ಕಾಳ್ಯಾ ಮಾಜ್ರಾಚೆ ಅವ್ತಾರ್

ಅಂಧೇರಿ ಆಸ್ಚಾ ’ಟಾಯ್ಟ್-ಫಿಟ್ ನಟ್ ಬೋಲ್ಟ್’ ಕಂಪೆನಿಂತ್ ಹಾಂವ್ ಕಾಮ್ ಕರ್ತಾಲೊಂ. ಪಂತ್ ನಗರಾಚ್ಯಾ ಸ್ಟಂಟ್ ಕೊಲನಿಂತ್ ಎಕಾ ನಂಬ್ರಾಚ್ಯಾ ಬಾಂದ್ಪಾಂತ್, ದುಸ್ರ್ಯೆ ಮಾಳ್ಯೆರ್, ತಿಸ್ರ್ಯಾ ಕುಡಾಂತ್ ಮ್ಹಜಿ ವಸ್ತಿ ಆಸ್‌ಲ್ಲಿ!

ಮ್ಹಜೆಕಡೆ ಕುಸ್ತೆಕ್ ರಾಂವ್ಚಿಂ ಭಾವ್-ಭಯ್ಣಿಂ ಗಾಂವಾಂತ್ ಉರ್ಲೆಲ್ಯಾನ್, ಆನಿ ಮ್ಹಾಕಾ ಧೊಸ್ಚಿ ಘರ್ ಮಂತ್ರಿಣ್ ಹ್ಯಾ ಪರ್ಯಾಂತ್ ಚುನಾಯಿತ್ ಜಾಂವ್ಕ್ ನಾತ್ಲೆಲ್ಯಾನ್, ಹಾಂವೆಂಚ್  ರಾಂದ್‌ಲ್ಲೆಂ, ಅರ್ಧೆಂ ಭಾಜ್‌ಲ್ಲೆಂ ವ ಶಿಜ್‌ಲ್ಲೆಂ, ಆಮ್ಶೆಲ್ಲೆಂ ನ್ಹಯ್ ತರ್ ಬೆಳ್ಶೆಲ್ಲೆಂ ಖಾವ್ನ್ - ಜೇವ್ನ್, ಕೊಣಾಯ್ಚಿ ಪರ್ವಾ ನಾಸ್ತಾಂ, ಹಾಂವ್ ದಿಸಾಂಕ್ ಲೊಟುನ್ ರಾತಿಂಕ್ ಧಾಂವ್ಡಾಯ್ತಾಲೊಂ!

ತರಿಕೀ ಮ್ಹಜೆ ಶಿವಾಯ್ ಮ್ಹಜೆ ವಸ್ತೆಂತ್ ಮ್ಹಜೆ ಖಾತಿರ್ ಕಸ್ಕಸೊನ್ ಹುಸ್ಕೆಂವ್ಚಿ ಏಕ್ ವ್ಯಕ್ತಿ ಆಸ್‌ಲ್ಲಿ,

ನಾಂವ್ ತಾಚೆಂ ಮೀನಾ! 

ತಾಚೊ ರಂಗ್ ಸಗ್ಳೊ ಕಾಳೊ ಜಾಲ್ಲ್ಯಾನ್, ತೆಂ ಮ್ಹಾಕಾ ಚಡ್ ಸುಂದರ್  ದಿಸ್ತಾಲೆಂ. 

ಕಿತ್ಯಾಕ್ ಮ್ಹಳ್ಯಾರ್, ಗೊರಿಂ, ಗೊರಿಂ ಚೆಡ್ವಾಂ ಮ್ಹಾಕಾ ಪಸಂದ್ ಜಾಯ್ನಾತ್ಲಿಂ.  ಕಾಳ್ಶಿಂ ಚೆಡ್ವಾಂ ಮ್ಹಾಕಾ ಬರಿಂಚ್ ಸೊಭ್ತಾಲಿಂ.

