ಕಾಣಿ
ಸಕಾಳಿಕ್
ಸಂದರ್ಶನ್
- ನಾಯ್ಟಾಂತ್ ಗಾವ್ಪ್ಯಾಂಚೆಂ ಪ್ರಸಂಟೇಶನ್ ಮಹತ್ವಾಚೆಂ ಸ್ಟ್ಯಾನಿ ಮೆಂಡೋನ್ಸಾ
- ಭುರ್ಗ್ಯಾಂಚೆಂ ಸಾಹಿತ್ಯ್ ರಚ್ಚ್ಯಾಂತ್ ತೃಪ್ತಿ ಆಸಾ - ಜೆ.ಎಫ್.ಡಿಸೋಜಾ
- ರಾಜಕೀಯ್ ಮನ್ಶ್ಯಾಂಕ್ ಲೊಕಾಚೊ ಹುಸ್ಕೊ ನಾ - ಶಿವಸುಂದರ್
- ಹಾಂವ್ ಏಕ್ ಕಾಣಿಯಾಂಗಾರ್ - ವಲ್ಲಿ ವಗ್ಗ
- ಪುರೋಹಿತ್ಶಾಹಿ - ಆಮ್ಕಾಂ ಬಾಂದುನ್ ಘಾಲ್ಚಿ ಸಾಂಕಳ್ - ಡೊ | ನಾ. ಡಿ ಸೊಜಾ
- ಹಾಂವ್ ತೃತೀಯ ಶಕ್ತಿ - ಚಿನ್ನಾ ಕಾಸರಗೋಡು
ವಿಶೇಸ್
ಎಚ್ಚೆಮ್ ವಿಚಾರ್
ಅಂಕಣಾಂ
ನಯ್ತಿಕ್ ಸಿಪಾಯ್ಗಿರಿ- ದಾದ್ಲ್ಯಾಂಚಿ ಆನಿ ಬಾಯ್ಲಾಂಚಿಯ್!
ಹಿಂದೂ ಜಾಗಂವ್ಚಿ ವೇದಿ ಮ್ಹಳ್ಳ್ಯಾ ಹಲ್ಕಟ್ ಪಂಗ್ಡಾಚ್ಯಾ ಪಿಲ್ಕಟ್ ಸಯ್ನಾನ್ ಆಯ್ಲೆವಾರ್ ಪಡೀಲ್ಚ್ಯಾ ‘ಮೋರ್ನಿಂಗ್ ಮಿಸ್ಟ್’ ಹೋಮ್ಸ್ಟೇ ಚೆರ್ ಘಾಲ್ಲಿ ಧಾಡ್ ಸಂಸಾರ್ಭರ್ ಪಾಸಾರ್ಲಿ. ಹ್ಯಾ ಘಡಿತಾವಿಶಿಂ ವೆವೆಗ್ಳೆ ದಿಶ್ಟಿಕೋನ್ಯಿ ಪತ್ರಾಂನಿ, ಖಬ್ರೆ ಚಾನೆಲಾಂನಿ ದೀಸ್ರಾತ್ ವಾಚುಂಕ್, ಆಯ್ಕೊಂಕ್ ಮೆಳ್ಳೆ. ಅಸಲೆಂ ಏಕ್ ಬುರ್ಶೆಂ ಘಡಿತ್ ಖಂಡನ್ ಕರ್ಚೆಂ ಬೋವ್ ಬರೆಂಚ್.
ಪೂಣ್ ಥೊಡ್ಯಾ ತೆಂಪಾ ಆದಿಂ ಹ್ಯಾಚ್ ಜಾಗಂವ್ಚ್ಯಾ ವೇದಿಚ್ಯಾಂನಿ ನಂತೂರಾಂತ್ ಎಕಾ ಕೊಂಕ್ಣಿ ಕಿರಿಸ್ತಾಂವ್ ಬೀಟ್ ಗ್ರೂಪಾಚ್ಯಾ ಕುಡಾಕ್ ರಿಗೊನ್ ಧಮ್ಕಿ ದಿಲ್ಲೆಂ ಘಡಿತ್ ಮಾತ್ ಗುಪಿತ್ಚ್ ಉರ್ಲೆಂ. ಎಕಾ ರಾತಿಂ ‘ಯೂ ಟ್ಯೂಬ್’ ಹಾಂತುಂ ಮಿರ್ವಲೆಂ ತರೀ ದುಸ್ರೆ ದಿಸಾ "ಸಕಾಳಿಂಚ್ಯಾ ಧುವ್ರೆ"ಬರಿ ನಾಂಚ್ ಜಾಲೆಂ ಶಿವಾಯ್ ಸಕಾಳಿಂಚಿ ಧುವ್ರಿ (ಮೋರ್ನಿಂಗ್ ಮಿಸ್ಟ್) ನಾಂವಾಚ್ಯಾ ಹೋಮ್ಸ್ಟೇಂತ್ ಜಾಲ್ಲ್ಯಾ ಸಾಂಜೆಚ್ಯಾ ಧಾಡಿಬರಿ ಸಂಸಾರಾಕ್ ದಿಸೊಂಕ್ ನಾ. ಹ್ಯಾ ವಿಶಿಂ ಮ್ಹಜೊ ಮಿತ್ರ್ , ವಿಲ್ಸನ್, ಕಿನ್ನಿಗೊಳಿಕ್ ಸಾಂಗ್ಲ್ಲೆತವಳ್ ತಾಣೆಂ ವಿಚಾರ್ಲ್ಲೆಂ ಪಯ್ಲೆಂ ಸವಾಲ್- “ಕೊಣೀ ಕಿತೆಂಯ್ ಕರುಂದಿತ್; ಪೂಣ್ ಹೆಂ ವಿಚಾರುಂಕ್ ಹಿಂದೂ ಜಾಗಂವ್ಚ್ಯಾ ವೇದಿಚ್ಯಾಂಕ್ ಕೊಣೆಂ ಅದಿಕಾರ್ ದಿಲ್ಲೊ?”.
