ಡೊನ್ ಬೊಸ್ಕೊ ಹೊಲಾಂತ್ - ಮಿಸ್ತೆರ್

- Kittall Media Network

ಕೊಂಕ್ಣಿ ಕಲಾ ಆನಿ ಕಲಾಕಾರಾಂಕ್ ಆಧಾರ್, ಪ್ರೇರಣ್ ಆನಿ ಪಾಟಿಂಬೊ ದಿಂವ್ಚ್ಯಾ ಉದ್ದೇಶಾನ್ ಆರಂಭ್ ಜಾಲ್ಲೆಂ ಸಂಘಟನ್ - ‘ಕರಾವಳ್ ಕೊಂಕಣ್ಸ್, ಮಂಗ್ಳುರ್’. ೧೯೯೮ ಇಸ್ವೆಂತ್.  ‘ಕೊಂಕಣ್ ಕಲಾಶ್ರಿ’ ಕ್ಲೊಡ್ ಡಿಸೋಜಾಚ್ಯಾ ೨೫ವ್ಯಾ ‘ನಾಯ್ಟ್’ ಕಾರ್ಯವೆಳಿಂ ಸಾಂ ಆಗ್ನೆಸ್ ಸ್ಪೆಶಲ್ ಸ್ಕೂಲ್ ಮಯ್ದಾನಾರ್ ಹ್ಯಾ ಸಂಘಟನಾಚೆಂ ಉದ್ಘಾಟನ್ ಜಾಲ್ಲೆಂ. ಶ್ರೀ ಬಿಪಿನ್ ಗೋಪಾಲಕೃಷ್ಣ ಐ.ಪಿ.ಎಸ್. (ಆತಾಂಚೊ ADGP) ಹಾಣೆ ಉದ್ಘಾಟನ್ ಕೆಲ್ಲ್ಯಾ ಹ್ಯಾ ಸಂಘಟನಾನ್ ಪಾಟ್ಲ್ಯಾ ೧೪ ವರ‍್ಸಾಂನಿ ಸಂದ್ರಾಪಾ ಪರ‍್ಮಾಣೆಂ ಮನೋರಂಜನ್ ಕಾರ್ಯಿಂ, ನಾಟಕ್ ಆನಿ ಸಿಡಿ ಸಾದರ್ ಕೆಲ್ಯಾತ್. ಕಲಾಕಾರಾಂಕ್ ಆಧಾರ್, ಪ್ರೇರಣ್ ದಿಲಾಂ.

ಕರಾವಳ್ ಕೊಂಕಣ್ ಉಗ್ತಾವಣ್ - ೧೯೯೮

 

ಕೊಂಕ್ಣಿ ನಾಟಕ್ ಕಲಾ ಆನಿ ತಾಂತ್ಲ್ಯಾ ಕಲಾಕಾರಾಂಕ್ ಉತ್ತೇಜಿತ್ ಕರ‍್ಚ್ಯಾ, ನಾಟಕ್ ಕಲಾ ಜಿವಾಳ್ ದವರ‍್ಚ್ಯಾ ಮಿಸಾಂವಾಚೊ ಏಕ್ ವಾಂಟೊ ಜಾವ್ನ್ ಹ್ಯಾ ಸಂಘಟನಾನ್ ವರ‍್ಸಾಕ್ ಏಕ್ ಗಂಬೀರ್ ನಾಟಕ್ ಸಾದರ್ ಕರ‍್ಚೆಂ ವಿಶೇಸ್ ಮಿಸಾಂವ್ ಹಾತಿಂ ಧರ‍್ಲೆಂ. ಪಾಟ್ಲ್ಯಾ ವರ‍್ಸಾ ಮ್ಹಣ್ಜೆ ೨೦೧೧ ಸುರ‍್ವಾತಿಲ್ಲ್ಯಾ ಹ್ಯಾ ಯೆವ್ಜಣೆಚೊ ಪಯ್ಲೊ  ನಾಟಕ್ ಜಾವ್ನ್ ತ್ರಿಭಾಷಾ ನಾಟಕಿಸ್ತ್ ಶ್ರೀ ಜೆ.ಬಿ. ಡಿಸೋಜಾ ಕುಲ್ಶೇಕರ್ ಹಾಚೊ ‘ರಗ್ತಾಚಿ ಕಾಣಿಕ್’ ನಾಟಕ್ ಯಶಸ್ವೆನ್ ಸಾದರ್ ಕೆಲೊ ಆನಿ ಹ್ಯಾ ವರ್ಸಾ ಕೊಂಕ್ಣೆಚೊ ಅನ್ಯೇಕ್ ಫಾಮಾದ್ ನಾಟಕಿಸ್ತ್ ಶ್ರೀ ಬೆನ್ನಾ ರುಜಾಯ್ ಹಾಚೊ ‘ಮಿಸ್ತೆರ್’ ನಾಟಕ್ ಸಾದರ್ ಜಾತಾ.