ಹಾಂವ್ ಕಾಮಾ ಥಾವ್ನ್ ಆಯಿಲ್ಲ್ಯಾ ತಕ್ಷಣ್, ಥಾಲೆಂ ಉಗ್ಡುನ್ ಕುಡಾಭಿತರ್ ರಿಗ್ತಾಂ ಮ್ಹಣ್ತಾನಾ, ಮ್ಹಜೆಂ ಮೀನಾ  ’ಮ್ಯಾಂವ್..  ಮ್ಯಾಂವ್...’ ಕರುನ್ ಸಂತೊಸಾನ್ ಧಾಂವೊನ್ ಯೇವ್ನ್, ಮ್ಹಾಕಾ ಸ್ವಾಗತ್ ದಿತಾಲೆಂ. 

ಸದಾಂಯ್ ತಾಕಾ ಹಾಂವೆಂ ಚಾರ್, ಪಾಂಚ್ ’ಕ್ರೀಮ್ ಬಿಸ್ಕಿತ್ಯೊ’ ವ್ಹರಾಜಾಯಿಚ್ ಆಸ್‌ಲ್ಲ್ಯೊ ಆನಿ ತ್ಯೊಯಿ ’ಬ್ರಿಟಾನಿಯಾ ಕಂಪೆನಿ’ ಚ್ಯೊಚ್ ಜಾಯ್ಜಾಯ್ ಆಸ್‌ಲ್ಲ್ಯೊ.

ದುಸ್ರ್ಯೊ ತರ್ ತೆಂ ಖಾಯ್ನಾತ್ಲೆಂ!

ತ್ಯಾ ಎಕಾ ದಿಸಾ ಹಾಂವ್ ಕಾಮ್ ಸಂಪವ್ನ್, ಘರಾ ಪಾವ್ಲೊಂ. ದಾರ್ ಉಘಡ್ಲೆಂ ಆನಿ ಮ್ಹಜ್ಯಾ ಪಾಂಯಾಂಭಂವ್ತಿಂ ಘುಂವ್ಚಾ ಮೀನಾಕ್ ಉಸ್ಕ್ಯಾರ್ ದವ್ರುನ್ ಕದೆಲಾರ್ ಬಸ್ಲೊಂ.

ತೆದ್ನಾಂಚ್ಚ್ ಎಕ್ಸ್‌ಕ್ಯೂಜ್ ಮೀ!  ಬಾರಿಕ್ ತಾಳ್ಯಾಚಿಂ ನಾಜೂಕ್ ಉತ್ರಾಂ ಕಾನಾಂತ್ ಮ್ಹಜ್ಯಾ ರಿಗ್ಲಿಂ. 

ಹಾಂವೆಂ ದಾರಾಕಡೆ ಪಳೆಲೆಂ. ಥಂಯ್ ತಿ ಮಲಬಾರಿ ಚಲಿ ಉಬಿ ಆಸ್‌ಲ್ಲಿ. ತಿಚ್ಯಾ ಹಾತಾಂತ್ ತುವಾಲೊ ಧಾಂಪ್‌ಲ್ಲಿ ಏಕ್ ಲ್ಹಾನ್ ’ಟ್ರೇ’ ಆಸ್‌ಲ್ಲಿ.

ಹಾಂವೆಂ ರಾಂವ್ಚ್ಯಾ ಬಾಂದ್ಪಾಂತ್‌ಚ್ ಪಯ್ಲ್ಯೆ ಮಾಳ್ಯೆರ್ ಕೇರಳಾಚೊ ಎಕ್ಲೊ ನಾಂವಾಡ್ದಿಕ್ ಜ್ಯೋತಿಶ್ಯ್ ರಾವ್ತಾಲೊ ಮ್ಹಣ್ ಹಾಂವ್ ಜಾಣಾಸ್ಲೊಂ. ತಾಚಿ ಬಾಯ್ಲ್ ಬಂಗಾಲಿ ಆನಿ ತಾಂಚಿ ಎಕ್ಲಿಚ್ ಧುವ್ ಹಿ ಚಲಿ. ಗೊರಿ ನಾತ್‌ಲ್ಲಿ ತರಿ, ಕಾಳಿ ಜಾವ್ನ್ ಲಕ್ಷಣ್ ಆಸೊನ್, ಬರಿಚ್ ಸೊಭ್ತಾಲಿ!