ಹ್ಯಾ ವಿಶಿಂ ಕಳಿತ್ ಆಸ್ಲ್ಯಾ ತುಮಿ ಕಿತ್ಯಾಕ್ಹೆಂ ಘಡಿತ್ ಖಂಡನ್ ಕರುನ್ ಏಕ್ ಉತರ್ ಸಯ್ತ್ ಬರಂವ್ಕ್ ನಾ ಮ್ಹಣ್ ಕೊಣೀ ವಿಚಾರ್ತಿತ್. ಪೂಣ್ ಹಾಕಾ ಕಾರಣ್ ಜರೂರ್ ಆಸಾ. ನಂತೂರ್ಚ್ಯಾ ಹಲ್ಲ್ಯಾಕ್(ಜಾಂವ್ ದೈಹಿಕ್ ವಾ ಮಾನಸಿಕ್) ಒಳಗ್ ಜಾಲ್ಯಾ ವೆಕ್ತಿಂಚ್ಯಾ ಪಂಗ್ಡಾಚೆಂ ನಾಂವ್ ಸಯ್ತ್ ಖಂಯ್ಚ್ಯಾಯ್ ಮಾದ್ಯಮಾಂನಿ ಯೇಂವ್ಕ್ ನಾ. ಬೋವ್ಶ್ಯಾ ಧಾಡಿಕ್ ಒಳೊಗ್ ಜಾಲ್ಲ್ಯಾ ವೆಕ್ತಿಂಕ್ಚ್ ಹಿ ಗಜಾಲ್ ‘ಪಬ್ಲಿಕ್’ ಕರುಂಕ್ ಮನ್ ನಾತ್ಲೆಂ ಕೊಣ್ಣಾ. ಜರ್ ಹಲ್ಲ್ಯಾಕ್ ಒಳೊಗ್ ಜಾಲ್ಲ್ಯಾಂಕ್ಚ್ ಅನ್ನ್ಯಾಯಾವಿರೋದ್ ಪ್ರತಿಭಟನ್ ಕರುಂಕ್ ನಾಕಾ ತರ್ ಕಿತೆಂ ಕರುಂಕ್ ಜಾತಾ? ಆಮ್ಕಾಂ ಹಿ ಧಾಡ್ ಖಂಡನ್ ಕರುನ್ ಬರವ್ನ್ ಕಾಡ್ಯೆತೆಂ. ಪೂಣ್ ಫಾಲ್ಯಾ ಸಾಕಾಳಿಂ ಧಾಡಿಕ್ ಒಳೊಗ್ ಜಾಲ್ಲೆ ಆಪ್ಣಾಚೆರ್ ಹಲ್ಲೊಚ್ ಜಾಂವ್ಕ್ ನಾ ಮ್ಹಣ್ತಿತ್ ತರ್? ಆಮ್ಚ್ಯಾಂಕ್ ಸಮಾಜಿಕ್ ಕಾಳ್ಜೆಪ್ರಾಸ್ ವೆಕ್ತಿಗತ್ ಮರ್ಯಾದ್ಚ್ ಮ್ಹಾನ್ ನೆ. ಅಸಲಿ ಸಳ್ಗಿ ಮೆಳ್ಲ್ಲ್ಯಾನ್ಚ್ ಆಜ್ ಹಿಂದುತ್ವಾಚೆಂ ಆಮಾಲ್ ಚಡ್ಲ್ಲ್ಯಾಂಚೆ ಪಿರ್ಕಿಸ್ ಪಂಗಡ್ ಚಡ್ ಆನಿ ಚಡ್ ಅನಾಉತಾಂ ಕರುಂಕ್ ಪಾವ್ತಾತ್. ಹಾಂತು ಆಪ್ಣಾಚ್ಯಾ ಸ್ವಾತಂತ್ರಾಚೆರ್ ಜಾಲ್ಲೊ ಹಲ್ಲೊ , ಮರ್ಯಾದೆಕ್ ಲಾಗೊನ್ ಲಿಪೊನ್ ದವರ್ಲ್ಲ್ಯಾಂಚೊ ಪಾತ್ರ್ ನಾ ಮ್ಹಣ್ ಕಸೊ ಸಾಂಗ್ಚೊ?
ಥೊಡ್ಯಾ ತೆಂಪಾ ಆದಿಂ ರೀಮಿಕ್ಸಾವಿಶಿಂ ಚರ್ಚಾ ಚಲ್ತಾನಾ ಫಕತ್ ಏಕ್ ಅಬಿಪ್ರಾಯ್ ಉಚಾರ್ಲ್ಲ್ಯಾಕ್ ಜಾಯ್ತೆ ಕೊಂಕ್ಣಿ ತಶೆಂ ಹೆರ್ ಸಂಗೀತ್ಗಾರಾಂನಿ ಆಪ್ಣಾಚೆಂ ರಾವ್ಳೆರ್ಚ್ ಉಜೊ ಪಡ್ಲ್ಲೆಬರಿ ಉಡೊನ್ ಪಡೊನ್ ‘ಫಾಯರ್ ಇಂಜಿನ್ ಹಾಡಿಜೆ, ತಶೆಂ . . . ಅಶೆಂ . . . ಮ್ಹಣ್ ಬೊಬಾಟ್ ಮಾರ್ಲ್ಲಿ. ಪೋರ್ ನಂತೂರಾಂತ್ ಸಂಗೀತ್ಗಾರಾಂಚ್ಯಾ ಘರಾಭಿತರ್ಚ್ ರಿಗೊನ್ ಹಿಂದೂ ಜಾಗಂವ್ಚ್ಯಾ ವೇದಿಚ್ಯಾಂನಿ ‘ನಿಕ್ಲೆನಾ ವಾ *** ದ ಬ್ಯಾಂಡ್ ಯಾ" ಮ್ಹಣ್ ಆಪ್ಲ್ಯಾ ಕಲೆಚೆರ್ಚ್ ಹಲ್ಲೊ ಕರ್ತಾನಾ ಫಾಯರ್ ಇಂಜಿನಾಚೆ ಖಂಯ್ಚ್ಯಾ ಆವ್ರಾಂತ್ ವ್ಹಾಳೊನ್ ಗೆಲ್ಲೆ ಹಾಂವ್ ನೆಣಾಂ !
