Kittall Media Network

Kittall Media Network

KITTALL is a unique Konkani literary website. It is the dream project of well-known Konkani writer and critic Henry Mendonca popularly known as H M Pernal. Kittall carries short stories , poems , essays , novel series, columns by reknowned writers, interview with writers and artists , videos, review on new books , music and art . It also publishes Special reports of Konkani events and news related to konkani literature , art and music. KITTALL was inaugurated on 5th February 2011 by celebrated Konkani poet , President , Kavita Trust and Director (operations) of Daijiworld Media Private Limited, Mr. Melvyn Rodrigues.

Recent Archives

ಮಾನೆಸ್ತ್ ಪಾವ್ಲು ಮೊರಾಸಾಕ್ 'ಸಮಾಜ ರತ್ನ' ಪ್ರಶಸ್ತಿ

Kittall Media Network        2017-08-10 20:49:15
  |     |  



 

ಕೊಂಕ್ಣಿ ಸಂಘಟಕ್, ಸಂಶೋಧಕ್ ಆನಿ ಸಾಹಿತಿ ಮಾನೆಸ್ತ್ ಪಾವ್ಲು ಮೊರಾಸ್ ಹಾಂಕಾ ಜ್ಞಾನ ಮಂದಾರ ಟ್ರಸ್ಟ್(ರಿ) ಬೆಂಗ್ಳುರ್ ಹಾಣಿ ಆಪ್ಲ್ಯಾ ರುಪ್ಯಾಳ್ಯಾ ಉತ್ಸವಾಚ್ಯಾ ಸುವಾಳ್ಯಾರ್, ವಿವಿಧ್ ಶೆತಾಂನಿ ಸಾಧನ್ ಕೆಲ್ಲ್ಯಾ ಗಣ್ಯ್ ವೆಕ್ತಿಂಕ್ ದಿಂವ್ಚ್ಯಾ ’ಸಮಾಜ ರತ್ನ’ ಪ್ರಶಸ್ತೆಖಾತಿರ್ ವಿಂಚುನ್ ಕಾಡ್ಲಾಂ ಆಸುನ್, ಹಿ ಪ್ರಶಸ್ತಿ ಸನ್ವಾರಾ, 12 ಅಗೊಸ್ತ್ 2017 ವೆರ್ ಮಂಗ್ಳುರ್ಚ್ಯಾ ಟಾವ್ನ್‌ಹೊಲಾಂತ್ ಸಾಂಜೆಚ್ಯಾ 4.30 ವೊರಾರ್ ಮಾಂಡುನ್ ಹಾಡ್ಲೆಲ್ಯಾ ಸಂಭ್ರಮಿಕ್ ಕಾರ್ಯಾಂತ್ ಪ್ರದಾನ್ ಕರ್ತಲೆ ಮ್ಹಣ್ ಪತ್ರಾಪರ್ಗಟ್ಣೆಂತ್ ಕಳಯ್ಲಾಂ. ದಕ್ಷಿಣ ಕನ್ನಡ ಜಿಲ್ಲ್ಯಾಚೊ ಖಬಾಡ್ದಾರ್ ಮಂತ್ರಿ ಮಾನೆಸ್ತ್ ರಮಾನಾಥ ರೈ, ಮಾನೆಸ್ತ್ ಪಾವ್ಲು ಮೊರಾಸ್ ಆನಿ ಹೆರಾಂಕ್ ’ಸಮಾಜ ರತ್ನ’ ಪ್ರಶಸ್ತಿ ಪ್ರಧಾನ್ ಕರ್ತಲೊ. ಹ್ಯಾ ಕಾರ್ಯಾಕ್ ಮಂತ್ರಿ ಕರ್ನಾಟಕ ಸರ್ಕಾರಾಚೊ ಮಂತ್ರಿ ಮಾನೆಸ್ತ್ ಯು.ಟಿ. ಖಾದರ್ ಹಾಜರ್ ಆಸ್ತಲೊ.

 

ಸಾಂಗಾತಾ ಡಾ| ಎಂ. ಮೋಹನ್ ಆಳ್ವ, ಮಾನೆಸ್ತ್ ಎ. ಸದಾನಂದ ಶೆಟ್ಟಿ, ಮಾನೆಸ್ತ್ ಎ. ಜೆ. ಶೆಟ್ಟಿ, ಡಾ| ಸುಧೀರ್ ಪೈ ಕೆ. ಎಲ್ ಮಾನಾಚೆ ಸಯ್ರೆ ಜಾವ್ನ್ ಹಾಜರ್ ಆಸೊನ್ ಧರ್ಮದರ್ಶಿ ಶ್ರೀ ಹರಿಕೃಷ್ಣ ಪುನರೂರು ಹೊ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಸೊಭಯ್ತಾಲೊ.