ಹಾಂವ್ ’ಟಾಯ್ಟ್ ಫಿಟ್ ನಟ್ ಬೋಲ್ಟ್’ ಕಂಪೆನಿಂತ್ ಕಾಮ್ ಕರುನ್‌ಯೀ, ’ಟಾಯ್ಟ್ ಫಿಟ್ ಟಿ-ಶರ್ಟ್ ಆನಿ ಜೀನ್ಸ್ ಪೆಂಟ್ ಘಾಲ್ನ್ ನಕ್ರೆ ಕರ್ಚ್ಯಾ ಚೆಡ್ವಾಂಕ್ ಪಸಂಧ್ ಕರಿನಾತ್ಲೊಂ. ತರಿಪುಣ್ ಮ್ಹಜೆ ಮುಕಾರ್ ಉಬೆಂ ಆಸ್‌ಲ್ಲೆಂ ಮಲಬಾರಿ-ಬಂಗಾಲಿ  ಚೆಡುಂ, ಸಜ್ಜಿಗೆ-ಬಜಿಲ್ ಭಿಯಾತಿಣ್, ಟಾಯ್ಟ್-ಫಿಟ್ ಘಾಲುನ್ ತಟಿ-ಪಿಟಿ ಕರುನ್ ಚಮ್ಕಾತಾನಾ, ತಾಕಾ ಹಾಂವ್ ಲಕ್ಶಾ ದಿನಾತ್ಲೊಂ !  

ಆತಾಂ ತೆಂಚ್ ಚೆಡುಂ ಮ್ಹಜೆ ಮುಕಾರ್ ಉಬೆಂ ರಾವೊನ್, ಮ್ಹಾಕಾ ಜಾಗಯ್ತಾನಾ ಹಾಂವ್  ಗಾಗೆಲೊಂ.

ಹಾಂವೆಂ ಭಿತರ್ ಯೆವ್ಯೆತ್?  ಹೆಂ ಸವಾಲ್ ವಿಚಾರುನ್, ಹಾಂವೆಂ ಜಾಪ್ ದಿಂವ್ಚಾ ಆದಿಂ ತೆಂ ಭಿತರ್  ಆಯಿಲ್ಲೆಂ.

ಹಂಕಾರ್ ನ್ಹಂಯ್ ಗಿ ಚೆಡ್ವಾಚೊ!

ತಿತ್ಲೆಂಚ್ ನ್ಹಂಯ್, ಹಾಂವೆಂ ಬಸ್ ಮ್ಹಣ್ಚಾ ಪಯ್ಲೆಂಚ್ ಮ್ಹಜೆ ಮುಕಾರ್ ಆಸ್‌ಲ್ಲ್ಯಾ ಮೆಜಾರ್ ಹಾತಿಂ ಆಸ್‌ಲ್ಲಿ ಟ್ರೇ ದವ್ರುನ್, ಎಕ್ ಕದೆಲ್ ವೊಡುನ್ ತೆಂ ಬಸ್ಲೆಂ. ’ಆಜ್ ಮ್ಹಜೊ ಆಜ್ ಬರ್ಥ್‌ಡೇ ’ ಆಪುಣ್ ಚಿಕೆ ಕಾಳಿಂ ತರೀ, ದಾಂತ್ ಸಗ್ಳೆ ಧವೆ ಆಸಾತ್ ಮ್ಹಣ್ ರುಜು ಕರುಂಕ್ ತೆಂ ಹಾಸ್ಲೆಂ.