ಸೊಡ್ಯಾಂ ತಿ ಗಜಾಲ್. ಆತಾಂ ತಾಚ್ಯಾಕೀ ಪಾಶ್ಟ್ ಹಲ್ಲೊ ಜಾಲಾ. ಫಕತ್ ಹಲ್ಲೊ ನ್ಹಂಯ್ ಬಗಾರ್ ಮ್ಹನ್ಶ್ಯಾ ಹಕ್ಕಾಚೊ ಭೊಂಗೊಸ್ತಳ್ ಜಾಲಾ. ಚೆಡ್ವಾಂಚ್ಯಾ ಆಂಗಾರ್ ಹಾತ್ ಘಾಲಾ, ಕಾನ್ಸುಲಾಕ್ ವ್ಹಾಜಾಯ್ಲಾಂ, ಚೆಡ್ಯಾಂಚೆ ಕೇಸ್ ಧರ್ನ್ ವೊಡ್ಲ್ಯಾತ್. ಅಶೆಂ ಕೆಲ್ಲ್ಯಾ ಅನ್ನಾಡ್ಯಾಂನಿ ತಾಣಿಂ ಜಾವ್ನ್ ತಾಂಕಾಂಚ್ ನಾಂವ್ ದವರ್ಲಾಂ- ‘ನಯ್ತಿಕ್ ಪೊಲಿಸ್’ ವಾ ‘ಸಂಸ್ಕ್ರ್ರತೆಚೆ ರಾಕ್ವಲಿ’.
ಸಂಸ್ಕ್ರತಿ ಮ್ಹಳ್ಯಾರ್ ಕಿತೆಂ?
ಜಿಣಿಯೆರೀತ್; ಮ್ಹಳ್ಯಾರ್ ಖಾಣ್ ಜೆವಾಣ್, ನ್ಹೆಸಣ್, ಆಚಾರ್ ವಿಚಾರ್ ವ್ಹಯ್ ತರ್ ತಿ ಕಾಳಾತೆಕೀದ್ ಬದ್ಲತಾ. ಆದಿಂ ಕಾಶ್ಟಿ ಬಾಂದ್ತಲೆ ಮ್ಹಣ್ ಆತಾಂಯ್ ತಶೆಂಚ್ ಕರುಂಕ್ ಜಾತಾ? ಅಯ್ಚ್ಯಾ ಕಾಳಾರ್ ಕಾಶ್ಟೆಪ್ರಾಸ್ ‘ಕಂಫರ್ಟೆಬಲ್’ ನ್ಹೆಸ್ಣಾಂ ಆಯ್ಲ್ಯಾಂತ್. ತ್ಯಾ ಕಾಳಾರ್ ತಸಲಿಂ ನಾತ್ಲಿಂ. ಎಕಾವೆಳಾ ಆಸ್ಲ್ಲಿಂ ತರ್ ಆಮ್ಚೆ ಪೊಣ್ಜೆಯ್ ಜೀನ್ಸ್ ಶಿರ್ಕಾವ್ನ್ ಭೊಂವ್ತೆ ಖಂಡಿತ್. ಆಸೊಂ, ಸಂಸ್ಕ್ರತಿ ಕಾಳಾತೆಕೀದ್ ಬದ್ಲತಾ ಮ್ಹಳೆಂ ಹಾಂವೆಂ. ಹ್ಯಾ ಪಾಟ್ಥಳಾರ್ ಪಳಯ್ಲ್ಯಾರ್ ಜೊ ಕೋಣ್ ಆಪ್ಣಾಕ್ ಸಂಸ್ಕ್ರತೆಚೊ ರಾಕ್ವಲಿ ಮ್ಹಣ್ತಾ ತರ್ ತೊ ಕಾಳಾತೆಕಿದ್ ಬದ್ಲಂವ್ಚ್ಯಾ ಸಂಸ್ಕ್ರೆತೆಕ್ ಅಡ್ಕಳ್ ಹಾಡ್ತಾ ಮ್ಹಣ್ ಜಾಲೆಂ. ಮ್ಹಳ್ಯಾರ್ ಕಾಳಾಚಿ ಪಾಟ್ ಧರುಂಕ್ ತಾಕಾ ತಾಂಕ್ ನಾ, ಹೆರಾಂನಿ ಪಾಟ್ ಧರ್ಚಿ ತಾಚ್ಯಾನ್ ಸೊಸುಂಕ್ ಜಾಯ್ನಾ, ದೆಕುನ್ ತೊ ತಾಚ್ಯಾ ರಾವ್ಲ್ಲ್ಯಾ ಕಾಳಾಚಿ ಸಂಸ್ಕ್ರತಿ ಹೆರಾಂಚೆರ್ ಥಾಪ್ತಾ. ಆಶೆಂ ಬಂದ್ ಪಡ್ಲ್ಲೆಂ ಘಡಿಯಾಳ್ ಆಪ್ಣಾಚೊ ವೇಳ್ ಹೆರ್ ಚಾಲು ಆಸ್ಲೆಲ್ಯಾ ಘಡಿಯಾಂಳಾಂಚೆರ್ಯಿ ಥಾಪುಂಕ್ ಪಳಯ್ತಾ ತಶೆಂಚ್.