ಕರಾವಳ್ ಕೊಂಕಣ್ ಕಲಾ ಪ್ರಶಸ್ತಿ:

ಕೊಂಕ್ಣಿ ನಾಟಕ್ ಕಲಾ ಜಿವಾಳ್ ದವರುಂಕ್, ಹ್ಯಾ ಕಲೆಚಿ ರೂಚ್ ಲೊಕಾಕ್ ದೀವ್ನ್, ಬರೆಂ ಆನಿ ನಿತಳ್ ಮನೋರಂಜನ್ ಲೊಕಾಕ್ ಪಾವಂವ್ಕ್ ವಾವುರ್‌ಲ್ಲೆ ಜಾಯ್ತೆ ಕಲಾಕಾರ್ ಕೊಂಕ್ಣೆಂತ್ ಆಸಾತ್. ಕಾಂಯ್ ಥೊಡೆ ಮಾಲ್ಘಡೆ ಕಲಾಕಾರ್ ದೆವಾದೀನ್ ಜಾಲ್ಯಾತ್ ಆನಿ ಹೆರ್ ಥೊಡೆ ಜೆ ಕೊಂಕ್ಣೆಂತ್ ವಾವುರ್‌ಲ್ಲೆ ಕಲಾಕಾರ್ ನಿಸ್ತೇಜ್ ಆಸಾತ್. ನಾಟಕ್ ಬರಯ್ಣಾರ್, ಸಾದರ್ ಕರ‍್ಪಿ ಸಂಘಟನಾಂ ಆನಿ ದೆಣ್ಯಾವಂತ್ ಕಲಾಕಾರಾಂ ಬೋವ್ ಥೊಡಿಂ ಆಸಾತ್. ನಾಟಕ್ ಶೆತಾಂತ್ ವಾವುರ್‌ಲ್ಲ್ಯಾ, ಕಲಾ ಜಿವಾಳ್ ದವರುಂಕ್ ಪೆಚಾಡ್‌ಲ್ಲ್ಯಾ ಅಸಲ್ಯಾ ಕಲಾಕಾರಾಂಕ್ ಮಾನ್ ಕರುಂಕ್ ಆನಿ ಹ್ಯಾ ಮಾರಿಫಾರ್ ಕೊಂಕ್ಣಿ ನಾಟಕ್ ಕಲಾ ಜಿವಾಳ್ ದವರುಂಕ್ ಕರಾವಳ್ ಕೊಂಕಣ್ಸ್, ಮಂಗ್ಳುರ್ ಹಾಣಿಂ ವರ‍್ಸಾಕ್ ಎಕಾ ಮಾಲ್ಘಡ್ಯಾ ಕಲಾಕಾರಾಕ್ ಪ್ರಶಸ್ತಿ ದಿಂವ್ಚೆಂ ವಿಶೇಸ್ ಯೆವ್ಜಣ್ ಹಾತಿಂ ಘೆತ್ಲೆಂ. ಆನಿ ಹೆಂ ಜಾವ್ನಾಸಾ ಕರಾವಳ್ ಕೊಂಕಣ್ ಕಲಾ ಪ್ರಶಸ್ತಿ. ೨೦೧೧ ಇಸ್ವೆಂತ್ ಸುರ್ವಾತ್‌ಲ್ಲಿ ಹಿ ಪ್ರಶಸ್ತಿ ಐವಜ್ ರು. ೫೦,೦೦೦/-, ಯಾದಿಸ್ತಿಕಾ, ಫುಲಾಂ, ಫಳಾಂ, ಆನಿ ಮಾನ್ ಪತ್ರ್ ಆಟಾಪ್ತಾ.  ವರ್ಸಾಕ್ ಎಕಾ ಕೊಂಕ್ಣಿ ಕಲಾಕಾರಾಕ್ ಹಿ ಪ್ರಶಸ್ತಿ ಫಾವೊ ಜಾತಾ. ೨೦೧೧ ಇಸ್ವೆಂತ್ ಹಿ ಸುರ್ವಿಲಿ ಪ್ರಶಸ್ತಿ ಶ್ರೀ ಜೆ.ಬಿ. ಡಿಸೋಜಾ, ಕುಲ್ಶೇಕರ್ ಹಾಕಾ ಪ್ರಾಪ್ತ್ ಜಾಲಿ.