’ಮ್ಹಜೊ ಬರ್ಥ್‌ಡೇ ಜಾವ್ನ್ ಆಜಿಕ್ ಸಿಕ್ಸ್ತ್‌ಡೇ’ ಹಾಂವೆಂ ಫಟ್ ಮಾರ್ಲಿ ನಾ. ನೀಜ್ ಜಾವ್ನ್ ಮ್ಹಜೊ ಜಲ್ಮಾ ದಿವಸ್ ಜಾವ್ನ್ ಆಯ್ಚ್ಯಾ ದಿಸಾ ಸ ದೀಸ್ ಉತ್ರಾಲ್ಲೆ.

ಆಜ್ ಮ್ಹಜೊ ಬರ್ಥ್‌ಡೇ ಮ್ಹಣ್, ಹಾಂವ್ ಸಾಂಗ್ತಾನಾ, ಮ್ಹಾಕಾ ತುಂ ವಿಶ್ ಕರಿನಾಸ್ತಾಂ ತುಜ್ಯಾ ಬೆಳ್ಶೆಲ್ಲ್ಯಾ ಬರ್ಥ್‌ಡೇಚೊ ಉಡಾಸ್ ಉಸ್ತಿತಾಯ್!  ತಾಣೆ ಘಾಣ್ ಆಯಿಲ್ಲೆಪರಿಂ, ಸೊಂಡಿ ಘುಂವ್ಡಾಯ್ಲಿ. 

ಮ್ಹಾಕಾ ತುಜೆಂ ನಾಂವ್ ಕಳಿತ್ ನಾ ಹನಿ...  

ಮ್ಹಜೆಂ ನಾಂವ್ ನೈನಾ!

ಹಾಂ ನೈನಾ, ತುಕಾ ವೆಗ್ಗಿಂ ಕಾಜಾರ್ ಜಾವ್ನ್, ತೆಗಾಂ ಭುರ್ಗಿಂ  ಜಾತೆಚ್ ಶೆಂಬೊರ್ ವರ್ಸಾಂಚೆಂ  ಆವ್ಕ್  ತುಕಾ ಮಾಗ್ತಾಂ!

ದೆವಾ ಮ್ಹಜ್ಯಾ,  ಕಿತೆಂ ಮ್ಹಳೆಂಯ್, ತೆಗಾಂ ಭುರ್ಗಿಂ  ? ಆನಿ ಶೆಂಬೊರ್ ವರ್ಸಾಂಚೆಂ ಆವ್ಕ್ .......?

ಮಾಗಿರ್ ತಾಚ್ಯಾಕಿ ಚಡ್ ಭುರ್ಗ್ಯಾಂ ಕ್ ತುಂ ಆಶೆತಾಯ್?

ಶಟ್-ಅಪ್!  ತೆಂ ಮ್ಹಣಾಲೆಂ 

ಮ್ಹಜ್ಯಾ ಘರಾ ಥಾವ್ನ್ ಗೆಟ್-ಔಟ್!  ಹಾಂವೆಂ ಧರ್ಣಿಕ್ ಖೊಟ್ ಮಾರ್ಲಿ  .

ತಕ್ಷಣ್ ತಾಚ್ಯಾ ತೊಂಡಾರ್ ಹಾಸೊ ಖೆಳ್ಳೊ.

ಮ್ಹಾಕಾ ಮಾಫ್‌ ಕರ್ ಮಿಸ್ಟರ್.  ತುಕಾ ನಾಕಾಚೆ ತುದ್ಯೆರ್‌ಚ್ ರಾಗ್ ಆಸಾ ಮ್ಹಣ್ ಹಾಂವ್ ನೆಣಾಸ್ಲಿಂ.

ಹಾಂವ್‌ಯೀ ಥಂಡ್ ಜಾಲೊಂ.  ಚಲ್ ವಚ್, ತುಕಾ ಹಾಂವೆಂ ಭಗ್ಸಿಲೆಂ ಹಾಂವೆಂ ತಾಚ್ಯಾ ಮಾತ್ಯಾವಯ್ರ್ ಹಾತ್ ಉಕ್ಲುನ್ ಧರ್ಲೊ.

ತುಂ ಭಾರಿ ಹುಶಾರ್ ಆಸಾಯ್. ತುಜೆಕಡೆ ಉಲಂವ್ಕ್ ಬಸ್ಲ್ಯಾರ್ ಹಾಂವ್ ಜರೂರ್ ಸಲ್ವತೆಲಿಂ  ಮ್ಹಣಾತ್ತ್ ತೆಂ ಕದೆಲಾ ವಯ್ಲೆಂ ಉಟ್ಲೆಂ.  

ತಾಣೆ ಟ್ರೇ ಹಾಡುನ್ ಮ್ಹಜ್ಯಾ ಉಸ್ಕ್ಯಾರ್ ದವರ್ಲಿಂ.  ಘೆ ಮ್ಹಜ್ಯಾ ಬರ್ಥ್‌ಡೇ ಬಾಬ್ತಿನ್ ತುಕಾ ಹಾಂವ್ ಸ್ವೀಟ್ಸ್ ಹಾಡುನ್ ಆಯ್ಲ್ಯಾಂ.

ತುಕಾ ದೇವ್ ಬರೆಂ ಕರುಂ!  ಹಾಂವೆಂ ಬಶಿಯೆಕ್ ಧಾಂಪ್‌ಲ್ಲೊ ತುವಾಲೊ ಕಾಡ್ಲೊ.

ಏಕ್ ವ್ಹಡ್ ಕೇಕಿ ಕುಡ್ಕೊ  ಥೊಡೆ ಫೆಡಾ, ಆನಿ ಸುಕ್ಯೊ ದಾಕೊ, ಏಕ್ ಸಗ್ಳಿ ಮುಸಂಬಿ ಆನಿ ಥೊಡಿ ಸಾಕರ್.

’ಮೆಳ್ಳೆಲೆಂ ಮಾಫ್, ಖಾವ್ನ್ ಸಾಫ್!’ ಮ್ಹಣಾತ್ತ್, ವೆವೆಗ್ಗಿಂ ಹಾಂವೆಂ ನೈನಾನ್ ಹಾಡ್‌ಲ್ಲ್ಯೊ ಖಾಣಾ ವಸ್ತು ಖಾಲಿ ಕರುನ್, ಟ್ರೇ ತಾಕಾ ಪಾಟಿಂ ದಿಲಿ.

’ಹಾಂವ್ ಚಲ್ಲಿಂ’ ತಾಚಿಂ ಉತ್ರಾಂ ಮ್ಹಜ್ಯಾ ಕಾನಾಸರ್ಶಿಂ ಪಾಂವ್ಚ್ಯಾ ಪುಡೆಂಚ್, ತೆಂ ಮ್ಹಜ್ಯಾ ಕುಡಾ ಭಾಯ್ರ್ ಪಾವ್‌ಲ್ಲೆಂ.

ನೈನಾನ್ ದಿಲ್ಲೊ ಕೇಕಿಚೊ ಕುಡ್ಕೊ ಖಾಂವ್ಚೆ ಆಶೆನ್ ಬೊಟಾಂನಿ ಹಾಂವೆಂ ಉಕಲ್ಲೊ. ಪುಣ್ ಶನಿ-ಶನಿ ಮ್ಹಣ್ ಕಸಲೊಗೀ ಉಡಾಸ್ ’ಥಟಾಕ್ಕ್’ ಕರುನ್ ಮ್ಹಜ್ಯೆ ತಕ್ಲೆಕ್ ಆಪ್ಟಾಲ್ಲ್ಯಾನ್, ಹಾಂವೆಂ ಕೇಕ್ ಸಕಯ್ಲ್ ದವರ್ಲಿಂ  .

