಸ್ತಾಂವ್ ಬಾಯಾಮ್ಮಾಂಚೆಂ. ಕಿರಿಸ್ತಾಂವಾಂಚೆಂ ಪಯ್ಲೆಂ ಚೋಯ್ಸ್ ಇಗರ್ಜೆ ಇಸ್ಕೊಲ್. ಥಂಯ್ ದೊತೊರ್ನ್ ಮೆಳ್ತಾ, ಬರೆಂ ಶಿಕಪ್ ಮೆಳ್ತಾ ಮ್ಹಳ್ಳೆಂ ಚಿಂತಪ್ ಸಾರ್ವತ್ರಿಕ್ ಆಸ್‌ಲ್ಲೆಂ. ಪೂಣ್ ಆಮ್ಚ್ಯಾ ಭೊಂವಾರಾಂತ್ ಇಗರ್ಜ್ ಆನಿ ಇಗರ್ಜೆಚೆಂ ಇಸ್ಕೊಲ್ ಪಯ್ಸ್ ಆಸ್‌ಲ್ಲ್ಯಾನ್ ಹಾಂವೆಂ ಆನಿ ವ್ಹಡ್ಲೊ ಭಾವ್ ಜೋಯ್ನ್ ಹಿಂದೂ ಇಸ್ಕೊಲಾಕ್ ವಚಾಜೆ ಪಡ್ಲೆಂ ಮ್ಹಣ್ ಮ್ಹಜ್ಯಾ ಆಬಾಕ್ ಆಮ್ಚ್ಯಾ ಆತ್ಮ್ಯಾಚಿ ಖಂತ್- ದೊತೊರ್ನ್ ಮೆಳ್ನಾನೇ ಮ್ಹಣ್.

ಪೂಣ್ ಆಮ್ಕಾಂ ಇಸ್ಕೊಲ್ ಭಾರಿಚ್ ಲಾಗಿಂ ಆಸ್‌ಲ್ಲೆಂ. ಭಾವ್ ತಿಸ್ರೆಂತ್ ಆಸ್ತಾನಾ ಮ್ಹಾಕಾ ಪಯ್ಲೆಕ್ ಘಾಲೆಂ. ಸುರ್ವಿಲೆ ದೋನ್ ತೀನ್ ದೀಸ್ ರಡ್ಚೆಂ, ವ್ಹಚಾನಾ ಮ್ಹಣ್ಚೆಂ, ಮಾಮ್ಮಿನ್ ಮಂಗಟಾಂವ್ಚೆಂ, ಮಾರ್ಚೆಂ ಪೂರಾ ಜಾಲೆಂ. ಮಾಗಿರ್ ಇಸ್ಕೊಲ್ ಬರೆಂ ಲಾಗೊಂಕ್ ಸುರು ಜಾಲೆಂ. ಏಕ್ ಸಾಂಗ್ಣಿ ಆಸಾ ಆಮ್ಕಾಂ ಆವಯ್, ಬಾಪುಯ್, ಭಾಂವ್ಡಾಂ, ಧರ್ಮ್, ದೇವ್ ಸಗ್ಳೆಂ ಆಮ್ಚ್ಯಾ ಖುಶೆ ಪರ್ಮಾಣೆಂ ವಿಂಚುಂಕ್ ಜಾಯ್ನಾಂ. ಇಷ್ಟಾಂಕ್ ಮಾತ್ರ್ ವಿಂಚ್ಯೆತಾ. ಆನಿ ಇಷ್ಟಾಗತೆಚಿ ಸುರ್ವಾತ್ ಜಾಂವ್ಚಿಚ್ ಪ್ರೈಮರಿಂತ್. ತವಳ್‌ಚ್ ತ್ಯಾ ಪಾಂಚಾಂಚ್ಯಾ ಪಿರಾಯೆರ್‌ಯಿ ಥೊಡಿಂ ಪಳೆಯಿಲ್ಲೆಂಚ್ ಲಾಗಿಂ ಜಾತಾತ್, ಶೀದಾ ಯೇವ್ನ್ ಕಾಳ್ಜಾಂತ್ ಬಸ್ತಾತ್. ಆನಿ ಥೊಡಿಂ ಕಾರಣಾವಿಣೆಂ ಬರಿಂ ಲಾಗಾನಾಂತ್. ತಿ ಪಯ್ಸ್‌ಚ್ ಉರ್ತಾತ್. ಅಶೆಂ ಲಾಗಿಂ ಜಾಲ್ಲ್ಯಾಂಪಯ್ಕಿಂ ಶರೀಫ್, ನಾರಾಯಣ, ಸುರೇಶ, ರಝಾಕ್, ಮನೋಜ್, ಸಂತೋಶ್, ಪೂರ್ಣಿಮಾ, ವಿನಯಾ, ಮಂಜುಳಾ, ಅಂಜು, ಇಸ್ಮಾಯಿಲ್, ಕಿಶೋರ್, ಆಬಿದ್ ಆನಿ ಥೊಡಿಂ...