 

ಕಾರ್ಯಾಚೊ ವಾಂಟೊ ಜಾವ್ನ್ ಸೌರಭ ನೃತ್ಯ ಸಂಸ್ಥೆ, ಮಂಗಳೂರು , ನೃತ್ಯ ಭಾರತಿ, ಮಂಗಳೂರು ಆನಿ ಸಪ್ತವರ್ಣ ಸಾಂಸ್ಕೃತಿಕ ಅಕಾಡೆಮಿ, ಮೂಡಬಿದರೆ ಹಾಂಚೆಥಾವ್ನ್ ಸಾಂಸ್ಕೃತಿಕ್ ಕಾರ್ಯೆಂ ಸಾದರ್ ಜಾತೆಲೆಂ.

 

ಕೊಂಕ್ಣಿ ಚಳ್ವಳೆಕಾರ್, ಸಂಶೋದಕ್ ಆನಿ ಸಂಘಟಕ್ ಮಾನೆಸ್ತ್ ಪಾವ್ಲು ಮೊರಾಸ್ ಪಾಟ್ಲ್ಯಾ  ಸುಮಾರ್ 30 ವರ್ಸಾಂ ಥಾವ್ನ್ ಕೊಂಕ್ಣಿ ಚಳ್ವಳೆಂತ್ ಸಂಪೂರ್ಣ್‌ಪಣಿ ಮೆತೆರ್ ಆಸಾ. ತೋ ಕರ್ನಾಟಕ ಕೊಂಕ್ಣಿ ಭಾಶಾ ಮಂಡಳಾಚೊ ಅಧ್ಯಕ್ಷ್ ಜಾವ್ನಾಸ್ತಾನಾ ಕರ್ನಾಟಕಾಂತ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಜಾಂವ್ಕ್ ಆನಿ ಸಂವಿದಾನಾಚ್ಯಾ ಅಟ್ವ್ಯಾ ಒಳೆರಿಂತ್ ಕೊಂಕ್ಣೆಕ್ ಸ್ಥಾನ್ ಮಾನ್ ಲಾಭೊಂಕ್ ಜಾಥಾ ಸಂಘಟನ್ ಕರ್ನ್ ವಾವುರ್ಲಾ. ಸಾಂ. ಲುವಿಸ್ ಕೊಲೆಜಿಂತ್ ಪಯ್ಲೆಪಾವ್ಟಿಂ ಶಾಳೆಂತ್ ಕೊಂಕ್ಣಿ ಶಿಕಂವ್ಚ್ಯಾ ವಾವ್ರಾ ಪಾಟ್ಲ್ಯಾನ್ ಮಾನೆಸ್ತ್ ಪಾವ್ಲು ಮೊರಾಸಾಚೊ ಮೊಟೊ ಹಾತ್ ಆಸಾ.  

 

ಕೊಂಕ್ಣಿ ಚಳ್ವಳ್ ( 2002 )  ಜಾಗರಣ್ ( 2005 )  ಮೊಗ್ರೆಂ ಕಾರಣ್ ( 2008 )  ಆನಿ ಖೆಳ್ ರಾಜಾಂವ್ ( 2013 ) ಹೆ ತಾಂಚೆ ಸಂಶೊದಾಚೆ ಗ್ರಂಥ್.  ತಾಂಚ್ಯಾ ’ಕೊಂಕ್ಣಿ ಚಳ್ವಳ್’ ಬುಕಾಕ್  2003  ವ್ಯಾ ವರ್ಸಾಚಿ ಡೊ| ಟಿ.ಎಮ್. ಎ. ಪಯ್ ಪುಸ್ತಕ್  ಪ್ರಶಸ್ತಿ ಫಾವೊ ಜಾಲ್ಯಾ ತರ್ ’ಮೊಗ್ರೆಂ ಕಾರಣ್’ ಬುಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ 2008  ವ್ಯಾ ವರ್ಸಾಚೊ ಪುಸ್ತಕ್ ಪುರಸ್ಕಾರ್ ಫಾವೊ ಜಾಲಾ.  ತಾಂಚಿ ಕೊಂಕ್ಣಿ ಸೆವಾ ಮಾಂದುನ್ ಘೆವ್ನ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ 2013 ವ್ಯಾ ವರ್ಸಾಚಿ ಗವ್ರವ್ ಪ್ರಶಸ್ತಿ ಪಾಟಯ್ಲ್ಯಾ ತರ್ ಗೊಂಯ್ಚ್ಯಾ ಕೊಂಕಣಿ ಅಕಾಡೆಮಿನ್ 2014 ವ್ಯಾ ವರ್ಸಾಚೊ ಮಾದವ ಮಂಜುನಾಥ ಶ್ಯಾನ್‌ಭಾಗ್  ಭಾಷಾ ಸೇವಾ ಪುರಸ್ಕಾರ್ ದೀವ್ನ್ ಮಾನ್ ಕೆಲಾ.