ಆನಿಯೇಕ್ ಗಜಾಲ್- ಸಂಸ್ಕ್ರತೆನಾಂವಾನ್ ಥಂಯ್ ಹಾಂಗಾ ಧಾಡ್ ಘಾಲುನ್ ಹಲ್ಲೊ ಕರ್ಚೆ ತರ್ನಾಟೆ ಹಿಂದೂ ಸಂಸ್ಕೃತಿ ಮ್ಹಣ್ ಬೊಬಾಟ್ತಾತ್. ಖಂಯ್ಚಿ ಹಿಂದೂ ಸಂಸ್ಕೃತಿ? ಜೆ ಕೋಣ್ ಶಿಕ್ಪಿ ದಲಿತ್, ಪರಿಶಿಶ್ಟ್ ಜಾತಿಚೆ ಆಸಾತ್ ತೆ ಆಪುಣ್ ಹಿಂದು, ಆಪ್ಣಾಚಿ ಹಿಂದೂ ಸಂಸ್ಕೃತಿ ಮ್ಹಣ್ ಬಿಲ್ಕುಲ್ ಒಪುನ್ ಘೆಂವ್ಕ್ ತಯಾರ್ ನಾಂತ್. ಥೊಡ್ಯಾ ವರ್ಸಾಂ ಆದಿಂ ದಲಿತ್ ಮುಕೆಲಿ ಜಯನ್ ಮಲ್ಪೆಲಾಗಿಂ ಸಂದರ್ಶನ್ ಘೆತಾನಾ ತೊ ಮ್ಹಣಾಲೊ-“ತುಳುನಾಡಾಂತ್ ಆಸ್ಚ್ಯಾ ದೈವಸ್ತಾನ ಮ್ಹಣ್ಜೆ ಸಾಣಾಂಭಿತರ್ ಬೊಟಾಂಕ್ ಬಿಲ್ಕುಲ್ ರೀಗ್ ನಾ. ಪುಜಾ ಕರುಂಕ್ ಹಾಂಚೆಂಚ್ ಮ್ಹಳ್ಳೆ ಪುಜಾರಿ ಆಸಾತ್. ಬ್ರಹ್ಮಕಲಸ ಆನಿ ಸಾಣಾಂಕ್ ಎಕಾಮೆಕಾ ಕಟೀಣ್ ವಿರೋದ್. ಪೂಣ್ ಆತಾಂ ಪೂರಾ ಉಲ್ಟೆಂ ಜಾಲಾಂ. ದೈವಸ್ತಾನ ಆಸ್ಲಿಂ ಪೂರಾ ದೇವಸ್ತಾನ ಜಾವ್ನ್ ಬದ್ಲತಾತ್ ಆನಿ ಬೊಟ್ ಸಾಣಾಂಕ್ ರಿಗೊನ್ ಬ್ರಹ್ಮಕಲಸ ಕರ್ತಾತ್. ನಿಜಾಯ್ಕಿ ಸಾಣಾಚೆ ಮುಕೆಲಿ ವಾಲೆಂಟಿಯರ್ ಜಾವ್ನ್ ವಾವುರ್ತಾತ್.” ಹಿ ಗಜಾಲ್ ಜಯನ್ ಮಲ್ಪೆತಸಲ್ಯಾ ಶಿಕ್ಪಿ ದಲಿತಾಂಕ್ ಬರಿಚ್ ಕಳಿತ್ ಆಸಾ. ಪೂಣ್ ಗಾಂವ್ಚೆ ಅಶಿಕ್ಪಿ ತರ್ನಾಟ್ಯಾಂಕ್ ಹಾಚೆಂ ತಾಳ್ ಮೂಳ್ ಕಳಿತ್ ನಾ. ಅಸಲ್ಯಾ ಸಂಸ್ಕ್ರತೆ ನಾಂವಾಚ್ಯಾ ಧಾಡಿಂತ್ ಚಡ್ತಾವ್ ಆಸ್ಚೆ ದಲಿತ್ ಚೆಡೆಚ್. ಅಸಲ್ಯಾ ಧಾಡಿತ್ ಬಾಮುಣಾಂಚೆ ಶೀದಾ ಮೆತೆರ್ ಜಾಯ್ನಾಂತ್; ಬಗಾರ್ ತಾಣಿಂ ವಾಪಾರ್ಚೆಂಚ್ ಅಸಲ್ಯಾ ಅಶಿಕ್ಪ್ಯಾಂಕ್. ಹಿಂದೂ ಸಂಸ್ಕ್ರತೆನಾಂವಾನ್ ಹಾಣಿಂ ರಾಕ್ಚಿ ಫಕತ್ ಬೊಟಾಂಚಿ ಸಂಸ್ಕ್ರತಿ ಶಿವಾಯ್ ಹಾಂಚಿ ನ್ಹಂಯ್. ‘ಮಡೆಸ್ನಾನ’, ‘ಬೆತ್ತಲೆಸೇವೆ’- ಅಸಲ್ಯಾ ಆಚರಣಾಂನಿ ಹಾಂಕಾಂ ಬೊಟಾಂನಿ ಕೀಳ್ ಕರ್ಚಿ ಗಜಾಲ್ ಹಾಂಚ್ಯಾ ಮತಿಕ್ಚ್ ರಿಗನಾ. ಹಾಚೆವಿರೋದ್ ಝುಜ್ಚೆಂ ಸೊಡ್ನ್ ತ್ಯಾಚ್ ಬೊಟಾಂಚಿ ಸಂಸ್ಕ್ರತಿ ರಾಕ್ಚೆ ಖಾತಿರ್ ಕೊಣಾಕೊಣಾಚ್ಯಾ ಆಂಗಾರ್ ಹಾತ್ ಘಾಲ್ನ್ ಹೆ ಜಯ್ಲಾಕ್ ವೆತಾತ್.
ಪೋರ್ ಸ್ಟೇಹೋಮಾಂತ್ ಜಾಲ್ಲ್ಯಾ ಪಾರ್ಟೆಂತ್ ಕೊಣೆಂಯ್ ಕೊಣಾಕೀ ಕಿಡ್ನ್ಯಾಪ್ ಕರುನ್ ಹಾಡುಂಕ್ ನಾ. ವಾ ಪ್ರಾಯೆಕ್ ಪಾವನಾತ್ಲಿಂಯ್ ಕೊಣೀ ನಾತ್ಲಿಂ ಥಂಯ್ಸರ್. ತಾಣಿಂ ಎಕಾಮೆಕಾ ಮೆಳೊನ್ ಪಾರ್ಟಿ ಕೆಲ್ಯಾರ್ ಹಾಂಕಾಂ ಕಿತ್ಯಾಕ್ ಪೊಡ್ಕಾಣಿ? ತ್ಯಾ ಚೆಡ್ಯಾ ಚೆಡ್ವಾಂನಿ ಪಿಯೆಂವ್ಚ್ಯಾ ಏಕ್ ಗಿಲಾಸ್ ಬಿಯೆರಿಪ್ರಾಸ್ ಹ್ಯಾ ಪಡ್ಪಶ್ಯಾಂಥಂಯ್ ಆಸ್ಚೆಂ ಹಿಂದುತ್ವಾಚೆಂ ‘ಹ್ಯಾಂಗ್ ಓವರ್’ಚ್ ಸಮಾಜೆಕ್ ಚಡ್ ಮಾರೆಕಾರ್.