ಥೊಡ್ಯಾಚ್ ತೇಂಪಾನ್ ಆಮ್ಚೆಂ ಏಕ್ ಗ್ಯಾಂಗ್ ಜಾಲೆಂ. ಇಸ್ಕೊಲಾಥಾವ್ನ್ ವೆಳಾರ್ ಪಾಟಿಂ ಘರಾ ಆಯಿಲ್ಲೊ ದಾಕ್ಲೊ ನಾ. ಪಾವ್ಸಾಂತ್ ಭಿಜೊನ್, ಮಾರ್ಗಾ ದೆಗೆಚ್ಯಾ ಮೊರಿಯೆರ್ ರಾವೊನ್ ಸತ್ರೆಂತ್ ಮಾಸ್ಳಿ ಧರ‍್ನ್ ತಿ ತೊಟ್ಟ್ಯಾಂತ್ ಭರ್ನ್ ಹಾಡ್ನ್ ಬಾಂಯ್ತ್ ಗಾಲ್ನ್, ಪಾವ್ಸಾ ಉದ್ಕಾಂತ್ ಖೆಳ್ತಾನಾ ಟಿಚೆರಾಂನಿ, ಮಾಮ್ಮಿನ್ ಜೋರ್ ಕರ್ನ್, ಟಿಚೆರಾಂಕ್ ಮನಾಂತ್, ಮಾಮ್ಮಿಕ್ ಮುಕಾರ್ ಪುರ್ಪುರೊನ್, ತಿಣೆಂ ಬೆಲ್ಟ್ ಘೆವ್ನ್ ಮಾರುಂಕ್ ಯೆತಾನಾ ಘರಾ ಮುಕ್ಲ್ಯಾ ಬಿಂಡಾ ರುಕಾರ್ ಚಡೊನ್, ತಿಣೆ ಪುರ್ಪುರೊನ್.... ಆತಾಂ ಬಿಂಡಾಂಚೊ ರೂಕ್‌ಯಿ ನಾ. ಮಾರ್ಗಾದೆಗೆರ್ ಮೊರಿ ಆಸಾ ತರೀ ತಾಂತ್ಲ್ಯಾನ್ ಉದಾಕ್ ವ್ಹಚಾನಾ ಮಾತಿ ಭರ್ಲ್ಯಾ. ಪೂಣ್ ಹೆ ಉಡಾಸ್ ಆನಿ ಸತ್ರೆಂತ್ ಮಾಸ್ಳಿ ಧರ್‌ಲ್ಲೆ ಇಶ್ಟ್ ಯಾದಿಂನಿ ಆಸಾತ್. ಗೌರಿ ಟಿಚೆರ್, ಯಮುನಾ ಟಿಚೆರ್, ನವೀನ ಟಿಚೆರ್, ರವೀಂದ್ರ ಮಾಸ್ಟೆರ್ ಆನಿ ಜಗದೀಶ್ ಮಾಸ್ಟೆರ್ ಜೆ ಪಯ್ಲಿ ಥಾವ್ನ್ ಪಾಂಚ್ವಿ ಪರ್ಯಾಂತ್ ಶಿಕಯಿಲ್ಲಿಂ ಟಿಚೆರಾಂ ಉಡಾಸಾಂನಿ ಆಸಾತ್.