 

ಕೊಂಕ್ಣಿ ಭಾಶಾ ಮಂಡಳಾನ್ 1993 ವ್ಯಾ ವರ್ಸಾ ತಾಂಚೊ ಸಂಘಟನ್ ವಾವ್ರ್ ಮಾನುನ್ ಘೆವ್ನ್ ’ಮಹಾನ್ ಕೊಂಕ್ಣಿ ಕಾರ್ಭಾರಿ’ ಬಿರುದ್ ದಿಲಾಂ. ಕೊಂಕ್ಣಿ ಸಾಹಿತ್ಯಾಕ್ ತಾಣಿ ದಿಲ್ಲಿ ಸೆವಾ ಮಾನುನ್ ಘೆವ್ನ್ ಮಂಗ್ಳುರ್ಚ್ಯಾ ಸಂದೇಶ ಫಾಂವ್ಡೇಶನಾನ್ 2011 ವ್ಯಾ ವರ್ಸಾಚಿ ರಾಜ್ಯ್ ಮಟ್ಟಾಚಿ ಕೊಂಕಣಿ ಸಾಹಿತ್ಯ ಪ್ರಶಸ್ತಿ ದೀವ್ನ್ ಮಾನ್ ಕೆಲಾ ತರ್,  ದಕ್ಷಿಣ್ ಕನ್ನಡ್ ಜಿಲ್ಲಾ ಮಟ್ಟಾಚಿ   2002  ವ್ಯಾ ವರ್ಸಾಚಿ ರಾಜ್ಯೋತ್ಸವ್ ಪ್ರಶಸ್ತಿ  ತಾಕಾ ಫಾವೊ ಜಾಲ್ಯಾ. 

 

ಮಾನೆಸ್ತ್ ಪಾವ್ಲು ಮೊರಾಸ್ ಅಕಿಲ್ ಭಾರತೀಯ್ ಕೊಂಕ್ಣಿ ಪರಿಷದೆಚೊ 2006 ತೆ 2008  ಹ್ಯಾ ಆವ್ಧೆಕ್ ಅಧ್ಯಕ್ಷ್ ಆಸ್ಲೊ. ತಶೆಂಚ್ ಕೊಂಕ್ಣಿ ಲೇಕಕಾಂಚೊ ಎಕ್ವಟ್, ಕರ್ನಾಟಕ(ರಿ) ಹಾಂಣಿ 2001 ವ್ಯಾ ವರ್ಸಾ ಮಾಂಡುನ್ ಹಾಡ್‌ಲ್ಲ್ಯಾ  ರಾಜ್ಯ್ ಮಟ್ಟಾಚ್ಯಾ ಕೊಂಕ್ಣಿ ಲೇಕಕ್ ಸಂಮೇಳಾಚೊ ಅಧ್ಯಕ್ಷ್  ಆಸ್ಲೊ.  ಕೊಂಕ್ಣಿ ಲೇಕಕಾಂಚೊ ಎಕ್ವಟ್, ಕರ್ನಾಟಕ(ರಿ) ಹಾಚೊ ಅಧ್ಯಕ್ಷ್ ಜಾವ್ನ್  2010 ತೆ 2012 ಪರ್ಯಾಂತ್  ಫಳಾಭರಿತ್ ಸೆವಾ ತಾಣೆ ದಿಲ್ಯಾ. 