ಆನಿಯೆಕ್ಲೊ ಮುಕೆಲಿ ಮಾದ್ಯಮಾಂಮುಕಾರ್ “ಥಂಯ್ಸರ್ ವೇಶ್ಯಾವಾಟಿಕಾ ಚಲ್ತಲೆಂ, ತಾಂಚ್ಯಾ ಆಂಗಾರ್ ವಸ್ತುರ್ ನಾತ್ಲೆಂ” ತಶೆಂ ಅಶೆಂ ಮ್ಹಣ್ ತೊಂಡಾಕ್ ಆಯಿಲ್ಲೆಂ ಝಾಂಕ್ಳುಂಕ್ ಲಾಗ್ಲೊ. ಥಂಯ್ಸರ್ ಕಿತೇಂಯ್ ಚಲೊಂ ಸಾಯ್ಬಾ, ತುಮಿ ಕೋಣ್ ವಿಚಾರ್ ಕರುಂಕ್- ವೇಶ್ಯೆಂಚೆ ಪೊದೊರ್ನ್ಗಿ? ಹ್ಯಾ ಘಡಿತಾವಿಶಿಂ ‘ಸ್ಟಡಿ’ ಕರುಂಕ್ ಪಯ್ಸ್ ಥಾವ್ನ್ ಆಯಿಲ್ಲ್ಯೊ ಥೊಡ್ಯೊ ಸ್ತ್ರೀಯೊ ಆಪ್ಯಾ ಮಾತ್ಯಾಕ್ ಬಿ.ಜೆ.ಪಿ.ಚೆಂ ಸಾಳಕ್ಚ್ ಮಾಳ್ನ್ ಆಯಿಲ್ಲಿಂ ಕೊಣ್ಣಾ. ಥಂಯ್ಸರ್ ಜಾಲ್ಲೊ ಹಲ್ಲೊ ಖಂಡನ್ ಕರ್ಚೆಂ ಸೊಡ್ನ್ “ತಾಣಿಂ ಪಾರ್ಟಿ ಕೆಲ್ಲಿಚ್ ಚೂಕ್, ಹೋಮ್ ಸ್ಟೇಕ್ ಪರ್ವಣ್ಗಿ ನಾತ್ಲಿ” ಅಸಲಿಂ ವಾಕ್ಮೂಲಾಂ ದಿಲಿಂ. ರೋಂಗ್ ಸಾಯ್ಡಿನ್ ಆಯಿಲ್ಲಿ ಲೊರಿ ಆಪ್ಟೊನ್, ಬಾಯ್ಕಾವಾಲ್ಯಾಚ್ಯಾ ಪಾಂಯಾಂವಯ್ಲ್ಯಾನ್ ರೊದಾಂ ಪಾಶಾರ್ ಜಾಲಿಂ ಮ್ಹಣ್ ಚಿಂತ್ಯಾಂ. ಬಯ್ಕಾವಾಲೊ ದುಕಿನ್ ಬೊಬಾಟ್ತಾನಾ, ಜಾಯ್ ಆಸ್ಲ್ಲೆ ತುರ್ತ್ ಕ್ರಮ್ ಘೆಂವ್ಚೆ ಸೊಡ್ಣ್ ‘ಬಾಯ್ಕಾವಾಲ್ಯಾನ್ ಹೆಲ್ಮೆಟ್ ಘಾಲುನಾತ್ಲೆಂ’ ಮ್ಹಣ್ ವಾದ್ ಮಾಡ್ಲ್ಲೆಬರಿ ಜಾಲಿ ಹಾಂಚಿ ಗತ್.
ನಯ್ತಿಕ್ ಸಿಪಾಯ್ಗಿರಿವಿಶ್ಯಾಂತ್ ಆನಿಯೇಕ್ ಗರ್ಜೆಚಿ ಗಜಾಲ್ ಸಾಂಗೊಂಕ್ ಆಸಾ. ತಿ ಕಸಲಿಗೀ ಮ್ಹಳ್ಯಾರ್ ಹಿ ಸಿಪಾಯ್ಗಿರಿ ದಾದ್ಲ್ಯಾಂಚಿ ಮಾತ್ ನಾ ಬಗಾರ್ ತಾಚೆವರ್ನಿ ಚಡ್ ಬಾಯ್ಲಾಂಚಿಯ್ ಆಸಾ! ಪೂಣ್ ಹಿ ಬಾಯ್ಲಾಂಚಿ ಶಿಪಾಯ್ಗಿರಿ ಖಬ್ರೆ ಚಾನೆಲಾಂನಿ ಫಕತ್ ಬ್ರೇಕಿಂಗ್ ನೀವ್ಸ್ ಜಾವ್ನ್ ದೆಕ್ತೆಲ್ಯಾಂಕ್ ಮನೋರಂಜನ್ ದಿತಾ ಶಿವಾಯ್ ಹ್ಯಾವಿಶಿಂ ಅಸಲಿ ಗಂಭೀರ್ ಚರ್ಚಾ ವಾ ಖಂಡನೆಕ್ ಬಿಲ್ಕುಲ್ ಒಳೊಗ್ ಜಾಯ್ನಾ. ಎದೊಳ್ ಪರ್ಯಾಂತ್ ಹ್ಯಾ ಬಾಯ್ಲಾಂಚ್ಯಾ ಸಿಪಾಯ್ಗಿರಿ ವಿಶ್ಯಾಂತ್ ಕೊಣೆಂಯ್ ಆವಾಜ್ ಉಟಯಿಲ್ಲೊ ಹಾಂವೆಂ ಆಯ್ಕೊಂಕ್ ನಾ.