ಅಖೆರಿಕ್ ತರೀ ಮ್ಹಜ್ಯಾ ಆಬಾಚೆಂ ದೊತೊರ್ನಿಚೆಂ ಸ್ವಪಣ್ ಜಾರಿ ಜಾಲೆಂ. ಹಾಂವೆಂ ಸವಿ ಸಾತ್ವಿ ದೋನ್ ಮಯ್ಲಾಂ ಪಯ್ಶಿಲ್ಯಾ ಇಗರ್ಜೆ ಇಸ್ಕೊಲಾಂತ್ ಸಂಪಯ್ಜೆ ಪಡ್ಲಿ. ಆಬಾಚ್ಯಾ ಚಿಂತ್ಪಾಕ್ ಜೊಕ್ತೊ ಮಾ. ಫ್ರ್ರೆಡ್ ಮೊನಿಸ್ ಆಮ್ಕಾಂ ವಿಗಾರ್ ಜಾವ್ನ್ ಆಯ್ಲೊ. ತಾಣೆಂ ಹೆರ್ ಇಸ್ಕೊಲಾಂಕ್ ವೆಚ್ಯಾ ಭುರ್ಗ್ಯಾಂಕ್ ವಿಂಚುನ್ ವಿಂಚುನ್ ಮ್ಹಳ್ಳೆಪರಿಂ ಕ್ರೀಸ್ತ್ ರಾಯ್ ಇಸ್ಕೊಲಾಕ್ ಭರ್ತಿ ಕೆಲೆಂ. ಭುರ್ಗ್ಯಾಂಚ್ಯಾ ಶಿಕ್ಪಾಸವೆಂ ತಾಂಚ್ಯಾ ಪೊಟಾಚಿ ಖಂತ್‌ಯಿ ತಾಕಾ ಆಸ್‌ಲ್ಲಿ. ಆಜ್ ಕಿತೆಂ ಆಮಿ ಬಿಸಿಯೂಟ ಮ್ಹಣ್ತಾಂವ್, ಸರ್ಕಾರ್ ಆಪ್ಣಾಚಿ ಪಾಟ್ ಆಪುಣ್ಂಚ್ ಥಾಪುಡ್ತಾ ತಿ ಗಜಾಲ್, ತಾಣೆಂ 1986-88 ಇಸ್ವೆಂತ್ ಆಮ್ಚ್ಯಾ ಗಾಂವಾಂತ್ ಸುರ್ವಾತಿಲ್ಲಿ. ಪಾವ್ಸಾಂತ್ಲೆ 4 ಮ್ಹಯ್ನೆ ಪಯ್ಶಿಲ್ಯಾ ಸರ್ವ್ ಭುರ್ಗ್ಯಾಂಕ್ ದೊನ್ಪಾರಾಂಚೆಂ ಜೆವಣ್ ಪುಂಕ್ಯಾಕ್. ಬಿಸಿಯೂಟ ಸವೆಂ ಹಾಂಗಾ ಮ್ಹಾಕಾ ಸಬಾರ್ ನವೆ ಇಶ್ಟ್ ಇಶ್ಟಿಣ್ಯೊ ಮೆಳ್ಳಿಂ. ಪ್ರವೀಣ್, ಡೊಲ್ಫಿ, ಡೊನಾಲ್ಡ್, ಬಬಿತಾ, ಜೊಸ್ಲಿನ್, ಜ್ಯೋತಿ, ಸರ್ವರಿ, ಜ್ಯೋತಿ, ವಿಲ್ಮಾ, ದೀಪಕ್, ದಿವ್ಯಾ, ವಿಶ್ವನಾಥ, ನೆಲ್ಸನ್, ಮೈಕಲ್ ಆನಿ ಹೆರಾಂ...