ನಾಟಕಿಸ್ತ್ ಶ್ರೀ ಜೆ ಬಿ ಡಿ ಸೊಜಾ ಹಾಂಕಾ ೨೦೧೧ ವ್ಯಾ ವರ್ಸಾಚಿ ಕರಾವಳ್ ಕೊಂಕಣ್ ಕಲಾ ಪ್ರಶಸ್ತಿ

 

ಶ್ರೀ ಜೆ ಬಿ ಡಿ ಸೊಜಾ ವಿರಚಿತ್ ರಗ್ತಾಚಿ ಕಾಣಿಕ್ ಸಮಾಜಿಕ್ ನಾಟಕಾಚೆಂ ಏಕ್ ಮಾರ್ಮಿಕ್ ದೃಶ್ಯ್

 

೨೦೧೨ ವ್ಯಾ ವರ್ಸಾಚಿ ಕರಾವಳ್ ಕೊಂಕಣ್ ಕಲಾ ಪ್ರಶಸ್ತಿ ವಿಜೇತ್ ಶ್ರೀ ಬೆನ್ನಾ ರುಜಾಯ್, ಪತಿಣ್ ಮಿನ್ನಾ ಸಾಂಗಾತಾ

[ ಲಗ್ನಾಚ್ಯಾ ರುಪ್ಯೊತ್ಸವಾಚಿ ತಸ್ವೀರ್ ]

 

ಹ್ಯಾ ವರ್ಸಾ ದುಸ್ರಿ ‘ಕರಾವಳ್ ಕೊಂಕಣ್ ಕಲಾ ಪ್ರಶಸ್ತಿ’ ಮಾಲ್ಘಡೊ ನಾಟಕಿಸ್ತ್ ಶ್ರೀ ಬೆನ್ನಾ ರುಜಾಯ್ ಹಾಕಾ ಪ್ರಾಪ್ತ್ ಜಾತಾ. ಸವೆಂ ಆಪ್ಲ್ಯಾ ಪತಿಸಂಗಿಂ ನಾಟಕ್ ಕಲೆಕ್ ವಿಶೇಸ್ ಮಾಪಾನ್ ದೇಣ್ಗಿ ದಿಲ್ಲಿ ತಾಚಿ ಪತಿಣ್ ಶ್ರೀಮತಿ ಮಿನ್ನಾ ರುಜಾಯ್ಕ್‌ಯಿ  ಕರಾವಳ್ ಕೊಂಕಣ್ಸ್ ಸನ್ಮಾನ್ ಕರ‍್ತೆಲೆಂ.

ಫುಡಾರಾಚ್ಯೊ ಯೆವ್ಜಣ್ಯೊ :