ಮುಂಬೈಂತ್ ಥೊಡಿಂ ಚೆಡ್ವಾಂ ತರ್ನ್ಯಾಟ್ಯಾಂಕ್ ವಕಾತ್ ಘಾಲುನ್ ಘುಂವ್ಡಾಯ್ತಾತ್ ಮ್ಹಣ್ ಸಾಂಗ್‌ಲ್ಲೆಂ ಹಾಂವೆಂ ಆಯ್ಕಾಲ್ಲೆಂ.

ತಶೆಚ್ ಥೊಡೆ ಚಲೆ ಕಾಂಯ್ ಉಣ್ಯಾ ತಕ್ಲೆಚೆ ನ್ಹಂಯ್!  

ತೆಯೀ ವಕ್ತಾಚೊ ಪ್ರಯೋಗ್ ಕರುನ್ ಚಲಿಯಾಂಕ್ ಜಾಯ್ ತಶೆಂ ಭೊಂವ್ಡಾಯ್ತಾತ್. ಮ್ಹಳ್ಳ್ಯೊ ಖಬ್ರೊ ಹಾಂವೆಂ ಆಯ್ಕಾಲ್ಲ್ಯೊ.

ತ್ಯಾಚ್ ಪರಿಂ ನೈನಾನ್ ಕಾಂಯ್ ಹ್ಯಾ ಖಾಣಾಂತ್ ವಕಾತ್ ಭರ್ಶಿಲಾಂ ತರ್?  ಹಾಂವೆಂ ತಕ್ಲಿ ಖರ್ಚಿಲಿ.

ನೈನಾಚೊ ಬಾಪಯ್ ವ್ಹಡ್ಲೊ ಜ್ಯೋತಿಶ್ಯ್ ಆನಿ ಪಂಡಿತ್ ಜಾಲ್ಲ್ಯಾನ್, ಸಬಾರ್ ನಾಂವ್ ನಾತ್‌ಲ್ಲ್ಯಾ ಆನಿ ಗಾಂವಾಂತ್ ನಾತ್‌ಲ್ಲೆ ಪಿಡೆಂಕ್ ಗೂಣ್ ಕರ್ತಾಲೊ. ವ್ಹಡ್ಲ್ಯಾ ವ್ಹಡ್ಲ್ಯಾ ಕಾರಾಂನಿ ಗಿರೇಸ್ತ್ ಮನಿಸ್ ತಾಕಾ ಸೊಧುನ್ ಯೆತಾಲೆ ಆಸ್ತಾಂ, ತೊ ತಾಚ್ಯೆ ಧುವೆ ಖಾತಿರ್ ಮ್ಹಾಕಾ ಬನಾಂವ್ಕ್ ಕಿತೆಂಯ್ ತರೀ ಖೆಳ್ ಖೆಳ್ಳಾ ತರ್?

ತಿತ್ಲೆಂಚ್ ನ್ಹಂಯ್, ಗಾಂವಾ ಥಾವ್ನ್ ಯೆಂವ್ಚ್ಯಾ ಫೋನ್ ಕೊಲಾಂನಿ ಆನಿ ಆಪ್ರೂಪ್ ಯೆಂವ್ಚ್ಯಾ ಮಾಂಯ್‌ಚ್ಯಾ ಕಾಗ್ದಾಂನಿ ಚತ್ರಾಯೆಚಿಂ ಉತ್ರಾಂ ಬರವ್ನ್ ಆಸ್ತಾಲಿಂ. ’ಕಿತೆಂಯ್ ಖಾತಾನಾ, ಪಿಯೆತಾನಾ ಜಾಗ್ರುತ್ ಕರ್,  ಕೊಣೆಂಯ್ ಕಿತೆಂಯ್ ಹಾಡುನ್ ದಿಲ್ಯಾರ್ ಖಾಂವ್ಕ್ ಪಿಯೆಂವ್ಕ್ ವಚನಾಕಾ. ಮುಂಬೈಚ್ಯಾ ಗಾಂವಾಂತ್ ಕೊಣಾಯ್ಕಿ ಪಾತ್ಯೆಂವ್ಕ್ ಜಾಯ್ನಾ!’