ಸವೆಂತ್ ಲೂಸಿ ಟಿಚೆರ್ ಆನಿ ಸಾತ್ವೆಂತ್ ಸಿಸ್ಟರ್ ಆಗ್ನೆಸ್ ಮೇರಿ. ಹಾಂಚ್ಯಾ ಕಾಳಾರ್ ಪೊಕ್ರಿಪಣಾಂ ಉಣಿಂ ಜಾವ್ನ್ ಶಿಕ್ಪಾಂತ್ ಧ್ಯಾನ್ ಚಡ್ಲೆಂ. ಇಗರ್ಜೆ ಇಸ್ಕೊಲ್ ಜಾಲ್ಲ್ಯಾನ್ ಬರೆಂ ಶಿಕೊನ್ ಪಾದ್ರಿ ಜಾಯ್ಜೆ ಅಶೆಂ ಘರಾಂತ್, ಶಾಳಾಂತ್ ಆನಿ ಇಗರ್ಜೆಂತ್ ಒತ್ತಾಯ್ ಆಸ್‌ಲ್ಲಿ. ಆಮಿ ಸ ಜಣಾಂ ಭುರ್ಗಿಂ ಜಾಲ್ಲ್ಯಾನ್, ಆಬ್ ಇಲ್ಲೊ ದೆವೊತ್ ಜಾಲ್ಲ್ಯಾನ್ ಹಾಂವೆಂ ವಾ ಭಾವಾನ್ ಪಾದ್ರಿಪಣಾಕ್ ವ್ಹಚಾಜೆ ಮ್ಹಳ್ಳಿ ತಾಚಿ ಆಶಾ. ತಾಚ್ಯಾ ಆಶೆಕ್ ಫಾದರ್ ಮೊನಿಸಾನ್‌ಯಿ ಬರೆಂ ಉದಕ್ ವೊತ್ಲೆಂ. ಜಾಳ್ ಘೆವ್ನ್ ವಿವಿಧ್ ಮೆಳಾಚೆ ಪಾಗಿ ಇಗರ್ಜೆ ಇಸ್ಕೊಲಾಂಕ್ ಭೆಟ್ ದಿತಾಲೆ. ರಜೆರ್ ಆಮಿಂಯ್ ಶಿಬಿರಾಂಕ್ ವೆತೆಲ್ಯಾಂವ್. ದೋನ್ ತೀನ್ ದೀಸ್ ಬರಿಂ ಬರಿಂ ಮಾಸಾ ಪಕ್ವನಾಂ, ಖೆಳ್, ಖುಶಾಲಾಯ್, ಗಮ್ಮತ್. ಅಖೆರಿಕ್ ಖಂಯ್ಚ್ಯಾ ಮೆಳಾಕ್ ಭರ್ತಿ ಜಾಂವ್ಚೆಂ ಮ್ಹಳ್ಳೆಂ ಕನ್‌ಪ್ಯೂಶನ್.  ಶಾಳಾಂತ್ ಇಶ್ಟಾಂಮಧೆಂ ಖಂಚೊ ಮೇಳ್ ಬರೊ ಮ್ಹಳ್ಳೆವಿಶಿಂ ಚರ್ಚಾ. ಖಂಯ್ಚ್ಯಾ ಮೆಳಾಕ್ ಸೆರ್ವಲ್ಯಾರ್ ಬರೆಂ ಮ್ಹಣ್ ಆಮ್ಚಿಂಚ್ ಥೊಡಿಂ ಲೆಕಾಂ.

ಇತ್ಲೆಂ ಸರ್ವ್ ಆಸೊನ್‌ಯಿ ಆಮಿ ದೋಗಿ ಆಬಾಚಿ ಆಶಾ ಸಂಪೂರ್ಣ್ ಕರುಂಕ್ ಸಕೊಂಕ್ ನಾಂವ್. ಆಮಿ ದೋಗಿ ಸೆಮಿನರಿಚ್ಯಾ ದಾರಾ ಪರ್ಯಾಂತ್ ವ್ಹಚುನ್ ಪಾಟಿಂ ಆಯ್ಲ್ಯಾಂವ್. ಆಬಾಚೊ ಪೂತ್ ಮ್ಹಜೊ ಬಾಪ್ಪು ಥೊಡಿಂ ವರ್ಸಾಂ ಸೆಮಿನರಿಂತ್ ಖರ್ಚುನ್ ಪಾಟಿಂ ಆಯಿಲ್ಲೊ. ಆಜ್ ತೊ ಐ‌ಎ‌ಎಸ್ ವರ್ಗಾಚೊ ಒಫಿಸರ್. ಪೂಣ್ ಮ್ಹಜೊ ನಿಮಾಣೊ ಭಾವ್ ರಾಕೇಶ್ ಆಬಾಚಿ ಹಿ ಆಶಾ ಸಂಪೂರ್ಣ್ ಕರ್ಚ್ಯಾ ಮಿಸಾಂವಾರ್ ಪಡ್ಲಾ. ಆಬಾನ್ ತಾಕಾ ವತ್ತಾಯ್ ಕೆಲ್ಲಿ ವಾ ನಾ ಮ್ಹಾಕಾ ಗೊತ್ತು ನಾ ಕಿತ್ಯಾಕ್ ಆಬ್ ಸರ್ತಾನಾ ತಾಕಾ ಚಾರ್ ವರ್ಸಾಂಚಿ ಪಿರಾಯ್ ಆನಿ ದೊನ್ ವರ್ಸಾಂನಿ ತಾಚ್ಯಾ ಆಂಗಾರ್ ಲೋಬ್ ಯೆತಾ, ಆಬಾಕ್ ಖುಶಿ ಜಾತಾ. ತಶೆಂ ಆಬಾಚ್ಯಾ ಅತ್ಮ್ಯಾಕ್ ಅಕಯ್ಚ್ಯೊ ಧುವೊ ಸಿ. ಮೊನಿಕಾ ಆನಿ ಸಿ. ಜೆನೆಟಾನ್ ಎದೊಳ್‌ಚ್ ಖುಶಿ ಕೆಲಾಂ. ಪೂಣ್ ಆಬಾಚ್ಯಾ ಲೆಕಾರ್ ಪಾದ್ರಿ ತೊ ಪಾದ್ರಿಚ್ ಆನಿ ಹೆಂ ಛಾನ್ಸ್ ಮ್ಹಜ್ಯಾ ಭಾವಾಚೆಂ. ಮ್ಹಜ್ಯಾ ಕ್ಲಾಸ್‌ಮೆಟಾಂಪಯ್ಕಿಂ ನಕ್ರೆಚ್ಯಾ ಜೆರಾಲ್ಡ್ ಆನಿ ವಲ್ಲಿನ್ ಲೋಬ್ ಘೆತ್ಲಾ. ಹೆರ್ ಕೋಣಿ ಮ್ಹಜ್ಯಾ ಉಡಾಸಾಂತ್ ನಾಂತ್.

ಹಾಂವೆಂ ಅತ್ತೂರಾಂತ್ ಹೈಸ್ಕೂಲ್ ಸಂಪಯ್ಲೆಂ. ಆಟ್ವೆಂತ್ಲೆ ಕ್ಲಾಸ್‌ಮೇಟ್ಸ್ ಧಾವೆ ಪರ್ಯಾಂತ್ ಸಾಂಗಾತಾ ಆಯ್ಲೆ. ದಿನೇಶ, ಸುರೇಶ, ಜೆಸಿಂತಾ, ವಿನ್ಸಿ, ವೀರೇಂದ್ರ, ಸೋಮಶೇಖರ, ಪ್ರಶಾಂತ್, ಸವಿತಾ, ನೆವಿಲ್ ಆನಿ ಹೆರಾಂ...

ಮ್ಹಜೆಂ ಘರ್ ಆಸ್ಚ್ಯಾ ಬಂಗ್ಲೆಗುಡ್ಡೆ ಥಾವ್ನ್ ಅತ್ತೂರ್ ಇಸ್ಕೊಲ್ ಸ ಕಿಮಿ ಪಯ್ಸ್. ಘರಾ ಸಾಯ್ಕಲ್ ಆಸ್‌ಲ್ಲೆಂ ತರ್‌ಯಿ, ಥೊಡ್ಯಾಚ್ ತೇಂಪಾಪಯ್ಲೆಂ ಸಾಯ್ಕಲ್ ಶಿಕ್ತಾನಾ ಆಕ್ಸಿಡೆಂಟ್ ಜಾಲ್ಲ್ಯಾನ್ ಮ್ಹಾಕಾ ಸಾಯ್ಕಲ್ ವ್ಹರುಂಕ್ ಪರ್ವಣ್ಗಿ ನಾತ್‌ಲ್ಲಿ. ಭಾವ್ ಸಾಯ್ಕಲ್ ವ್ಹರ್ತಾಲೊ ತರ್‌ಯಿ ಹಾಂವೆಂ ತಾಚೆಸವೆಂ ವ್ಹಚಾಜೆ ತರ್ ತಾಚಿ ಮರ್ಜಿ ರಾಕಾಜೆ ಆಸ್‌ಲ್ಲಿ. ತಾಣೆಂ ಸಾಂಗ್‌ಲ್ಲೆಂ ಕಾಮ್ ಕರಿಜೆ ಪಡ್ತಾಲೆಂ. ನಾ ತರ್ ಸೊಡ್ನ್ ವ್ಹೆತಾಲೊ. ದಮ್ಮಯ ಘಾಲ್ಯಾರ್‌ಯಿ ಸಾಯ್ಕಲ್ ದೀನಾತ್‌ಲ್ಲೊ. ಹಾಂವೆಂ ಚೊರಿಯಾಂ ವ್ಹೆಲ್ಯಾರ್ ಪಪ್ಪಾಲಾಗಿಂ ದುರಾಂ ದಿತಾಲೊ. ತವಳ್ ಮ್ಹಾಕಾ ಸಾಂಗಾತ್ ದಿಲ್ಲೊ ರೊನಿನ್. ತಾಕಾಯ್ ತಾಚೊ ಬಾಪುಯ್ ಸಾಯ್ಕಲ್ ದೀನಾತ್ಲೊ. ತೊ ಮ್ಹಜ್ಯಾ ಭಾವಾಚೊ ಕ್ಲಾಸ್‌ಮೇಟ್ ತರ್‌ಯಿ ಮ್ಹಜೊ ಸಾಂಗಾತಿ ಜಾಲೊ ಆನಿ ಆಜೂನ್ ಮೊಗಾಚೊ ಸಾಂಗಾತಿ ಜಾವ್ನ್ ಉರ್ಲಾ.