ಕರಾವಳ್ ಕೊಂಕಣ್ಸ್ ಹ್ಯಾ ಸಂಘಟನಾಚ್ಯಾ ಮುಕ್ಲ್ಯಾ ಯೆವ್ಜಣೆವಿಶಿಂ ವಿಚಾರ್‌ಲ್ಲೆ ವೆಳಿಂ ಕರಾವಳ್ ಕೊಂಕಣ್ಸ್ ಹಾಚೊ ಸ್ಥಾಪಕ್ ಅಧ್ಯಕ್ಷ್ ಶ್ರೀ ಲೆಸ್ಲಿ ರೇಗೊ ಮ್ಹಣ್ತಾ, ‘‘ ನಶಿಬಾನ್ ಆಮ್ಚ್ಯಾ ಸಂಘಟನಾಂತ್ ಆಸ್ಚೆ ಸರ‍್ವ್ ಸಾಂದೆಯಿ ಕಲಾ ವಾವ್ರಾಂತ್ ಬೋವ್ ಚಡ್ ಉರ್ಬೆಸ್ತ್. ತರೀ ಆಮ್ಚ್ಯಾ ದಿಸ್ಪಡ್ತ್ಯಾ ರಾಟಾವಳಿಂ ಮದೆಂ ಕಲಾ ಶೆತಾಂತ್ ವಾವ್ರುಂಕ್ ವೇಳ್ ಮೆಳ್ಚೊಚ್ ಬೋವ್ ಕಶ್ಟಾಂನಿ. ಮೆಳ್‌ಲ್ಲಿ ಹರ್ ಘಡಿ ಸಾಂಗಾತಾ ಘಾಲ್ನ್ ಮ್ಹಳ್ಳೆಪರಿಂ ಆಮಿ ವರ‍್ಸಾಕ್ ಏಕ್ ನಾಟಕ್ ಉಬೊ ಕರ‍್ಚೆಂ ಯೆವ್ಜಣ್ ಹಾತಿಂ ಧರ‍್ಲೆಂ. ಹಾಚೆ ಸಂಗಿಂ ಕೊಂಕ್ಣೆಚೊ ನಾಮ್ಣೆಚೊ ಬರವ್ಪಿ ದೆ. ವಿ.ಜೆ.ಪಿ. ಸಲ್ಡಾನ್ಹಾಚ್ಯಾ ಉಗ್ಡಾಸಾಕ್ ಹ್ಯಾ ವರ‍್ಸಾ ಏಕ್ ವಿಶೇಸ್ ಕಾರ್ಯೆಂ ಮಾಂಡುನ್ ಹಾಡುಂಕ್ ಯೆವ್ಜಿಲಾಂ. ತಾಚೆ ಭಾಯ್ರ್ ಕೊಂಕ್ಣಿ ಸಂಗೀತ್ ಶೆತಾಚ್ಯಾ ಸುರ‍್ವಿಲ್ಯಾ ಕಾಳಾರ್ ಜಯ್ತಿಂ ಪದಾಂ ಬರವ್ನ್, ಗಾವ್ನ್ ಲೊಕಾಮೊಗಾಳ್ ಜಾಲ್ಲ್ಯಾ ಪುಣ್ ಆಜ್ ಆಮ್ಚೆಂ ಸಂಗಿಂ ನಾತ್‌ಲ್ಲ್ಯಾ ಕಲಾಕಾರಾಂಚ್ಯಾ ಪದಾಂಚ್ಯೊ ಕೊವ್ಳ್ಯೊ ಕಾಡ್ಚೆಂ ಏಕ್ ಯೆವ್ಜಣ್‌ಯಿ ಆಮಿಂ ಹಾತಿಂ ಧರ‍್ಲಾಂ. ವೆಗಿಂಚ್ ಏಕ್ ಸಿಡಿ ಮೊಕ್ಳಿಕ್ ಜಾತೆಲಿ."

ಸಂಘಟನಾಚೆಂ ಸುಂಕಾಣ್ :

ಶ್ರೀ ಲೆಸ್ಸಿ ರೇಗೊ ಸಾಂಗಾತಾ ಹ್ಯಾ ಸಂಘಟನಾಂತ್ , ಕಾರ್ಯದರ‍್ಶಿ ಜಾವ್ನ್ ಶ್ರೀ ಕ್ಲೊಡ್ ಡಿಸೊಜಾ ಆನಿ ಸಾಂದೆ ಜಾವ್ನ್ - ಶ್ರೀ ರ‍್ಯಾನ್ಸಮ್ ಸಲ್ಡಾನ್ಹಾ ,  ಶ್ರೀ ಜೊಸ್ವಿನ್ ಪಿಂಟೊ , ಶ್ರೀ ವಿವಿಯನ್ ಪಿಂಟೊ , ಶ್ರೀ ರೋಶನ್ ಸಿಕ್ವೇರಾ, ಶ್ರೀ ಮರ್ವಿನ್ ಪಿಂಟೊ , ಶ್ರೀ ಅನಿಲ್ ಸಲ್ಡಾನ್ಹಾ , ಶ್ರೀ ಕಿರಣ್ ಮಿನೇಜಸ್ , ಶ್ರೀ ಡೊಲ್ಲ, ಮಂಗ್ಳುರ್ ಆನಿ ಶ್ರೀ ಸಾಯ್ಮನ್ ಪಿಂಟೊ ವಾವುರ್ತೇ ಆಸಾತ್.