ತ್ಯಾ ಖಾತಿರ್ ಮ್ಹಜ್ಯೆ ಆಶೆಕ್ ಹಾಂವೆಂ ಗಡಿ ಬಾಯ್ರ್ ಕರುನ್, ನೈನಾನ್ ದಿಲ್ಲೆಂ ಸಗ್ಳೆಂ ಖ್ಹಾಣ್ ಮ್ಹಜ್ಯಾ ಮೀನಾ ಮುಕಾರ್ ಹಾಂವೆಂ ಘಾಲುನ್ ಸೊಡ್ಲೆಂ.

ತೆಂ ದೊಳೆ ಧಾಂಪುನ್ ಖಾತಾನಾ, ಹಾಂವೆಂ ದೊಳೆ ಸೊಡುನ್ ಪಳೆವ್ನ್, ಆಂಯ್ಡೆ ಗಿಳ್ಳೆ!

ದುಸ್ರ್ಯಾ ದಿಸಾ ಸಕಾಳಿಂ ಸಾತ್ ವರಾಂಚೆರ್ ಉಟೊನ್ ದಾಂತ್ ಘಾಸ್ತಾನಾ ನೈನಾ ದಾರಾರ್ ಉಬೆಂ ಜಾಲಾಂ ’ಗುಡ್ ಮೊರ್ನಿಂಗ್! ’ ಜೈತಾಚೊ ಹಾಸೊ ಹಾಸೊನ್ ತೆಂ ಮ್ಹಣ್ತಾನಾ, ಹಾಂವ್, ’ತೊಂಡಾಂತ್ ಕೊಲ್ಗೇಟ್ ಪೇಸ್ಟ್ ಆಸಾ’ ಮ್ಹಣ್  ದಾಂತ್ ದಾಕವ್ನ್, ವಗೊಚ್ ರಾವ್ಲೊಂ.

ಪುಣ್ ಮ್ಹಜೆಂ ಮೀನಾ, ನೈನಾಚೊ ತಾಳೊ ಆಯ್ಕೊನ್ ಎಕ್ಯೆಚ್ ಉಡ್ಕೆನ್ ಭಾಯ್ರ್ ಪಾವ್‌ಲ್ಲೆಂ.

ತೆಂ ತಾಚ್ಯಾ ಪಾಂಯಾಮುಳಾಂ ಭಂವ್ಲೆಂ ಆನಿ ಘುಂವ್ಲೆಂ!

’ಮ್ಯಾಂವ್’ ಕರುನ್ ಮೊಗಾಚ್ಯೊ ಮುರ‍್ಯೊ ದೀವ್ನ್, ನೈನಾಚೆ ದೋನ್‌ಯೀ ಪಾಂಯ್ ತಾಣೆ ಲೆಂವೊಂಕ್ ಸುರು ಕೆಲೆ.

ಮಾಜ್ರಾಚೆ ಹೆ ಸ್ಪೆಶಲ್ ಆವ್ತಾರ್ ದೆಖೊನ್ ಹಾಂವ್ ರಾವ್‌ಲ್ಲೆ ಥಂಯ್ ಥಟಾಕ್ಕ್ ಜಾವ್ನ್ ರೂಕ್ ಜಾತಾನಾ, ನೈನಾ ರಾಗಾನ್ ಕಾಲು-ಬುಲೆಂ ಜಾವ್ನ್, ದೊಳೆ ಪಿಳಿ-ಪಿಳಿ ಕರುನ್ ಮ್ಹಾಕಾ ದೆಖ್ತಾಲೆಂ. ಮ್ಹಾಕಾ ಆತಾಂ ಸತ್ ಝಳ್ಕಾಲೆಂ!