 

ಕರ್ನಾಟಕಾಂತ್ ಕೊಂಕ್ಣಿ ಅಕಾಡೆಮಿ ಸ್ಥಾಪನ್ ಕರುಂಕ್ ಆನಿ ಅಟ್ವ್ಯಾ ಒಳೆರಿಂತ್ ಕೊಂಕ್ಣಿ ಭಾಷೆಕ್ ಮಾನ್ಯತಾ ಮೆಳೊಂಕ್ ಮಾನೆಸ್ತ್ ಪಾವ್ಲು ಮೊರಾಸ್ ಹಾಣೆ ಕೆಲ್ಲೊ ವಾವ್ರ್ ಮಾನುನ್ ಘೆವ್ನ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ 2015 ವ್ಯಾ ವರ್ಸಾ ಅಗೊಸ್ತ್ 18 ತಾರಿಕೆರ್ ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಸಭಾ ಸಲಾಂತ್ ಮಾಂಡುನ್ ಹಾಡ್ಲೆಲ್ಯಾ 'ಕೊಂಕಣಿ ಮಾನ್ಯತಾ ದೀಸ್ ಆಚರಣ್' ಆನಿ 2016 ವ್ಯಾ ವರ್ಸಾ ಅಗೊಸ್ತ್ 20 ತಾರಿಕೆರ್ ಕಾರ್ಕೊಳ್ ಎಸ್.ವಿ.ಟಿ ಶಿಕ್ಪಾಸಂಸ್ಥ್ಯಾಚ್ಯಾ ಸಭಾಂಗ್ಣಾಂತ್ ಮಾಂಡುನ್ ಹಾಡ್ಲೆಲ್ಯಾ 'ಕೊಂಕಣಿ ದೀಸ್ ಆಚರಣ್' ಸಂದರ್ಭಾರ್ ಸತತ್ ದೋನ್ ಪಾವ್ಟಿಂ ಮಾನ್ ಪತ್ರ್ ದೀವ್ನ್ ಅಧಿಕೃತ್ ಥರಾನ್ ಮಾನ್ ಕೆಲಾ.

 

ಕೊಂಕ್ಣಿ ವಾವ್ರಾಂತ್ ಆತಾಂಯ್ ಸುಡ್ಸುಡಿತ್ ಆಸ್ಚ್ಯಾ ಮಾನೆಸ್ತ್ ಮೊರಾಸ್ ಹಾಂಣಿ ಜಾಯ್ತ್ಯಾ ಪರಿಸಂವಾದಾಂನಿ ಪತ್ರಾಂ ಮಂಡನ್ ಕೆಲ್ಯಾಂತ್, ಗೋಶ್ಟಿಚೆಂ ಅಧ್ಯಕ್ಷ್‌ಪಣ್ ಘೆತ್ಲಾಂ. ಉಪನ್ಯಾಸ್ ದಿಲ್ಯಾತ್ ತಶೆಂ ಸಂಸೋಧ್ ಬರ್ಪಾಂ ಬರವ್ನ್ ವೆವೆಗ್ಳ್ಯಾ ನೆಮಾಳ್ಯಾಂನಿ ಫಾಯ್ಸ್ ಕೆಲ್ಯಾಂತ್ ಆನಿ ಜಾಯ್ತಿಂ ಇನಾಮಾಂಯ್ ಆಪ್ಣಾಯ್ಲ್ಯಾಂತ್.

 

ಪ್ರಸ್ತುತ್ ಮಾನೆಸ್ತ್ ಮೊರಾಸ್ ಆಪ್ಲ್ಯಾ ಕುಟ್ಮಾಸಾಂಗಾತಾ ದೆರೆಬಯ್ಲ್ ಫಿರ್ಗಜೆಂತ್ ವಸ್ತಿ ಕರುನ್ ಆಸಾ ಆನಿ ಫಿರ್ಗಜೆಂತ್ ಕೊಂಕ್ಣಿ ಸಂಘಟನ್ ಆನಿ ಸಾಹಿತ್ಯಾಚ್ಯಾ ವಾವ್ರಾಂತ್ ಕಾರ್ಯಾಳ್ ಸೆವಾ ದೀವ್ನ್ ಆಸಾ.

 

ಸಾಹಿತ್ಯಾಸ್ತಾಂಕ್, ಕೊಂಕ್ಣಿ ಮೊಗಿಂಕ್ ಆನಿ ಮಾನೆಸ್ತ್ ಪಾವ್ಲು ಮೊರಾಸಾಚ್ಯಾ ಅಭಿಮಾನಿಂಕ್ ಕಾರ್ಯಾಕ್ ಮಾನಾಚೆಂ ಆಪವ್ಣೆಂ ಆಸಾ ಮ್ಹಣ್ ಸಂಘಟಕಾಂನಿ ಕಳಯ್ಲಾಂ.