ವಿಶಯ್ ಕಿತೆಂಗೀ ಮ್ಹಳ್ಯಾರ್ ಏಕ್ ಬಾಯ್ಲ್ ಮ್ಹನಿಸ್ ಆಪ್ಲ್ಯಾ ಘೊವಾ ವಿಶ್ಯಾಂತ್ ವಾ ದಫ್ತರಾಂತ್ ಆಪ್ಯಾ ಬೊಸಾವಿಶ್ಯಾಂತ್ ಕಿತೆಂ ತರೀ ದೂರ್ ದಿತಾ-ಲಾಗ್ಶಿಲ್ಯಾ ವಾ ಒಳ್ಕಿಚ್ಯಾ ಸ್ತ್ರೀ ಸಂಘಟನಾಲಾಗಿಂ. ಚಡ್ತಾವ್ ಹಾಂಚ್ಯಾ ದುರಾಂನಿ ಆಸ್ಚಿಂ ಕಾರಣಾಂ ದೋನ್ಚ್- ‘ವರದಕ್ಶಿಣೆ ಕಿರುಕುಳ’ ಆನಿ ‘ಲೈಂಗಿಕ ಕಿರುಕುಳ’. ದಿಲ್ಲೆಂ ದೂರ್ ಕಿತ್ಲೆಂ ಸತ್ ಆನಿ ಕಿತ್ಲೆಂ ಫಟ್ ತೆಂ ಪಾರ್ಕುಂಕ್ ಕೊಣೀ ವಚನಾ. ದೂರ್ ದಿಲ್ಲೆಂಚ್ ಆಯ್ಲಿಂ ಥೊಡಿಂ ಬಾಯ್ಲಾಂ ವ್ಹಾಣೆ ಆನಿ ಸಾರ್ಣಿಖುಂಟೊ ಘೆವ್ನ್. ಹಾಂ, ಸಾಂಗ್ಲ್ಲೆಬರಿ ಸಂಘಪರಿವಾರಚ್ಯಾಂನಿ ಕರ್ಚೆಬರಿಂ ಹಿಂಯ್ ಚಾನೆಲಾಂಕ್ ಸಾಂಗೊನ್ ಕ್ಯಾಮೆರಾಸವೆಂಚ್ ಯೆತಾತ್. ಘರ್ ಮ್ಹಣ್ ನಾ, ದಫ್ತರ್ ಮ್ಹಣ್ ನಾ. ಕೊಣಾಚೆರ್ ಆಪ್ರಾದ್ ಮಾಂಡ್ಲಾ ತಾಕಾ ಸರ್ಸರಿತ್ ವಾಜಾಯ್ತಾತ್, ತಾಚೆಂ ಖೊಮಿಸ್, ಬನಿಯನ್ ಸಯ್ತ್ ಪಿಂಜ್ತಾತ್. ತರ್ ಹ್ಯಾ ಬಾಯ್ಲಾಂಕ್ ಕೊಣೆ ಅದಿಕಾರ್ ದಿಲ್ಲೊ? ಪೊರ್ಚ್ಯಾ ಹೋಮ್ಸ್ಟೇಕ್ ರಿಗೊನ್ ಚೆಡ್ವಾಂಕ್ ಮಾರ್ಲ್ಲ್ಯಾ ಘಡಿತಾಕ್ ಆನಿ ಅಸಲ್ಯಾ ಘಡಿತಾಂಕ್ ಕಾಂಯ್ ಫರಕ್ ಆಸಾ? ಜರ್ ಚೆಡ್ವಾಂಚೆರ್ ಹಲ್ಲೊ ಕೆಲ್ಲ್ಯಾ ಅನ್ನಾಡ್ಯಾಂಚೆರ್ ಗೂಂಡಾ ಕಾಯ್ದೊ ಘಾಲಿಜೆ ತರ್ ಅಸಲ್ಯಾ ಬಾಯ್ಲಾಂಚೆರ್ಯಿ ಘಾಲಿಜೆ ನ್ಹಂಯ್ ಗಿ?
ಆದ್ಲೆಪಾವ್ಟಿ ಅಸಲೆಂ ಏಕ್ ಘಡಿತ್ ಘಡ್ಲೆಂ. ದಫ್ತರಾಂತ್ ವಾವುರ್ಚ್ಯಾ ಎಕಾ ಸ್ತ್ರೀಯೆನ್ ದೂರ್ ದಿಲೆಂ ಮ್ಹಣ್ ಶ್ರೀ ಸಂಘಟನಾಂಚ್ಯಾಂನಿ ದಫ್ತರಾಕ್ ರಿಗೊನ್ ಚಾನೆಲಾಂಚ್ಯಾ ಕ್ಯಾಮೆರಾಮುಕಾರ್ ಬೊಸಾಕ್ ಸರ್ಸರಿತ್ ವ್ಹಾಜಯ್ಲೆಂ. ಖೊಮಿಸ್ ಬನಿಯನ್ ಪಿಂಜ್ಲೆಂ. ಆನಿ ಥಂಯ್ ಥಾವ್ನ್ ಶೀದಾ ಸ್ಟೂಡಿಯೋಕ್ ವಚೊನ್ ಸಕ್ಡಾಂಮುಕಾರ್ ಆಪ್ಣಾಕ್ ಆನ್ಯಾಯ್ ಜಾಲಾ ಮ್ಹಣ್ ವಿವರುಂಕ್ ಲಾಗ್ಲಿಂ. ಪುನೆಗೆಲ್ಲೊ ಬೋಸ್ ಕಂಪ್ಲೆಂಟ್ ದೀವ್ನ್, ಸರ್ವ್ ದಾಕ್ಲ್ಯಾ ಸಮೇತ್ ತ್ಯಾಚ್ ಸ್ಟುಡಿಯೊಕ್ ಆಯ್ಲೊ ಆನಿ ಹ್ಯಾ ಘಡಿತಾಪಾಟ್ಲೆಂ ಸತ್ ಕಿತೆಂ ಮ್ಹಣ್ ಸಾಂಗೊಂಕ್ ಲಾಗ್ಲೊ. ಪಳಯ್ತಾನಾ ಪೂರಾಯ್ ಕಣ್ಣ್ಕಟ್ಟ್ ಆನಿ ಫಟ್ಕಿರೆಂ ದೂರ್. ಪೊಲಿಸಾಂನಿ ಕುಡಾಂವ್ಕ್ ಸೊದ್ತಾನಾ ದೂರ್ ದಿಲ್ಲಿ ಸ್ತ್ರೀ ಆನಿ ಸ್ತ್ರೀ ಸಂಘಟನಾಚಿ ವ್ಹಡಿಲ್ನ್ ದೊಗಾಂಯ್ ಪಿಡ್ಚ್ಯೊ!