 

ಅಧ್ಯಕ್ಷ್ ಶ್ರೀ ಲೆಸ್ಲಿ ರೇಗೊ ಆನಿ ಕಾರ‍್ಯದರರ‍್ಶಿ ಶ್ರೀ ಕ್ಲೊಡ್ ಡಿ ಸೊಜಾ

 

ಹ್ಯಾ ಸಂಘಟನಾನ್ ಆಜ್ ಮೆರೆನ್ - ೧೯೯೮-  ಕ್ಲೊಡ್ಸ್ ಸಿಲ್ವರ್ ಜ್ಯುಬಿಲಿ ನಾಯ್ಟ್ , ೨೦೦೬-  ಕ್ಲೊಡ್ಸ್ ೩೬ವಿ ನಾಯ್ಟ್ , ೨೦೧೧-  ‘ಕರಾವಳ್ ಕೊಂಕಣ್ ಕಲಾ ಪ್ರಶಸ್ತಿ’ ಸುರ‍್ವಾತ್ / ಶ್ರೀ ಜೆ.ಬಿ. ಡಿಸೋಜಾಕ್ ಅರ್ಪಣ್ ಕಾರ‍್ಯಿಂ ಸಾದರ್ ಕೆಲ್ಯಾಂತ್ ಮಾತ್ ನಯ್ ೨೦೦೮-  ಕ್ರಿಸ್ಮಸ್ ಮೆಲೊಡಿಸ್ - ಕೊಂಕ್ಣಿ ನತಲಾಂ ಗಿತಾಂಚಿ ಕೊವ್ಳಿ ಮೊಕ್ಳಿಕ್ ಕೆಲ್ಯಾ. ಹ್ಯಾ ವರ್ಸಾ ಶ್ರೀ ಬೆನ್ನಾ ರುಜಾಯ್ ಹಾಕಾ  ‘ಕರಾವಳ್ ಕೊಂಕಣ್ ಕಲಾ ಪ್ರಶಸ್ತಿ’  ದೀವ್ನ್ ಮಾನ್ ಕರ್ಚೆ ಸವೆಂ ತಾಚೊ ಲೊಕಾಮೊಗಾಳ್ ನಾಟಕ್ ಮಿಸ್ತೆರ್ ಸಾದರ್ ಕರ್ತೇ ಆಸಾತ್. ಎಕಾ ಕಲಾಕಾರಾಕ್ ಫಕತ್ ಮಾನ್ ಕರ್ಚೊ ಮಾತ್ ನಯ್ ತಾಚ್ಯಾ ಕಲಾಕೃತಿಯೆಕ್ ಮರ್ಯಾದ್ ದಿಂವ್ಚೊ ಸಂಪ್ರದಾಯ್ ಹೆಂ ಸಂಘಟನ್ ಪಾಳುನ್ ಆಸಾ. ಹಾಚೆ ಭಾಯ್ರ್ ಹ್ಯಾ ಸಂಘಟನಾನ್ -  ಅಶಿಂ ತಶಿಂ ಕಶಿಂ ಜಾಲಿಂ ಪಿಶಿಂ , ರಗ್ತಾಚಿ ಕಾಣಿಕ್ , ಪಂಜಿಕೂರ್ ಪಂಚಾಯತ್ ಪರ್ಜಾ ನಾಟಕ್ ಸಾದರ್ ಕೆಲ್ಯಾತ್.

 

 

ವಿಶೇಸ್ :

♦     ಬೆನಾರಾ - ಚೊ ರಾಯ್ ; ಬೆನ್ನಾ ರುಜಾಯ್

♦     ತ್ರಿ ಭಾಶಾ ನಾಟಕಿಸ್ತ್ ಜೆ.ಬಿ. ಡಿಸೋಜಾ,ಕುಲ್ಶೇಕರ್