ಸವೆ ಥಾವ್ನ್ ಧಾವೆ ಪರ್ಯಾಂತ್ಲಿಂ ಚಡಾವತ್ ಕೊಲೆಜಿಂತ್ ಮೆಳ್ಳಿಂ. ಉಪ್ರಾಂತ್ ಹಾಂವ್ ಮುಂಬಯ್ ಪಾವ್ಲೊಂ. ಶಾರ್ಜಾ ಪಾವ್ಲೊಂ. ನವೆ ಜಾಗೆ, ನವೆ ಇಶ್ಟ್, ನವೆ ಅನ್ಬೋಗ್ ಮೆಳ್ಳೆ. ಪಾಟಿಂ ಗಾಂವಾಕ್ ಆಯ್ಲೊಂ. ಕೊಂಕ್ಣಿ ವಾವ್ರಾಕ್ ಲಾಗ್ಲೊ. ಪೂಣ್ ಇಸ್ಕೊಲಾ ಆವ್ದಿ ಸಂಪ್‌ಲ್ಲಿಚ್ ಸಂಪ್ಲಿ. ಹಿಂ ಸರ್ವ್ ಕ್ಲಾಸ್‌ಮೆಟಾಂ ಖಂಯ್ ಮಾಯಾಗ್ ಜಾಲಿಂ ಮ್ಹಣ್‌ಚ್ ಕಳ್ಳೆಂ ನಾ. ಮುಂಬಯಾಂತ್ ಆಸ್ತಾನಾ ಕೋಣಿ ಮೆಳ್ಳಿನಾಂತ್. ಶಾರ್ಜಾಂತ್ ಅಪ್ರೂಪ್ ಡೊನಾಲ್ಡ್, ದೀಪಕ್, ಪ್ರವೀಣ್ ಆನಿ ವಿಲ್ಮಾ ಮೆಳ್ಳಿಂ. ಪಾಟಿಂ ಗಾಂವಾಂತ್ ಶರೀಫ್ ಎಕ್ಲೊ ಹೆಣೆ ತೆಣೆ ದಿಸ್ತಾ, ಮುನ್ಸಿಪಾಲ್ಟಿಚೊ ಸಾಂದೊ ಜಾವ್ನ್, ಪತ್ರ್‌ಕಾರ್ ಜಾವ್ನ್. ಕಿಶೋರ್ ಜನರಲ್ ಸ್ಟೋರ್ಸ್ ಘಾಲ್ನ್ ಬಸ್ಲಾ. ಸಂತೋಶ್ ರಿಯಲ್ ಎಸ್ಟೇಟ್ ಏಜೆಂಟ್ ಜಾಲಾ. ಆಬಿದ್ ಮಶಿದೆಚೊ ಮುಲ್ಲಾ ಜಾಲಾ. ಅಪ್ರೂಪ್ (ಹಾಂವೆಂ ಗೆಲ್ಲೆ ತವಳ್) ಇಗರ್ಜೆಂತ್ ಬಬಿತಾ ಆನಿ ಜ್ಯೋತಿ ಟಿಚೆರ್ ದಿಸ್ತಾತ್. ಗಲ್ಫಾ ಥಾವ್ನ್ ರಜೆರ್ ಆಯ್ಲ್ಯಾರ್ ಮೈಕಲ್, ಡೊಲ್ಫಿ ಆನಿ ಡೊನಾಲ್ಡ್ ಇಗರ್ಜೆ ಬಾಗ್ಲಾರ್ ರಾವೊನ್ ಸುಕ್ ದೂಕ್ ಉಲಯ್ತಾತ್. ನೆಲ್ಸನ್ ಲೆಕ್ಚರರ್ ಜಾಲಾ. ನೆವಿಲ್ ಆಂಗಡ್ ಘಾಲ್ನ್ ಬಸ್ಲಾ. ದಿನೇಶ ಕಾರ್ಕಳಾಂತ್ ಆಸ್ತಾನಾ ಅತ್ತೂರ್ ತೆವ್ಶಿಂ ಸಕಾಳಿಂ ವಾಕಿಂಗ್ ಗೆಲ್ಯಾರ್ ಮೆಳ್ತಾ. ಚೆಡ್ವಾಂ ತರೀ ಕಾಜಾರ್ ಜಾವ್ನ್ ಪಯ್ಸ್ ಗೆಲ್ಯಾಂತ್ ಮ್ಹಣ್ ಲೆಕ್ಯಾಂ. ಪೂಣ್ ಚೆರ್ಕೆ? ಸರ್ವ್ ಗಲ್ಫಾಂತ್, ಕೆನಡಾ, ಅಮೇರಿಕಾಂತ್ ಮಾಯಾಗ್ ಜಾಲ್ಯಾತ್? ವಾ ಗಾಂವಾಂತ್ ಆಸೊನೀ ಮ್ಹಾಕಾ ದಿಸನಾಂತ್. ಜಶೆಂ ಹಾಂವ್ ತಾಂಕಾಂ ದಿಸಾನಾ...?