ಇತ್ಲೆಂ ಬರಯ್ತಾನಾ ಹಾಂವ್ ಕಾಂಯ್ ಸ್ತ್ರೀಯಾಂವಿರೋದ್ ಬರಯ್ತಾಂ ವಾ ದಾದ್ಲ್ಯಾವಾದ್ ಮಾಂಡ್ತಾಂ ಮ್ಹಣ್ ಕೊಣೆಂಯ್ ಚಿಂತ್ಚೆಂ ನಾಕಾ. ಹಾಂವೆಂ ಮ್ಹಣ್ಚೆಂ ಇತ್ಲೆಂಚ್ ಕಿ - ಕಾನೂನ್ ಹಾತಿಂ ಘೆವ್ನ್ ಕೊಣಾಚ್ಯಾಯ್ ಆಂಗಾರ್ ಹಾತ್ ಘಾಲ್ಚೊ ವಾ ಹಲ್ಲೊ ಕರ್ಚೊ ಚೂಕ್ ಮ್ಹಣ್; ಜಾಂವ್ ತೆ ದಾದ್ಲೆ ವಾ ಬಾಯ್ಲಾಂ. ಪೊರ್ಚ್ಯಾ ಘಡಿತಾಂತ್ ಜಾಲ್ಯಾರೀ ಚೆಡ್ವಾಚೆರ್ ಹಲ್ಲೊ ಕೆಲ್ಲ್ಯಾಕ್ ಜಾಂವ್ಚಿ ಶಿಕ್ಶ್ಯಾಚ್ ಚೆಡ್ಯಾಕ್ ಅರ್ದೊ ವಿಣ್ಗೊ ಕರ್ನ್, ಕೇಸ್ ಧರ್ನ್ ವೊಡ್ಲ್ಲ್ಯಾಕ್ಯಿ ಜಾಯ್ಜೆ. ಇತ್ಲೆಂ ಮಾತ್ರ್ ನಯ್ ಜಾಯ್ತೆಕಡೆ ದಾದ್ಲ್ಯಾಚೆರ್ ದಾದ್ಲೆ ಆನಿ ಬಾಯ್ಲೆಚೆರ್ ಬಾಯ್ಲಾಂಯ್ ಹಲ್ಲೊ ಕರ್ತಾತ್. ತಾಂಕಾಂಯ್ ಶಿಕ್ಶ್ಯಾ ಜಾಯ್ಜೆ. ಬಾಯ್ಲಾಂಚೆರ್ ಆಪ್ಲೆಂ ‘ಪುರುಶತ್ವ್’ ದಾಕಯಿಲ್ಲ್ಯಾ ಅನ್ನಾಡ್ಯಾಂಚ್ಯಾ ಹಾತಾಕ್ ಖೊಡೊ ಘಾಲ್ತಾನಾ, ದಾದ್ಯಾಂಚೆರ್ ಆಪ್ಲೆಂ ‘ಸ್ತ್ರೀಪಣ್’ ದಾಕಯಿಲ್ಲ್ಯಾ ಬಾಯ್ಲಾಂಚಿಂ ಕಾಂಕ್ಣಾಂ ವರ್ಣುಂಚಿಂ ಸಾರ್ಕೆಂ ನ್ಹಂಯ್. ಫಕತ್ ಸೊಬಿತ್ ಚೆಡ್ವಾಚ್ಯಾ ಪೊಲ್ಯಾಕ್ ಆಪ್ಟಲ್ಲೆಂ ಏಕ್ ಥಾಪಡ್ ಸಮಾಜೆಂತ್ ಹೆರ್ ಜಾಗ್ಯಾರ್ ಜಾಂವ್ಚೆ ಸಾರ್ಣಿಖುಂಟೊ, ವ್ಹಾಣಾಂಚ್ಯಾ ಮಾರಾಂಕ್ ಪುಸುನ್ ಉಡಯ್ನಾ ಜಾಂವ್ ಮ್ಹಳ್ಳಿ ಮ್ಹಜಿ ಆಶಾ.
ಅಸಲಿ ದಾದ್ಲೆ ಆನಿ ಬಾಯ್ಲಾಂಚಿ ನಯ್ತಿಕ್ ಸಿಪಾಯ್ಗಿರಿ ವರವ್ನ್ ಪಳಯ್ತಾನಾ ಉಟೊನ್ ದಿಸ್ಚೆಂ ಕಾರಣ್ಚ್ ಪೊಲಿಸ್ ವೆವಸ್ತೆಚಿ ನಿಶ್ಕ್ರಿಯತಾ. ಹಾಕಾ ಆನಿಯೇಕ್ ದಾಕ್ಲೊ ದಿಂವ್ಚೊ ತರ್, ಆತಾತಾಂ ಏಕ್ ನವೆಂಚ್ ಫೇಶನ್ ಸುರು ಜಾಲಾಂ. ಕಿತೆಂಗಿ ಮ್ಹಳ್ಯಾರ್ ಆಜ್ ಕಾಲ್ ಆಪ್ಣಾಚೆರ್ ಕಸಲೋಯ್ ಆನ್ನ್ಯಾಯ್ ಜಾಲೊ ತರ್ ತಿಂ ಪೊಲಿಸ್ ಸ್ಟೇಶನಾಕ್ ವಚನಾಂತ್; ಬಗಾರ್ ಚಾನೆಲಾಂಚ್ಯಾ ಸ್ಟೂಡಿಯೊಕ್ ರಿಗೊನ್ ಅನ್ನ್ಯಾಯ್ ಸಾಂಗ್ತಾತ್. ಹಾಚೊ ಅರ್ಥ್ ಕಿತೆಂ? ಲೊಕಾಕ್ ಪೊಲಿಸ್ ವೆವಸ್ತೆಚೆರ್ ಪಾತ್ಯೆಣಿ ನಾ ಮ್ಹಣ್ ನೆ? ಹಿ ಗಜಾಲ್ ಪೊಲಿಸಾಂನಿ ಸಮ್ಜಜೆ. ಹೆಂ ಸಮ್ಜನಾಸ್ತಾನಾ ಮಾದ್ಯಮಾಂನಿ ಆಮ್ಕಾಂ ಖಬರ್ ದೀಂವ್ಕ್ ನಾ ಮ್ಹಣ್ ಆಜ್ ಪೊಲಿಸ್ ಬೊಬಾಟ್ತಾತ್.
ಅಸಲಿ ನಯ್ತಿಕ್ ಸಿಪಾಯ್ಗಿರಿ ಆಡಾವ್ನ್ ಸಮಾಜೆಚಿ ಭಲಾಯ್ಕಿ ಸಾಂಬಾಳಿಜೆ ತರ್ ಪೊಲಿಸಾಂನಿ ಕಾಂಯ್ ದಾಕ್ತೆರ್ಗಿ ಜೊಡಿಜೆ ಮ್ಹಣ್ ನಾ. ಭಾಯ್ಲ್ಯಾ ಗಾಂವಾಂತ್ ಶಿಕೊನ್ ವ್ಹಡ್ ವ್ಜಡ್ ಮೆಡಲಾಂ ಜೊಡಿಜೆ ಮ್ಹಣ್ ನಾಂತ್. ಆಪ್ಲ್ಯಾ ಭುಜಾಂಚೆರ್ ರಾಸ್ ನೆಕೆತ್ರಾಂ ಖೊವಯ್ಜೆ ಮ್ಹಣ್ಯಿ ನಾ. ಫಕತ್ ಕಾನೂನ್ ರಾಕ್ಚೆ ಸಾದೆ ವಾಚ್ಮೆನ್ ಜಾಲ್ಯಾರ್ ತಿತ್ಲೆಂಚ್ ಪಾವ್ತಾ!