ನೈನಾನ್ ಮ್ಹಾಕಾ ದಿಲ್ಲ್ಯಾ ಖಾಣಾಂತ್, ವಕಾತ್ ಘಾಲ್ಲೆಂ.  

ತೆಂ ಖಾಣ್ ಹಾಂವೆಂ ಮೀನಾಕ್ ಖಾವೈಲ್ಲ್ಯಾ ವರ್ವಿಂ, ವಕ್ತಾಚಿ ಸಕತ್ ಮಾಜ್ರಾ ಥಂಯ್ ಪರಿಣಾಮ್ ಕರುಂಕ್ ಲಾಗ್‌ಲ್ಲ್ಯಾನ್, ಮಾಜಾರ್ ಹ್ಯಾ ಚೆಡ್ವಾಚ್ಯಾ ಮೊಗಾರ್ ಪಡ್ಲಾಂ!

ಹೆಂ ಸತ್ ವಳ್ಕೊನ್ ಹಾಂವ್ ಹಾಸ್ಲೊಂ. 

ನೈನಾ ಮ್ಹಾಕಾ ದೆಖೊನ್ ರಾಗಾನ್ ಚಿಡ್ಲೆಂ. 

ಆತಾಂ ನೈನಾಚೆ ಪಾಂಯ್ ಲೆಂವ್ಚ್ಯಾ ಮೀನಾಕ್ ಹಾಂವೆಂ ಉಕಲ್ನ್  ಧರ್ಲೆಂ.

ಧರ್ ನೈನಾ, ತುವೆಂ ವಕಾತ್ ಘಾಲುನ್ ದಿಲ್ಲೆಂ ಖಾಣ್ ಹಾಂವೆಂ ಖಾಯ್‌ನಾಸ್ತಾಂ, ಹಾಕಾ ಘಾಲ್ಲ್ಯಾನ್, ಆತಾಂ ಹೆಂ ತುಜ್ಯಾ ಮೊಗಾರ್ ಪಡ್ಲಾಂ.  ಮ್ಹಜೆಂ ಮೀನಾ ತುಜೊ ಶಾಶ್ವಿತ್ ಮೋಗ್ ಕರ್ತೆಲೆಂ ಹ್ಯಾ ಖಾತಿರ್ ಮೀನಾಕ್ ಹಾಂವ್ ತುಕಾ ವೊಪ್ಸುನ್ ದಿತಾಂ.

ತಾಚ್ಯಾ ಹಾತಾಂತ್ ಕಾಳ್ಯಾ ಮಾಜ್ರಾಕ್ ವಪ್ಸುನ್ ದಿತಾನಾ, ನೈನಾ ರಾಗಾನ್ ಆನಿ ಸಲ್ವಣೆಚೆ ಲಜೆನ್ ಮುದೊ ಜಾವ್ನ್ ಮ್ಹಜ್ಯಾ ಕುಡಾ ಭಾಯ್ರ್ ಧಾಂವ್ಲೆಂಚ್.

ತಶೆಂಚ್ ಮ್ಹಜೆಂ ಮಾಜಾರ್ ಮೀನಾ, ಮೊಗಾಚ್ಯಾ ಖತ್ಕತ್ಯಾನ್ ಭರೊನ್, ’ಮ್ಯಾಂವ್... ಮ್ಯಾಂವ್...’ ಕರುನ್ ಬೋಬ್ ಫಾಲುನ್, ಮ್ಹಜ್ಯಾ ಹಾತಾಂ ಥಾವ್ನ್ ಉಡ್ಕಿ ಮಾರುನ್. ನೈನಾಚ್ಯಾ ಪಾಟ್ಲ್ಯಾನ್ ಧಾಂವೊನ್, ವಚೊನ್  ನಪಂಯ್ಚ್ ಜಾಲೆಂ!

- ವಲ್ಲಿ ವಗ್ಗ