ಅಶೆಂ ಶೆಂಬರಾಂನಿ ಕ್ಲಾಸ್‌ಮೇಟ್ಸ್ ಆಸ್ಲ್ಯಾರೀ ಆಜ್ ಫಕತ್ ಪಾಂತ್ತಿಸಾಂಚ್ಯಾ ಪ್ರಾಯೆರ್ ರಾವೊನ್ ಪಾಟಿಂ ಪಳೆತಾನಾ ಮಸ್ಕ್ ಮಸ್ಕ್ ದಿಸ್ತಾ. ಸಬಾರಾಂಚಿಂ ನಾಂವಾಂಯ್ ಉಡಾಸಾಕ್ ಯೇನಾಂತ್. ಉಡಾಸಾ ಖಣಾಂನಿ ಕಾಳಾಚಿ ಘಯ್ರಾಮ್ ಮಾಂಡ್ಲ್ಯಾ. ಕ್ಲಾಸ್‌ಮೆಟಾಂಕ್ ಮೆಳ್ಚೆಖಾತಿರ್ ಫೇಸ್‌ಬುಕಾರ್ ವಿವರ್ ದಿತಾನಾ ಶಿಕ್‌ಲ್ಲ್ಯಾ ಇಸ್ಕೊಲಾಂಚಿ, ಗಾಂವ್ಚಿಂ ನಾಂವಾಂ ದಿಲಿಂ. ಶೆಂಬರಾಂನಿ ನವೆ ಮಿತ್ರ್ ಮೆಳ್ಳೆ. ಪೂಣ್ ಏಕ್‌ಚ್ ಏಕ್ ಕ್ಲಾಸ್‌ಮೇಟ್ ಮೆಳೊಂಕ್ ನಾ. ಖಂಯ್ ಗೆಲ್ಯಾಂತ್‌ಗಾಯ್ ಮ್ಹಜಿಂ ಕ್ಲಾಸ್‌ಮೆಟ್ಸಾಂ?

ಪಳೆಯಾಂ, ಎಚ್ಚೆಮಾಚ್ಯಾ ಕಿಟಾಳ್ ವೆಬ್ಬಾರ್ ಹಿ ಗಜಾಲ್ ಫಾಯ್ಸ್ ಜಾತಚ್ ಕೊಂಕ್ಣಿ ವಾಚ್ಚಿಂ ಕ್ಲಾಸ್‌ಮೆಟಾಂ ಪುಣಿ, ಮೆಳ್ತಾತ್‌ಗೀ ಪಳೆಯ್ಜೆ.

Write your Comments on this Article
Your Name
Place
Your E-mail
Your Comment	You have characters left.
Security Validation
Enter the characters in the image above

Disclaimer: Kindly do not post any abusive, defamatory, infringing, obscene, indecent, discriminatory or unlawful material or SPAM. kittall.com reserves the right to block/ remove without notice any content received from users.