-ವಿಲ್ಸನ್, ಕಟೀಲ್
• ಸ್ವತಂತ್ರ್ - ಖಾಸ್ಗಿ ವಾ ಪಬ್ಲಿಕ್ ? - ಅವಿನಾ ಮಿಯಾರ್
• ಕಾವಾತೊ ಲಾವ್ಯಾಂ ಆನಿ ರಾಕೊನ್ ರಾವ್ಯಾಂ - ಆಸ್ಟಿನ್ ಡಿ ಸೊಜಾ , ಪ್ರಭು , ಚಿಕಾಗೊ
• ದೇವಾಚೊಚ್ ಆಧಾರ್ ಆತಾಂ ಮಂಗ್ಳುರಾಕ್ - ಆಸ್ಟಿನ್ ಡಿ ಸೊಜಾ , ಪ್ರಭು , ಚಿಕಾಗೊ
• ಸಮಡ್ತ್ ಆನಿ ಸಂಸ್ಕೃತಿ ವೆಗ್ಳಿ ಕರಾ : ಎಚ್ಚೆಮ್ ಪೆರ್ನಾಲ್
• ಏಕ್ ಉಗ್ತೆಂ ಪತ್ರ್ : ಮೆಲ್ಕ ಮಿಯಾರ್
• ಪಬ್ಬಾ ಥಾವ್ನ್ ರೆಸಾರ್ಟಾ ಪರ್ಯಾಂತ್ : ಓಸ್ಕರ್ , ವಗ್ಗ
• ಥೂ.. ಹಾ೦ಚ್ಯಾ ಜಲ್ಮಾಕ್..!! : ಓಸ್ಕರ್ , ವಗ್ಗ
• ಅಶೀ ಏಕ್ ’ಕೊಂಕ್ಣೆಚಿ’ ಖಬರ್ : ಎಚ್ಚೆಮ್
ಸಮಾಜೆಂತ್ ಚಲ್ಚೆಂ ಸತ್ ಘಜಾಲ್ ತುವೆಂ ಉಗಾಡ್ಲಾಂಯ್. ಅಮಿಂ ಏಕ್ ನಾಂ ಏಕ್ ರಿತಿರ್ ಗುಲಾಮ್ ಜಾಂವ್ನ್ ಜಿಯೆವ್ನ್ ಅಸಾಂವ್. ಅಸಲೆ ಭಾಸ್ ನಾತ್ಲ್ಲೆ ತರ್ನಾಟೆ ಸಮಾಜ್ ತಾಂಚ್ಯಾ ಪಾಟ್ಲ್ಯಾನ್ ಅಸ ಮ್ಹಣೊನ್, ಅಶೆಂ ರಾಪಟ ಕರ್ತಿತ್ ತಾರ್, ಕುಶಿಚ ದೇಶ ಬರಿ ಸಕ್ಡಾಂಕ್ ಬಂದೂಕ್ ಹಾತಿಂ ಘೆವ್ನ್ ಜಿಯೆಂವ್ಚೊ ಕಾಳ್ ಲಾಗಿಂ ಪಾವತ್ ಮ್ಹಣ್ಚಾಂತ್ ಚೂಕ್ ಜಾಂವ್ಚಿ ನಾಂ.
ಸಮಾ ಸಾಂಗ್ಳೆಯ್ ವಿಲ್ಸಾನ್ ಬಾಬ್, ಹ್ಯಾ ಆಶಿಕ್ಪಿ ಅನ್ನಾಡ್ಯಾಂಚಾ ತಕ್ಲೆಂತ್ ತ್ಯಾ ಬಾಮುಣಾಂಚೊ ಉದ್ದೇಶ್ ಖಳಿತ್ ನಾ. ಬೊಟ್ ತಾಂಚಾ ಘರಾನಿ ಸುಶೆಗಾತ್ ಬೊಸೊನ್ ರಾಜಾಕಾರಾಣಿ ಬೊರಿಂ ಹ್ಯಾ ಆಶಿಕ್ಪಿ ಲಾಗಿಂ ಕಾಮಾ ಕರೆತಾತ್ ಅನಿ ಪಿಲಾತಾ ಬರಿಂ ಹಾತ್ ದುತಾತ್. ಹೊ ವಿಶಾಯ್ ಹಾಂಚಾ ಕಟ್ಟೆ ಬಿತರ್ ಕೆದ್ನಾ ರಿಗಾತ್ ತೆದ್ನಾ ಆಮ್ಕಾ ಸುಶೆಗ್ ಮೆಳಾತ್ ಮ್ಹಣ್ ಹಾಂವ್ ಚಿಂತ್ತಾ. ಅನ್ಯೆಕ್ ಸಂಗತ್ ತುಂವೆ ಸಾಂಗಿಲ್ಲಿ ಜಾವ್ನಾಸಾ ಆಮ್ಚಿ ಪೊಲಿಸ್ ಸಿಬಾಂಧಿ. ತಾಂಚಾ ಪೊಟಾಕ್ ಕೈಂ ಶೆಳ್ ಪಡ್ತಾ ತೈಂ ತೆ ಗುಂವ್ತಾತ್ ವಾರ್ಯಾಕ್ ಗಿರ್ಗಿಟಿ ಗುಂವಿಲ್ಯಾ ಬರಿ. ಕಿತೆಂ ಕರ್ಚೆಂ ಆಮ್ಚೆ ಗ್ರಾಚ್ಚಾರ್ ಆಯ್ಲ್ಯಾತ್. ಆತಾಂ ಸಧ್ಯಾಕ್ ಎಲಿಸಾಂವ್ ಯೆಂವ್ಚಾರ್ ಆಸಾ ಪುಣ್ ಅಮಿ ಕಿತ್ಲೆ ಎಕ್ವೊಟಿತ್ ಮ್ಹಣ್ ಸಮ್ಜಂಕ್ ಚಡ್ ವೇಳ್ ವೆಚೊ ನಾ... ತೊ ಗೀ, ಹೊ ಗೀ, ಅಮ್ಚಾ ವಾದಾಂತ್ ಅಮ್ಕಾ ಬಾಚಾವಿ ದಿಸಾನಾ. ಸರ್ವೆಸ್ಪರಾ ಅಮ್ಕಾ ತುಂ ರಾಕ್ ಹ್ಯಾ ಎಮ್ಕೊಂಡಾಂತ್ಲೆ!!!!